Leviticus 11 - Iñupiatun Mumiksat Uqalugiksuat

Niġrutit Niġiñaġumiñaqtuat

¹ Atanġum uqallautiniġaik Moses-lu Aaron-lu,

² Uqautilugich Israel-gum kiŋuvaaŋich: Niġiyumiñaqtusi nunamiittuanik niġrutinik

³ kukiqaqtuanik aviŋaruagnik, niqimigniglu tamutqiguuruanik,

^4-6 aglaan niġiruksrauŋitchusi pikukturuanik, rock badger-nik, naakka ukalliñik. Tamatkua salumaitchuaġiniaġisi; niqimignik tamutqiguuruat aglaan kukiqaŋitchuat aviŋaruagnik.

⁷ Niġiñasigik tuttuqłuich. Salumaitchuaġiniaġisi; kukiqaġaluaqtut aviŋaruagnik, aglaan tamutqiḷaitchut niqimignik.

⁸ Tamatkua niġrutit niġiñasigik naakkaunnii aksigḷugich tuquŋaruat timiŋich; salumaitchuagurut.

⁹ Niġiyumiñaġisi immaniittuat niġrutipayaat aŋuutiqaqpatalu kavisiqaqpatalu,

¹⁰ aglaan iñuuruaguruat immami aŋuutaitchuallu kavisiiḷaallu niġiruksraġiŋitkisi.

¹¹ Tainnaittuat niġrutit salumaitchuaġiniaġisi. Niġiñasigik naakkaunnii aksigḷugich tuquŋaruat timiŋich.

¹² Niġiruksrauŋitchusi sunik immamiutapayaanik aŋuutiqaŋitpatalu kavisiitpatalu.

^13-19 Niġiñiaŋitkisi nalliat unnii ukua tiŋmiat: tiŋmiaqpaich, ukpigich, qiḷġich, kirgaviich; buzzard-gich, vulture-t, tulukkat; ostrich-gich; nauyyat, stork-gich, heron-gich, pelican-gich, iŋitqat; hoopoe-t; bat-giḷḷu.

²⁰ Iluqaġmiŋ isaġuligaat qupilġut salumaitchuagurut,

²¹ aglaan tamatkua nuttagayuich.

²² Niġiyumiñaqtusi nuttaġayugnik, cricket-nik, naakka grasshopper-nik.

²³ Aglaan mikiruapayaat isaġuqaqtuat suli paamġuġuuruat salumaitchuagurut.

^24-28 Aksiksiñiġuvsi tuquŋaruat ukua niġrutit timaannik, salumaitchuaguniaqtusi anaqalġataqtillugu: niġrutipayaat kukigruaqaqtuat, kukiŋich aglaan aviŋaruagukpata suli tamuġuuvlutiŋ niġianiktamignik, suli sisamanik niuligaapayaat niġrutit isigamigni alammaqaqtuat. Tigumiaġniġuvsi tuquŋaruanik timiŋiññik, iqaġiruksraġigisi annuġaasi, aglaan salumaitchuaguniaqtusi anaqalġataqtillugu.

^29-30 Itiġiat, rat-gich, aviŋŋaich, suli lizard-gich salumaitchuagurut.

³¹ Kiapayaaq aksigñiqpagich tamatkua naakka tuquŋaruat timiŋich salumaiḷiŋaniaqtut anaqalġataqtillugu.

³² Aasii timiŋich tuquaniŋaruat katagniqpata sumupayaaq, tavra taamna salumaitchuaguniaqtuq. Taamna sivuniqaqtuq sunun qiruuruanun, ukił̣haaguruanun, qisignun, naakka sunun puukatalianun, supayaamun atuġuugaluaqparruŋ. Misuktaksraġigaat immamun, aglaan salumaitchuaguniaqtuq anaqalġataqtillugu.

³³ Aasii timiŋich katagniqpata qikumun utkusigmun, sunapayaaq iḷuaniittuaq salumaiḷiñiaqtuq, suli siqumitaksraġiniaġiksi utkusik.

³⁴ Niqi niġiñaġumiñaġaluaqtuaq, aglaan taaptumaŋŋa utkusigmiñ immiŋaniqpan salumaiḷiñiaqtuq, suli suna imiġnaġumiñaqtuaq utkusigmiñ salumaiññiaqtuq.

³⁵ Sunapayaaq tuquŋaruam timim turvigiraŋa salumaitchuaguruq; qiku igniġvik naakka samuunnaaqługich iggavik siqumitaksrauniaqtuq,

³⁶ aglaan suna suvliktuagukpan naakka imiqaġvik salumaruaguniaqtuq, sut aglaan allat aksiutiruat tuquŋaruam timaanun salumaitchuagurut.

³⁷ Iḷaŋat katagniqpan nautchiaksramun nautchirriutiniaqtuamun, taamnagguuq nautchiaksraq salumaruaguruq.

³⁸ Aglaan kiñitchiqsillugu iḷaŋat katagniqpan tavruŋa, nautchiaksraun salumaitchuaguruq.

³⁹ Niġrun niġiñaqtuaq tuquniqpan, kialiqaa aksikkumiuŋ salumaiḷiñiaqtuq anaqalġataqtillugu.

⁴⁰ Aasii-suli nalliqsi niġiñiqpan sulliñiŋanik niġrutim, iqaġiruksraġigisi annuġaasi, aglaan salumaitchuaguniaqtusi anaqalġataqtillugu; nallisi tigumiaqtuat tuquŋaruam timaanik iqaġiruksraġigisi annuġaasi, aglaan salumaiññiaqtusisuli anaqalġataqtillugu.

⁴¹ Niġiruksrauniaŋitchusi niġrugauranik kukiḷuuraqtuanik nunami,

⁴² paamġuqtuagugaluaqpata, naagga sisamanik niuqaġlutiŋ iglausuukpata, naagga iñugiaktuanik niuqaġaluaqpata.

⁴³ Salumaiḷiñasi ilivsiññun niġiḷusi tamatkuniŋa.

⁴⁴ Uvaŋa Atanġuruŋa God-iksi; salumaruaguruksraurusi, qanukkii Uvaŋa salumaruaguruŋa.

⁴⁵ Uvaŋa Atanġuruŋa Egypt-miñŋaurrigiraqsi God-igitquvluŋa ilivsiññun. Salumaruaguruksraurusi, qanukkii Uvaŋa salumaruaguruŋa.

⁴⁶ Tavraasii taamna pitqurauruq niġrutitigun suli tiŋmiatigun, suli supayaatigun iñuuruanun immami, suli sunapayaaq igliqtuaq nunami.

⁴⁷ Qaunakłaaġlusi iḷisimaruksraurusi piraġausiq nalaullugu salumaruaniglu salumaitchuaguruaniglu, niġrutinik niġiñaqtuanik suli niġiruksraġiŋitchavsiññik.