Leviticus 1 - Iñupiatun Mumiksat Uqalugiksuat

Ikipkaqtat Aitchuutit

¹ Atanġum ququulaŋagaa Moses Tupqaniñ Atanġum nayuqtauviŋata aasii aitchuqługu ukuniŋa maliġiraksraŋiññik

² Israel-gum kiŋuvaaŋich atuaksraŋiññik aitchuigumiŋ ikipkaivikun. Aitchuiguvsi niġrunmik ikipkaġlugu, pamiqsaaguyumiñaqtuq, imnaiguyumiñaqtuq, naaggaunnii nagruliuluni.

³ Aitchuiguvsi iḷaŋannik pamiqsaat ikipkaŋaruamik, qaġġirriruksraurusi aŋusallumik surruutaitchuamik sumik unnii. Paaŋanuglugu Tupqum Atanġum irvianun, ilaata akuqtullayumagaasi.

⁴ Argaiñ niaquanuglugu, aasii akuqtuqtauniaqtuq ikipkaaksrauluni aitchuun piḷuutaiqsaġlutin.

⁵ Tavrani tuqullugu immulivium aŋusalluŋa sivuġaani Atanġum, aasii Aaron iġñiŋisa aŋaiyyuliqsauruat qaġġisiniaġaat auk aasii siqił̣ł̣aqtiġutigilugu iluqaiññun saniġaŋiññun ikipkaivium paaŋaniittuam Tupqum.

⁶ Tavraasii amiiyaqqaaġlugu piḷaglugu,

⁷ aasii Aaron iġñiŋisa qirriġñiaġaat ikipkaivik ikillugulu.

⁸ Iḷigisigaich igniġmun avguŋaruat niqiŋich niġrutim, taputilugik niaqualu qaunnaŋalu.

⁹ Iġġuġisigisi iḷuġutiŋich suli kiŋulliik niuŋik, aasii aŋaiyyuliqsiqpaum ikipkaġniaġaa iluqaan aitchuutauruaq ikipkaivigmi. Tivraġigñiŋa ikipkaqtam iviġaumanaqtuq Ataniġmun.

¹⁰ Aitchuutigiguvsiuŋ iḷaŋat imnaivsi naakka nagrulik, aŋusalluuruksrauruq surruutaiḷḷuniḷu.

¹¹ Tuqunniaġiksi ikipkaivium salliani, aasii aŋaiyyuliqsiqpaich siqił̣ł̣aqtiġutiginiaġaat auŋa iluqaiññun saniġaŋiññun ikipkaivium.

¹² Siqumitanikkuvsiuŋ, aŋaiyyuliqsauruam iḷiñiaġaich igniġmun iluqaisa avguat, taputilugik niaqualu qaunnaŋalu.

¹³ Iġġuġlugich aasii iḷuġutiŋich kiŋulliiglu niuŋik, aasii aŋaiyyuliqsiqpaum ikipkaġniaġaa iluqaan aitchuutauruaq ikipkaivigmi. Tivraġigñiŋa ikipkaqtam iviġaumanaqtuq Ataniġmun.

¹⁴ Ikipkaġlugu aitchuiñiaġuvich tiŋmiamik, dove-guruksrauruq naakkaunnii pigeon-guluni.

¹⁵ Aŋaiyyuliqsim ikipkaivigmuutiniaġaa, qipillugu niaquiġñiagaa aasii ikipkaġlugu ikipkaivigmi. Auŋa maqipkaġlugu saniġaagun ikipkaivium.

¹⁶ Puviaŋa piiġḷugu aasii igillugu kivallianun ikipkaivium aġrat iḷḷiviannun.

¹⁷ Tigulugik isaġuŋik alikkisigaa timaa agmaġlugu, isaġuŋik piiġaluaġnagik, aasii ikipkaġlugu suġaiḷḷugu ikipkaivigmi. Tivraġigñiŋa ikipkaqtam iviġaumanaqtuq Ataniġmun.