Leviticus 10 - Iñupiatun Mumiksat Uqalugiksuat

Piḷuusiqimmagnik Nadab-lu Abihu-lu

¹ Aaron iġñiŋik, Nadab-lu Abihu-lu, aġraliqutillaatik pivḷugik, aumaruanik alualiqł̣ugik, tivraġiksausiqł̣ugiglu, aitchuutigiŋagaik Ataniġmun. Aglaan taamna igniq salumaruaguŋaiñŋaruq, Atanġumkii piraksriutigiŋaił̣ł̣ugu iliŋigñun aitchuutigitqulugu.

² Tavraŋŋatchiaq Ataniq igniġmik qaipkaiḷḷagruaŋaruq, aasii iluqatik ikivlutik tuquŋaruk takkuani Atanġum.

³ Tavraasii Moses-gum uqallautiŋagaa Aaron, “Tavra taamna Atanġum uqautigiraŋa uqallakkami inna, ‘Iluqaġmiŋ savaurriruat uvamnik qiksigiruksraġigaat salumaruaguniġa; qiñiqtinniaġiga qaumaniġa iñugiramnun.’” Aglaan Aaron nipaił̣uksiruq.

⁴ Moses-gum ququaŋagaik Mishael-lu Elzaphan-lu, iġñiŋik Uzziel, Aaron-gum aŋaaluata, aasii uqallautivlugik, “Qaiḷusik aġnaqativsik timiŋik annisisaqtuaqsigik salumaruamiñ Tupiġmiñ aasii siḷataanuglugik nullaummivium.”

⁵ Tavraasii qaivḷutik annuġaaŋikkun tiguvlugik timiŋik annisuutiŋagaik siḷataanun nullaummivium, Moses piraksriutaatun.

⁶ Tavra Moses-gum uqallautiŋagaich Aaron-lu iġñiŋiglu Eleazar-lu Ithamar-lu, “Iḷḷaiqsuŋaiññagich nutchasi naakkaunnii aligaġlugich annuġaasi qiñiġnaqtitchaġlusi qiñŋutilaaqsi. Tainna pituaġuvsi, tuquniaqtusi, aasii Atanġum qinnautiniaġaa iluqaan nunaaqqiuruaq. Allat aglaan Israel-gum kiŋuvaaŋich iḷasi qiñŋuyumiñaqtut, taapkuak pisigilugik Atanġum tuquttaŋik ikipkaqługik.

⁷ Unitchaanasiuŋ paaŋa Tupqum, tainna pituaġuvsi tuquniaqtusi, qanukkii uvva ilaaguaqtauŋarusi uqsruqtaaqtaunivsigun Ataniġmiñ.” Tavraasii kamagiŋagaat Moses uqalua.

Maliġiraksraŋich Aŋaiyyuliqsiqpaich

⁸ Ataniq uqallaktuq Aaron-mun,

⁹ “Ilviḷḷu iġñakkiḷḷu isiġniaŋitkiksi Tupqa nayuqtauvigma wine-tuŋaguvsi naakka allanik imiŋasiñaqtuanik imiŋaguvsi; tainna piguvsi, tuquniaqtusi. Tavra taamna pitquraq maliġiraksraŋat iluqaġmiŋ kiŋuvaavsi.

¹⁰ Nalupqisuutaitchuksraurusi allagiiktilaaŋiññik God-im qukinautiŋagullu qukinautaitchuavlu, aasii suli piraġausivsigun salumaruavlu allagiigñiŋak salumaitchuavlu.

¹¹ Iḷisautiruksraġigisi Israel-gum kiŋuvaaŋich iluqaiññik pitquranik qaiñŋaramnik Moses-kun.”

¹² Moses-gum uqallautiŋagaich Aaron-lu kisiŋŋuqtauŋaruaglu iġñiŋik, Eleazar-lu Ithamar-lu, “Palauvaksraq aitchuutiksraq piḷugu iḷakuuruaq niqini aitchuutauruani Ataniġmun, puvlaksautaiḷaamik punniliuġlugu aasii niġiḷugu saniġaani ikipkaivium, aitchuunkii taamna salumapiaġataqtuaguruq.

¹³ Niġiḷugu salumaruami inimi; tavra taamna piksrautin iġñiġiraqpiḷḷu niqiniñ aitchuutauruaniñ Ataniġmun. Tainna Atanġum piraksriŋagaaŋa.

¹⁴ Aglaan ilviḷḷu qitunġavsiḷu niġiyumiñaġiksi sakiak kiŋulliġḷu niuŋa qaisauŋaruak nuimaruaguvlugik aitchuutik, nuimaruagivlugisuli qaisauŋaruat Ataniġmun pisigivlugich aŋaiyyuliqsiqpaich. Niġiyumiñaġisi sumipayaaq piraġausiq nalaullugu salumaruaguruami. Tamatkua aitchuutit qaisauŋarut ilivsiññun qitunġavsiññullu autaaġusiaġivlugich iḷammiuġnikun aitchuutiŋiññiñ Israel-gum kiŋuvaaŋisa.

¹⁵ Qaġġisisaġaat kiŋulliq niu sakiaglu qaisaukpata qaunnat niqitigun aitchuutauruatigun Ataniġmun. Taapkua ilivsi piginiaġisi miqłiqtuvsiḷu isuitchuamun, Atanġum piraksriutaatun.”

¹⁶ Moses-gum apiqsruutigiŋagaa nagrulik piḷuutinun aitchuutiksraun aasii iḷitchuġivluni ikipkaŋatilaaŋanik. Tavrani qinnautiŋagaik Eleazar-lu Ithamar-lu, aasii apiqsrułłakługik,

¹⁷ “Summan niġiŋitchaqsik piḷuutinun aitchuutauruaq salumaruami inimi? Salumaruagupiaġataqtuq, aasiuvva Atanġum qaiñŋagaa ilivsigñun piḷuutaiqsaqługu nunaaqqiuruaq.

¹⁸ Auŋa salumaruamun Tupiġmuutiŋaiñman, niġiñiaġaluaqtaqsiuva tavrani inimi, piraksriusiptun.”

¹⁹ Aaron-gum kiugaa, “Niġiŋagupku aitchuutauruaq piḷuutinun uvlupak, Atanġum iviġaumaginayaqpauŋ? Iñuich qaisaġiŋagaat piḷuutimignun aitchuun Ataniġmun uvlupak, aasiisuli qaġġirrivḷutiŋ ikipkaqtanik aitchuutinik, naaggauvva piaġiitchuat uvamnun nalautittut.”

²⁰ Moses-gum taamna tusaagamiuŋ, natqiŋaruq.