Leviticus 14 - Iñupiatun Mumiksat Uqalugiksuat

Piġuaġniġił̣ł̣ugu Salumasiñiq Kiḷḷiġruaqtuqqaaqtillugich

¹ Atanġum uqallautiŋagaa Moses

² ukuniŋa maliġiraksraŋannik piraġausiq nalaullugu salumasitqigñiksraŋatigun mamitanikpata kiḷḷiġruaqtuŋaruat. Tikiutikpatin uvlumun kiliktauviksraġnun salumasiñiḷutin, aŋaiyyuliqsiqpagmuutiniaġaatin,

³ aasii aŋaiyyuliqsiqpaum siḷataanuutiniaġaatin nullaummiviuruam, aasii qanuqitilaaġlutin. Kiḷḷiġruaq mamilaitchuaq maminŋaniqpan,

⁴ aŋaiyyuliqsiqpak piraksriigisiruq malġuk salumaruak tiŋmiak qaġġisitqulugik, iḷaqaġlugik cedar-mik qirugmik, kaviqsuamiglu akłunaamik, suli qiruatchiamik hyssop-mik.

⁵ Tavraasii aŋaiyyuliqsiqpaum piraksriġisigaich igḷua tiŋmiam tuqutqulugu, qulaani qikumiñ utkusiuram imaligaam imilluatamik.

⁶ Igḷua tiŋmiam tiguniaġaa aasii misuglugu, iḷagilugu cedar-m qiruanik, kaviqsuaġlu akłunaaq, hyssop-lu, tiŋmiam tuquttaŋata auŋanun.

⁷ Qivsaliŋniaġaa augmik tallimat malġugni salumasirauniaqtuaq iḷaksi kiḷḷiġruaqtuġnimiñiñ, tavraasii kiligniaġaa salumasiñiḷugu. Iñuuruaq aasii tiŋmiaq tiŋipkaġniaġaa qulaatigun nunaraat.

⁸ Iġġuġisigitin annuġaatin, kivraġlutillu nusaiġutin, suli ivvaġlutin; tavra aasii piraġausiq nalaullugu salumasiñiaqtutin. Isiġumiñaqsiñiaqtutin nullaummivigmun, aglaan siḷataaniillaktuksraurutin tupiqpich tallimat malġugni uvluni.

⁹ Tallimat malġuanni uvlut kivravsaaqtaksraġigiñ niaqqun, umitillu, qavlutillu, suli timigniipayaaqtuat nusat; iqaġigisigitin annuġaatin ivvaġlutillu, aasii tavra piraġausiq nalaullugu salumasiñiaqtutin.

¹⁰ Tallimat piŋayuanni uvlut qaġġirrigisirutin malġugnik aŋusallugnik imnaiyaagnik suli atausimik aġnasallumik imnaiyaamik atausimik ukiuqaqtuamik surruutaitchuanik, tallimatullu pounds-tun uqumaisigiruamik palauvagmik akunŋaruamik olive uqsruanik, suli avvaŋanik pint-gum olive uqsruanik.

¹¹ Aŋaiyyuliqsiqpaum paaŋanuutiniaġaatin Tupqum Atanġum nayuqtauvianun, tavruŋautilugiḷḷu taapkua aitchuutauniaqtuat.

¹² Tavraasii aŋaiyyuliqsiqpaum atausiq aŋusalluq imnaiyaaq iḷaqaġlugu avvaŋanik pint-gum uqsrumik, aitchuutiginiaġaa nunuurautikun. Qaisaġiniaġaik nuimagivlugik Ataniġmun aasii aŋaiyyuliqsiqpaum piñiaġaik.

¹³ Tuqunniaġaa imnaiyaaq salumaruami inimi niġrutit piḷuunmun aitchuutauvianni suli ikipkaġlugu aitchuutauniaqtuat tuqurvianni. Tainna piruksrauruq qanukkii nunuurautikun aitchuutaurut, piḷuunmun aitchuutauruatitun aŋaiyyuliqsiqpagmun suli salumapiaġataqtuaguruq.

¹⁴ Aŋaiyyuliqsiqpak auksraġluni imnaiyaam auŋaniñ auliġñiaġaa taliqpiani siutaata niviŋaruaŋa, kuvluŋalu taliqpium argaŋata, suli putuguanun taliqpium isigaŋata kiliktauniaqtuam piraġausiq nalaullugu salumasiñiḷugu.

¹⁵ Aŋaiyyuliqsiqpak kuvisiñiaqtuq saumigmi utummaŋanun olive uqsruviñiŋanik,

¹⁶ misugluguasii taliqpigmi tikiŋa tavruŋa, aasii qivsalliutilugu iḷaŋa tallimat malġuktun Atanġum sivuġaani.

¹⁷ Aŋaiyyuliqsiqpak uqsruksraġuni iḷaŋanik utummagmiñiittuamiñ aasii nanuglugu taliqpium siutaata niviŋaruaŋanun iñuum salummaqtauniaqtuam, kuvluanullu taliqpium argaŋata, suli putuguŋanun taliqpium isigaŋata piraġausiq nalaullugu salumasiñiḷugu.

¹⁸ Iḷakua aasii uqsrum utummagmiñiittuam niaquġnugniaġaa. Tavra tainna pigumi savaaġigaa piraġausiq nalaułługu salumasiñiksram.

¹⁹ Tavraasii aŋaiyyuliqsiqpak aitchuutiqaġniaqtuq piḷuun pisigilugu aasii savaaġilugu piraġausiq nalaullugu salumasiñiaġniksraq. Taaptuma aquagun, tuqutchigisiruq niġrunmik ikipkautikun aitchuutiksramik,

²⁰ aasii aitchuutigimmiḷugu iḷaqaġlugu palauvaksramik aitchuunmik ikipkaivigmi. Tainnaġluni tavra aŋaiyyuliqsiqpak savaaqaġniaqtuq piraġausiq nalaullugu salumasiñiaġniksraq, aasii salumasiñiaqtutin.

²¹ Piiḷḷiuqtuaguguvich taapkuniŋa aitchuutiksraiḷḷutin, aitchuiyumiñaqtutin atausimik aŋusallumik imnaiyaamik pasiraunikun aitchuutigisaġlugu, nuimaruaġilugu Ataniġmun aŋaiyyuliqsiqpaum aitchuutiksraŋanik. Qaġġirriḷutillu malġuktun pounds-tun uqumaisigiruamik palauvagmik akunŋaruamik olive uqsruanik palauvaksramun aitchuutausaġlugu suli avvaŋanik pint-gum olive uqsruanik.

²² Malġugniglu tiŋmiagnik naakka malġugnik pigeon-nik, igḷua piḷuunmun aitchuutausaġlugu aasii igḷua ikipkautikun aitchuutausaġlugu.

²³ Tallimat piŋayuanni uvlut salumasisaġniqpich aŋaiyyuliqsiqpagmuutisaġitin paaŋanun Tupqum.

²⁴ Aŋaiyyuliqsiqpaum aitchuutiginiaġaik imnaiyaaġlu olive uqsrualu nuimagilugik Ataniġmun aasii aŋaiyyuliqsiqpaum piginiaġaik.

²⁵ Tuqunniaġaa imnaiyaaq aasii auŋata iḷaŋanik piġuaġlugu taliqpigmi siutaata niviŋaruaŋanun salummaqtauniaqtuam, kuvluanullu taliqpigmi argaŋata, suli putuguanun taliqpium isigaŋata.

²⁶ Aŋaiyyuliqsiqpak aasii kuvisiñiaqtuq iḷaŋanik uqsrum saumigmi utummaŋanun

²⁷ aasii tikiġmiñik taliqpimi qivsalliutilugu iḷaŋa tallimat malġugni tavrani Atanġum sivuġaani.

²⁸ Uqsrum iḷaŋa aŋaiyyuliqsiqpaum iḷigisigaa tavruŋa piġuaġvigmiñun augmik: niviŋaruaŋanun taliqpium siutaata salummaqtauniaqtuam, kuvluŋanun taliqpium argaŋata, putuguŋanullu taliqpium isigaŋata.

²⁹ Iḷakua uqsrum utummaŋmiñiittuaq niaquanukkisigaa aasii tainna savaaġiniaġaa piraġausiq nalaullugu salumasiñiaġniksraq.

³⁰ Tavraasii aitchuutiqaġniaqtuq atausimik tiŋmiamik naakkaunnii pigeon-nik

³¹ piḷuun pisigilugu aitchuutaulugu suli igḷua ikipkautikun aitchuutigilugu iḷaqaġlugu palauvaksramik aitchuunmik. Tavra tainna aŋaiyyuliqsiqpaum savaaġiniaġaa piraġausiq nalaullugu salumasiñiaġniksraq.

³² Tavra taamna pitqurauruq mamilaitchuanik kiḷḷiġruaqaqtuanun aitchuutiksraitchuamun aitchuutauruksrauruanik salumasiñiaġniksraŋanun.

Uquulaaġmata Iglut

³³ Ataniq qaitchiŋaruq Moses-mullu Aaron-mullu

^34-35 ukuniŋa maliġiraksranik iglut uquŋakpagich. (Taapkua tavra atugaksraŋich Israel-gum kiŋuvaaŋisa isianikkumiŋ nunaŋanun Canaan, Atanġum qaitchumaaqtaŋanun iliŋiññun nunagitquvlugu.) Iḷitchuġiniqpan iḷaksi Ataniq uquulaaqsipkaitilaaŋanik igluvsiññi, tavra kiligiaqtaksraġigiksi aŋaiyyuliqsiqpak.

³⁶ Aŋaiyyuliqsiqpak piraksriiñiaqtuq sunapayauraq anitqulugu iglumiñ qimilġuyyaŋaiñŋaan uquktaŋa; tainna piŋitpata sunapayaaq iglumiittuaq salumaitchualiuġniaġaat. Tavraasii isiġniaqtuq iglumun

³⁷ aasii qimilġuuġlugu tamanna uquktaŋa. Tavrani suŋaaqtuaqaġniqpan naakkaunnii kaviaqtuanik piġuaġniqtun ittuanik siamitchaiññaqtuamik tapiglautivluni uquk katchimi,

³⁸ uniññiaġaa taamna iglu aasii pitchiġiiyaġlugu tallimat malġugni uvluni.

³⁹ Tallimat malġuanni uvlut utiġluni qimilġuvsaaġniaġaa. Tamanna uquk siaminniqpan,

⁴⁰ piraksriiñiaqtuq uyaġaich uquulaat piiqulugich aasii igillugich sumun salumaitchuamun siḷataani iniqpauruam.

⁴¹ Taaptuma aquagun iluqaan iḷuani katchiŋich kiḷiutaqtittaksraġigaich aasii piiqsaŋat igillugu salumaitchuanun siḷataanun iniqpaum.

⁴² Tavraasii allanik uyaġagnik simmausiġḷugich piiyaqtaŋich, aasii nutauruamik qikumik matutqigḷugich katchiŋich.

⁴³ Uquksavsaalgitpan iglu uyaġaich piiyaŋaqqaaqtillugich suli iglu kiḷiutaŋagaluaqqaaqtiłługu matulitqikł̣ugulu,

⁴⁴ aŋaiyyuliqsiqpaum utiġluni tautugiaġniaġaa. Siaminŋaniqpan, tavra iglu salumaitchuaguruq.

⁴⁵ Siqumitaksrauruq iglu, uyaġaŋit, qiruŋiḷḷu, suli qikuyyaŋalu aasii siḷataanuutilugich iniqpaum salumaitchuamun inimun.

⁴⁶ Kiñaliqaa isiġniġumi tavruŋa iglumun pitchiġiiyaŋapkaqtillugu salumaiññiaqtuq anaqalġataqtillugu.

⁴⁷ Kiña suli nallaġniġumi naakka niġiḷuni iglumi iqaġiruksraġigaich annuġaani.

⁴⁸ Tavraasii, aŋaiyyuliqsiqpak qiñiġiaqpan, uquk nuitqiŋiññiqpan iglu qaatchialiqqaaqtillugu, tavra kilgutiginiaġaa iglu piragausiq nalaullugu salumaniḷugu, uqukkii iluqani piiŋaniqsuq.

⁴⁹ Salumasisaġniksraŋanun iglu, ukua piruksraġigai: malġugnik tiŋmiagnik, cedar-m qiruanik, kaviqsuamiglu akłunaamik, suli hyssop-mik.

⁵⁰ Tuqutkisigaa atausiq tiŋmiaq qulaani qikum puggutauram iḷuturuam imaqaqtuam suvliktuamiñ imiġmik.

⁵¹ Tavraasii piḷugu cedar qiruk, hyssop-lu, kaviqsuaġlu akłunaaq, suli iñuuruaq tiŋmiaq aasii misuglugich auŋanun tiŋmiam tuquttaŋata suli imilluatamun. Qivsaliutigisigaa iglumun tallimat malġuiqsuaġlugu.

⁵² Tavra tainna salumasiñiaġaa iglu tiŋmiam auŋanik, imiġiksuamiglu, iñuuruamiglu tiŋmiamik, cedar-m qiruanik, hyssop-mik, suli kaviqsuamik akłunaamik.

⁵³ Tavraasii tiŋipkaġniaġaa iñuuruaq tiŋmiaq taavani siḷataani iniqpaum qulaatigun nunaraat. Tainna-aasii tavra savaaġiniaġaa piraġausiq nalaullugu salumasisaġniŋagun iglum, aasii salumasiñiaqtuq.

⁵⁴ Tavra taapkua pitquraksrat kiḷḷiġruaqaqpata;

^55-56 kiḷḷiqaqtuat, ayuaqtuqtuat, naakka allat kaviqsisiŋaruat sukapkaŋavlutiŋ naakka uviñik puvinman; suli uqukkun annuġaaniittuanun naakka igluniittuanun.

⁵⁷ Tavra taapkua pitqurat nalunaiġaat suna salumaitchuagumman suli salumaruagumman.