Leviticus 13 - Iñupiatun Mumiksat Uqalugiksuat

Pitqurat Kiḷḷiqsuqtuatigun

¹ Atanġum qaitchiŋagaik Moses-lu Aaron-lu ukuniŋa maliġiraksranik.

² Nalliqsi kiḷḷiqsuġniqpan uviñiŋani naakka ayuaqtuġluni naakka sukapkaŋaruaqaġniqpan mamitchiġiitchumaaqtuamik uviñigmiñi kiḷḷiqsuġluni, Aaron-muutiraksrauruq aŋaiyyuliqsiqpagmun naakka nalliannun iġñiŋisa aŋaiyyuliqsiqpauruamun.

³ Aŋaiyyuliqsiqpaum aasii qimilġuniaġaa kiḷḷiŋa, aasii nusaŋich tavrani qatiqsiŋaniqpata suli kiḷḷiŋa iḷunmuŋaruatun qiññaqaġluni avataaniittuamiñ uviñiŋaniñ, tavra mamitchuitchuamik kiḷḷiġruaqtuqtuq, aasii aŋaiyyuliqsiqpaum kiligniaġaa salumaiññiḷugu.

⁴ Kiḷḷiq aglaan qatiġmiḷuniḷu qiññaŋani iḷunmuŋaruatun inŋitpan avataaniittuamiñ uviñiŋaniñ suli nusaŋich tavraniittuat qatiqsiŋaiḷḷutiŋ, aŋaiyyuliqsiqpaum kisimġiuqtivsaallagniaġaatin tallimat malġugni uvluni.

⁵ Aŋaiyyuliqsiqpaum qimilġutqigñiaġaatin tallimat malġuŋanni uvlut, aasii kiḷḷiñ qanuġiḷiŋaiññiqpan siaminŋaiḷḷuni, tavra ilikkun itivsaallagniaġaatin tallimat malġugni uvluni.

⁶ Aŋaiyyuliqsiqpaum qimilġuvsaaġniaġaatin tallimat malġuŋanni uvlut, aasii kiḷḷiq piiġñiqpan suli siamitkaluaġnani, tavra kiligniaġaatin piraġausiq nalaullugu salumaruaguniḷutin; kiḷḷiłhiñauniqsuq. Iqaġigisigitin annuġaatin aasii piraġausiq nalaullugu salumaniaqtutin.

⁷ Kiḷḷiq aglaan siaminniqpan aŋaiyyuliqsiqpagmun qimilġuuqqaaqtillutin suli kilikłutin salumaniḷutin, sivuġaanuvsaaqtuksraurutin aŋaiyyuliqsiqpaum.

⁸ Aŋaiyyuliqsiqpaum qimilġutqigñiaġaatin, aasii siaminŋaniqpan, tavra kiligniaġaatin salumaitchuaguniḷutin; taamna mamilaitchuaguniqsuq kiḷḷiġruaq.

⁹ Nalliqsi mamilaitchuamik kiḷḷiġruaqtuġniqpan, aŋaiyyuliqsiqpagmuutiraksrauruq,

¹⁰ ilaata qimilġuniaġaatin. Uviñigni qatiqsiŋaruamik kiḷḷiqaġniġuvich qatiqsiŋavlutiglu tavrani nusaŋich suli immaŋaluni,

¹¹ tavra mamilaitchuaguniqsuq uviñigmi kiḷḷiq. Aŋaiyyuliqsiqpaum kiligniaġaatin salumaitchuaguniḷutin; ilikkuaqtaksrauniaŋitchutin, qanukkii nalunaitchuq salumaitchuaguniqsutin.

¹² Uviñigni kiḷḷiqsuutim siamiłłuni matullagniqpatin niaquġniñ isigagnuaglaan,

¹³ aŋaiyyuliqsiqpaum qimilġuutqigñiaġaatin. Tautukkumiuŋ matuŋatilaapiaŋanik iluqaan timin, kiligniaġaatin piraġausiq nalaullugu salumaniḷutin. Iluqani uviñin qatiqsiŋaniqpan, tavra piraġausiq nalaułługu salumarutin.

¹⁴ Kiḷḷiq aglaan agmaqsaġluqqaaqtuq, salumaitchuaguruq.

¹⁵ Aŋaiyyuliqsiqpaum qimilġuutqigñiaġaatin, aasii tautukkumiuŋ agmaruaq kiḷḷiq, tavra ilaata kiligniaġaatin salumaitchuaguniḷutin. Tavra agmaruaq kiḷḷiq sivuniqaqtuq mamilaitchuaguvluni kiḷḷiutilaaŋanik, aasii salumaitchuaġuqłutin.

¹⁶ Kiḷḷiq aglaan mamitpan aasii qatiqsitqigḷuni, ullautigisirutin aŋaiyyuliqsiqpagmun,

¹⁷ qimilġuutqigñiaġaatin. Kiḷḷiq qatiqsiŋaniqpan, tavra piraġausiq nalaullugu salumaruagurutin, aasii aŋaiyyuliqsiqpaum kiligniaġaatin salumaniḷutin.

¹⁸ Nalliqsi ayuaqaŋakpan maminŋaruamik

¹⁹ aasii aquvatigun puvitpan qatiqsivḷuni naakka kaviaqsivłuni tavrani inaani ayuam, aŋaiyyuliqsiqpagmuktuksraurutin.

²⁰ Aŋaiyyuliqsiqpaum qimilġuniaġaatin, aasii taamna iḷunmuŋaniqpan qiññaqaġniqpan avataani uviñiŋaniñ suli nusaŋich qatiqsiŋalutiŋ, tavra ilaata kiligniaġaatin salumaiññiḷutin. Tavra mamilaitchuaq kiḷḷiġruaq isagutiŋaniqsuq ayuaŋani.

²¹ Aŋaiyyuliqsiqpaum aglaan qimilġukpauŋ aasii nusaŋich tavrani qatiqsiŋaiḷḷutiŋ suli iḷunmuŋaruatun qiññaqaŋiḷḷuni avataaniittuamiñ uviñiŋaniñ, aglaan qatiaqsimakpan qiññaŋa, aŋaiyyuliqsiqpaum ilikkun itinniaġaatin tallimat malġugni uvluni.

²² Taamnaasii siamirraqsikpan, aŋaiyyuliqsiqpaum kiligniaġaatin salumaiññiḷutin; kiḷḷiġruaqtuġniqsutin.

²³ Qiññaŋa aglaan allaŋŋuŋaitpan suli siaminŋaiḷḷuni, qiliġuusiññaqtuq ayuaġniñ, aasii aŋaiyyuliqsiqpaum kiligniaġaatin salumaniḷutin.

²⁴ Iḷaanni nalliqsi uutiqtinŋaniqpan, taamna agmaruaq qatiqsikpan naakka kaviaqsiḷuni,

²⁵ aŋaiyyuliqsiqpaum qanuqitilaaġniaġaatin. Nusaŋich tavrani qatiqsiñiqpata suli iḷunmuŋaruatun illuni avataaniittuamiñ uviñiŋaniñ, tavra mamilaitchuaq kiḷḷiġruaq isagutiŋaniqsuq uutiqtirviani, aasii aŋaiyyuliqsiqpaum kiligniaġaatin salumaiññiḷutin.

²⁶ Nusaŋich aglaan tavrani qatiqsiŋaitpata suli iḷunmuŋaruatun inŋiḷḷuni avataaniittuamiñ uviñiŋaniñ, aglaan qatiġluni qiññaŋa, aŋaiyyuliqsiqpaum ilikkun ittuaqtillagniaġaatin tallimat malġugni uvluni.

²⁷ Aŋaiyyuliqsiqpaum qanuqitilaatqigñiaġaatin tallimat malġuŋanni uvlut, aasii siamitchaŋaniqpaŋ tavra mamilaitchuaq kiḷḷiq, aasii aŋaiyyuliqsiqpaum kiligniaġaatin salumaiññiḷutin.

²⁸ Aglaan taamna allaŋŋuŋaitpan suli siaminŋaiḷḷuni suli qatiġluni qiññaŋa, puvinniġusiññaqtuq uutiqtinniŋaniñ. Aŋaiyyuliqsiqpaum kiligniaġaatin piraġausiq nalaullugu salumaniḷutin, qanukkii qiliġuġisiññaġaa uutiqtinniŋata.

²⁹ Nalliqsi, aŋutaugaluaqpan naakka aġnaugaluaqpan, kiḷḷiqaqpan niaqumiñi naakka tavlumiñi,

³⁰ aŋaiyyuliqsiqpaum qimilġuniaġaa. Itisiuraŋaruatun inniqpan avataaniittuamiñ uviñiŋaniñ suli nusaŋich tavrani quqsuqpata saallutiglu, tavra mamilaitchuaq kiḷḷiuruq, aasii kiligniaġaatin salumaiññiḷutin.

³¹ Aasii, aŋaiyyuliqsiqpaum qanuqitilaaqpatin, kiḷḷiq qiññaqaŋitpan itisiŋaluni avataaniittuamiñ uviñiŋaniñ, aglaan maŋaqtuanik nusaiññiqpan, ilikkun itinniaġaatin tallimat malġugni uvluni.

³² Aŋaiyyuliqsiqpaum qanuqitilaatqigñiaġaatin tallimat malġuanni uvlut, aasii siaminŋaiññiqpan suli quqsuqtuanik nusaiḷḷuni tavrani suli itisiŋaruatun inŋiḷḷuni avataaniittuamiñ uviñiŋaniñ,

³³ kivraġniaġiñ niaqun kisiŋŋuġlugu avataa kiḷḷim. Aŋaiyyuliqsiqpaum aasii ilikkun itivsaaġniaġaatin tallimat malġuvsaani uvluni.

³⁴ Tallimat malġuŋanni uvlut aŋaiyyuliqsiqpaum qanuqitilaatqiġñiaġaa kiḷḷiñ, aasii siaminŋaiññiqpan suli itisiŋaruatun inŋiḷḷuni avataaniittuamiñ uviñiŋaniñ, ilaata kiligniaġaatin piraġausiq nalaullugu salumaniḷutin. Iqaġigisigitin annuġaatin, aasii salumasiñiaqtutin.

³⁵ Kiḷḷiñ aglaan siamitpan kiliktauqqaaqtillutin salumaniḷutin,

³⁶ aŋaiyyuliqsiqpaum qimilġutqigñiaġaatin. Kiḷḷiñ siaminniqpan, ivaqłiaksraitchuq quqsuqtuanik nusanik; nalunaitchuq salumaitchuaguniqsutin.

³⁷ Aglaan aŋaiyyuliqsiqpaum isummatigikpauŋ kiḷḷiq siaminŋaiññiḷugu suli maŋaqtuat nusat nausaŋalutiŋ tavrani, kiḷḷiq maminŋaniqsuq, aasii aŋaiyyuliqsiqpaum kiligniaġaatin piraġausiq nalaullugu salumaniḷutin.

³⁸ Nalliqsi, aŋutaugaluaqpan naakka aġnaugaluaqpan, qatiqtualiġñiqpan uviñigmi,

³⁹ aŋaiyyuliqsiqpaum qanuqitilaaġniaġaatin. Nalunaitchuat aasii qatiaġniqpata nausiññaqtuaguniqsuq pupiksiruatun uviñigmi; piraġausikun salumaruagurutin.

^40-41 Niaqun mitquiġñiqpan sivuġaġni naakka tunusugni, taaptuma salumaiḷiñiaŋitkaatin.

⁴² Aglaan kaviaqłuni qatiqtuaq kiḷḷiq nuiñiqpan nusaiŋaruami, tavra mamilaitchuamik kiḷḷiġruaqaqtuq.

⁴³ Aŋaiyyuliqsiqpaum qanuqitilaaġniaġaatin, aasii tavrani kaviaqłuni qatiqtuamik kiḷḷiqaqpan,

⁴⁴ aŋaiyyuliqsiqpaum kiligniaġaatin salumaiññiḷutin, pisigilugu mamilaitchuaq kiḷḷiġruaq niaquġniittuaq.

⁴⁵ Mamilaitchuamik kiḷḷiġruaqaġniġuvich uviñigni, aligaŋaruanik annuġaaqtuksraurutin, iḷḷaiqsuŋaiḷḷugiḷḷu nusatin, matuqaġlugulu alliŋa kiiñaqpich, aasii nipallutin “Salumaitchuŋa, Salumaitchuŋa!”

⁴⁶ Tainna tavra salumaitchuaguniaqtutin kiḷḷiqsuġuvich, suli iñuuniaqtuksraurutin siḷataani nullaummiviuruam, kisimġiuqtuksraurutillu.

Pitquraliat Uqukkun

⁴⁷ Uquulaaqsiŋakpata annuġaat, imnaim mitquġigaluaqpauŋ naakka ukił̣haagugaluaqpan,

⁴⁸ naakkaunnii ukił̣haaviñiġmiglu imnaim mitquviñiŋaniglu ukił̣haamik naakka qisigmik, qisigmik savaaguruamiglu,

⁴⁹ suŋaaqtaaġuŋaniqpan naakka kavialaaqsiŋaniqpan, tavra uquuruq tautuktitaksrauruq aŋaiyyuliqsiqpagmun.

⁵⁰ Aŋaiyyuliqsiqpaum qimilġuniaġaa aasii tutquġlugu tallimat malġugni uvluni.

⁵¹ Qimilġutqigñiaġaa tallimat malġuanni uvlut, aasii uquk siaminŋaniqpan, taamna salumaitchuaguruq.

⁵² Aŋaiyyuliqsiqpaum ikipkaġniaġaa, qanukkii siamitchuuruaguniqsuq uquk suksraunġiqsuksrauruq ikipkaġlugu.

⁵³ Aglaan, qimilġuġumiuŋ, aŋaiyyuliqsiqpaum uquk siaminŋaiññiqpan taaptumani,

⁵⁴ piraksriiñiaqtuq iqaġitqulugu aasii tutquġlugu tallimat malġuvsaani uvluni.

⁵⁵ Tavraasii qimilġuniaġaa, aasii uquum qiññaŋa allaŋŋuŋaiññiqpan, siamiñŋaitkaluaqtillugu, tavra salumaitchuaguruq; ikipkaqtaksraġigiñ, auŋagaluaqpan sivuġaani naakka tunuani.

⁵⁶ Aglaan, aŋaiyyuliqsiqpaum qimilġuvsaaġumiuŋ, uquk nalunaqsiŋaniqpan, aliglugu piiqsaksraġigaa annuġaamiñ naakka qisigmiñ.

⁵⁷ Tavraasii, uquk nuivsaalgitpan, tavra siaminagutiniqsuq, iñuata ikipkaqtaksraġigaa taamna.

⁵⁸ Iqaġigumiuŋ aasii piġuaġniq nalunaqsiñiqpan, iqaġivsaaqtaksraġigaa, aasii piraġausikun salumasiñiaqtuq.

⁵⁹ Tavra, taamna, pitquraq uquġniŋagun annuġaat, imnaim mitquġigaluaqpauŋ, ukił̣haagugaluaqpallu, savaagugaluaqpan ukił̣haamiñ, imnaim mitquaniñ naakkaunnii suna qisigmiñ savaaq; tainna tavra sivunniġñiaqtut piraġausikun salumaruagukpan naakka salumaitchuagukpan.