Jude 1 - Iñupiatun Mumiksat Uqalugiksuat

¹ Jude kivgaŋata Jesus Christ suli aniqataata James-gum tuyuġigai ukua iñuŋnun ququaŋakkaŋiñun God-im, piviuttaġikkaŋiñun God-im Aapam ukpiġutiqaqtituiññakkaŋiñullu Jesus Christ-gum.

² God-ttuq nagliktuutiqpaqaġli ilivsiññun, tutqiutiqpaqaqtillusiḷu, piviuttaqqutiqpaqaġliḷu ilivsiññun.

Iḷisaurrit Iḷumun Inŋitchuanik

³ Piviuttaġirauruasii, pisuqtilaaptun tuyuġuuraġniallavsi uqautigilugu annaun atunim pigikkaqput, irrusiñiłhaaŋaruŋa tuyuġukłusi qapiŋaisaaġutinik, ukpiqsimaaqtuiññaquvlusi suli qapiqtaiḷḷisigitquvlugu iḷumun ittuaq nalaunŋapkaġniapiaġlugu God-im qaisaŋatun atausiaqługu iñuŋmiñun.

⁴ Qanuq imma iñuich iḷaŋich god-aiḷaqtuat sagluqinnikłutiŋ iḷḷatiŋaniqsut uvaptiŋnun, aasii iḷumun inŋitchuanik iḷisaurriaqsivḷutiŋ, God-mun nagliktauvaił̣ł̣uni sugiŋiññivḷugich qanusipayaat piḷuutikun piraġautchich. Suli iliŋisa ayyaktuaġmivḷugu Jesus Christ Ataniqput Umialikpullu. Tainnatchit iñuich suksraunġiqsauyumaaqtut, suli suksraunġiqsauyumaaġniŋat uqautauganiŋaruq Bible-ni iŋiḷġaan.

⁵ Itqaqtitchukkivsi iḷaŋiññik sut iḷisimaaniŋakkavsi. Itqaqsiuŋ una. Atanġum annautiŋagaluaqługich Israel-guruat nunamiñ Egypt-miñ, aquvatigun suksraunġiŋagai ukpiġutaitchuat taipkunani.

⁶ Itqaġmisiuŋ una. Isaġulgich qaunakłaanġiqł̣utiŋ qaaŋiulaaŋagaat ataniġnaqutiksriusiaqtiŋ God-miñ, aasii qimakługu qiḷak iñuuvikkaluaqtiŋ. God-im tigutaaŋagai taaqtuamun samuŋa qiḷiqsruirauviannun tigutaaġutinik isuitchuamun, utaqqivḷugu taimña kamanaqtuaq Uvluq suksraunġiqsauviksrautaat.

⁷ Suli itqaġlugich iñuŋich Sodom-lu Gomorrah-vlu avalliuraŋisalu nunaaqqich piḷuusiqiŋammiruat taipkunatun isaġuliktun, allatuutitigun aŋutikkaluat unnii aŋutinun. Taamna pisigivlugu nagliksaaqtut tatavsaunmi isuitchuamik igniġmi, aasii taamna kaŋiqsiñaqłuni kiliktuutauruq iluqaptiŋnun tuvraquŋił̣ł̣ugich.

⁸ Tainna taipkua piraugaluaqtillugich tamatkua god-aiḷaqtuat iñuich piḷuksiŋarut ilaisa timimiŋnun, siññaktuŋisa piḷuksipkaqługich. Iliŋisa suuŋiḷaġivlugu God-im ataniġnaqutaa, suli uqamaqłuutigivlugich kamanaqtuat pamaniittuat.

⁹ Qaukłiat unnii isaġulgich Michael tainna uqalliaŋaitchuq. Qanaaqatigikamiuŋ Tuunġaq uqavaaġutigivlugu nallimiŋnun piginiaqtilaaŋanik timaa Moses, Michael-gum uqallautisaqausiiñŋagaunnii Tuunġaq qanuqinniġaġlugu pisaaŋasaġlugu uqaluŋnik, aglaan uqallautigiññaŋagaa, Atanġuptuq tainna pitquŋiḷḷisin.

¹⁰ Aglaalli tainnatchich iñuich uqamaqłuutiqaġuurut supayaanik kaŋiqsiḷaisamiŋnik. Iñuusiqaqtut niġrutitun sunapayaaq pisukamirruŋ piugaqługu, aasii tainna pikamiŋ inmiŋnun suksraunġiqł̣utiŋ.

¹¹ Qanutun tatamaanaqtigiruaq kasuġumaaġaat. Ilimiŋnik pasirauyumiñaqsiŋarut Cain-tauq piŋaraŋatun ittuamik. Maġġutipiallaŋarut inmiŋnik killuliqutipiaġatanun maniqallatuvaił̣ł̣utiŋ, Balaam-tuttauq. Suksraunġiqsauniaqtut qanuq makivsaallaŋarut akiḷḷiutivlutiŋ Korah-m makivsaallausiatun.

¹² Tainnatchich iñuich piġuaqtaġniqtun ittut niġiqatigiigñivsiññi kanŋunaqsivḷugu suurimmaanġiqł̣utiŋ. Sunapayaaq qaunagiŋaiqł̣ugu aglaan inmiŋnun kisian qaunagivlutiŋ. Nuvuyyaqłuktun ittut anuġim tiŋitaŋisun sialuguġniaġmiñaniḷu. Napaaqtutun ittut siiġñiŋitchuatun ukiaġataqtillugu, napaaqtutun maŋŋuaqługich nutchuktatun aasii tuqulipiallakłutiŋ.

¹³ Iŋiuligruaŋisun taġium inmiut, kanŋunaqtuat piḷġusikaaŋich iłłutiŋ qapukłuliqiaŋisun qaggaum. Uvluġiatun pamiuqaqtuatun ittut taimmausuuruatun, qanuq God-im iniksriqsimagai isuitchuamun taaġniqsraqpiatchiamun.

¹⁴ Tamatkuaptauq sivuniġivlugich Enoch-gum tallimat malġuata kiŋuniġiich Adam-miñ uqaqsiŋagaa God uqaqłuni, “Tautuksiuŋ, Ataniq qaiñiaqtuq piqatigivlugich piḷuutaitchuat isaġulisalaŋni.

¹⁵ isivġiġiaġlugich iñupayaat suksraunġiġuglugich iluqaisa piḷuusiqiripayaat God-aiḷaqłutiŋ savaaġikkaŋisigun, uqalugiipiaġataqtuatigullu uqallagautiŋisigun piḷuusiqirit uqamaqłuutigivlugu God.”

¹⁶ Tamatkua iñuich ataramik uqamayuutiqaqtut pasivḷugiḷḷu allat iñuich, kamagiugaqługich pigiitchuat kipiġniuġutitiŋ. Uqavigaaġutigisuummiut inmiŋnik, suli uqayuqsaaġutivlugich iñuich ilaisa pitqukkatiŋ nalautquvlugich.

Kiliktuutit Iḷisaurrutillu

¹⁷ Piviuttaġirauruasii, itqaumasiuŋ una. Piiguġnagich uqaluusiaġiŋakkasi tiliraŋiñiñ Atanipta Jesus Christ.

¹⁸ Uqautiŋagaasi iliŋisa aqulliġñi uvluni iñuich iñukpalliġñiaġnivḷugich kipautikłiġñiaqtuat ilivsiññik, kamaksriugaqtuat ilaisa pigiitchuanik kipiġniuġunmiŋnik.

¹⁹ Tamarra tamatkua iñuich agvisauruat atiŋirrutinun aŋalataġipkaqłutiŋ iñuŋruiññaum kipiġniuġutiŋiñun, Ilitqusiġiksuamun aŋalatitkaluaġnatiŋ.

²⁰ Aglaalli ilivsi piviuttaġirauruasii, kiikaa sivunmuktuġitchi iḷumutun iḷisaurrutitigun piḷuutaiqsaiññautaullaruakun ukpiġutiptigun, aŋaiyyuuġlusi suaŋŋasiqsuutaagun Ilitqusiġiksuam,

²¹ aasii iñuutuiññaġlusi God-mun piviuttaġituiññaġumiñaqsiḷusi utaqqiuġnivsiññi Ataniptiŋnik Jesus Christ-mik, nagliktuġumiñaqsiḷġataġlusi qaiḷuni aitchuġiaġlusi iñuggunmik isuitchuamik.

²² Naglikkutiqaġitchi iñuŋnun nalupqisuutiqaqtuanun.

²³ Annautisigik nuqipqaulliŋmatun igniġmiñ. Nagligisigik allattauq piḷuusiqirit sivuuqqatigillaan piḷuusiqisuŋiḷḷusi iliŋisitun, uumigilugich iluqaqpiatchiaŋisa nalunaiññiŋich piḷuutiŋisa, nagligilugich piḷuusiqirauniġmata.

Aŋaiyyun Nanġaullu

²⁴ Paŋmapak nanġaqsiuŋ ilaa piḷuksitchaiḷiraġniḷḷaruaq ilivsiññik, suli qaisaġiyumiñaqłusi pasiñaġumiñaiġḷusi suli quviasukpaglusi sivuġaani qaummaġiksuam nayuqłiataata.

²⁵ Ilaa kisimi God-auruq Annaurrigikkaqput Jesus Christ-kun Ataniptigun, ilaa nanġaqtauli suli naluruuraaŋaiqsauli umialguruaq suaŋŋatiqaqtuaġlu ataniġnaqutiqaqtuaġlu, taimaŋŋaqaŋa paŋmapaglu taimuŋalu isuitchuamun. Amen.