Leviticus 12 - Iñupiatun Mumiksat Uqalugiksuat

Salummaqtauniksraŋat Aġnat Iġñianikpata

¹ Atanġum uqallautiŋagaa Moses ukuniŋa maliġiraksranik

² Israel-gum kiŋuvaaŋiññun. Tallimat malġugni uvluni aġnaq iġñianikpan aŋutaiyaamik, piraġausiq nalaullugu salumaitchuaguniaqtuq, piusimisun tatqiḷituaġman aalġukami.

³ Tallimat piŋasuanni uvlut, miqłiqtuuruaq nalunaiñŋutchiqsauniaqtuq.

⁴ Tavraasii tavraŋŋa iñuiññaq qulit piŋasuni (33) uvlivsaaganikkumi piraġausiq nalaullugu salumasiñiaqtuq augiġñimiñiñ iġñikami; aksiktuksraġiniaŋitkaich sut salumaruaguruat naakka isiġluni salumaruamun Tupiġmun naatchianigataġluni salumasiñiksramiñun.

⁵ Akimiaġutaiḷani (14) uvluni iġñianikpan aġnaq paniqaġuni, piraġausiq nalaullugu salumaitchuaguruq, tatqiḷituaġman aalġuniġmisun. Tavraasii piŋasukipiaq itchaksrat (66) uvluni uvlivsaaġuni piraġausiq nalaullugu salumasiñiaqtuq augiġñimiñiñ.

⁶ Piviksraq salumasiñiksraŋanun naalġataqpan, iġñiqaġaluaġumi naakka paniqaġluni, aŋaiyyuliqsiqpagmuurrigisiruq paaŋanun Tupqata Atanġum nayuqtauviata atausimik ukiuqaqtuamik imnaiyaamik ikipkautikun aitchuutiksramik, suli pigeon-mik naakka tiŋmiamik piḷuun pisigilugu aitchuutiksramik.

⁷ Aŋaiyyuliqsim qaisaġiniaġaa aitchuutaa aġnam Ataniġmun suli piraġausiq nalaullugu salumairrutaa piiqsaġlugu, aasii piraġausiq nalaullugu salumasiñiaqtuq. Tavraasii, taamna, aġnam piraksraŋa iġñianikkumi.

⁸ Aġnaq aasii aitchuutiksraiññiġumi imnaiyaamik, qaġġirrigisiruq malġugnik nuyuaqturuagnik tiŋmiaŋnik, naagga malġugnik tiŋmiayaaŋnik nuyuitchuaŋnik, igḷua aitchuutiksraq ikipkagaksriuġlugu aasii igḷua piḷuun pisigilugu aitchuutausaġlugu, aŋaiyyuliqsiqpaum aasii savaaġiniaġaa piraġausiq nalaullugu salumairrutaiqsaġlugu, tavraasii salumasiñiaqtuq piraġausiq nalaullugu.