Jonah-m 4 - Iñupiatun Mumiksat Uqalugiksuat

Jonah-m Qinnaliutaa suli Godim Naglikkutaa

¹ Jonah iviġaŋiñŋaruq nalautittuakun aasii qinnaliqhuni.

² Tavraasii aŋaiyyuruq, “Ataniiq, tainnaimña uqallaŋitpik aullaŋaiñŋaġma aimmivimñiñ tainnaġumaaqtilaaġnik? Tainnaqłuŋa tavra qimaasapiaŋaruŋa Tarshish-mun! Iḷisimavluŋa piqpaksriruagutilaaġnik suli nagliktuutiqaqtilaaġnik, pikałaktautaił̣ł̣utin, ataramik itqanaił̣ł̣utin isummitqigñiksraġnun tatavsaiñiksrakkaluaġniñ.

³ Tavraasii Ataniiq, iñuggutiga piiġḷi. Tuquguma nakuułhaaqtuq iñuuniksramniñ.”

⁴ Atanġum kiugaa, “Iłuaġnasugiviuŋ tavra qinnaliqavich?”

⁵ Jonah aniŋaruq kiluliñaaŋagun tavraŋŋa iniqpagmiñ aasii aquptaaqhuni. Uqquutaliuŋaruq ilimiñun aasii aquviłłuni taġġaŋanun, utaqqiaqsiruq suna imma piñiaqtilaaŋa Nineveh-mun.

⁶ Tavraasii Ataniq naupkaiŋaruq nauriamik qulaanun Jonah-m taġġiyviksraŋanik, tutqigḷugu itquvlugu. Jonah-m iviġaumagipiallaŋagaa taamna nauruaq.

⁷ Aglaan uvlaakumman uvlaatchaurami, God piraksriimman, qupilġum nauriaq tuqupkaŋagaa.

⁸ Siqiñiq nuiganigman, God uunaqtuamik kiluagnamiñ anuqłiġuqtitchiŋaruq, aasii niaqumiñun siqiñġum uunnaŋata tunŋaruam sayaiqsipiallaŋagaa Jonah. Tuqugumiunnii iluaġiłhaaliŋagaa. “Nakuułhaaqsiruŋa tuquguma iñuuniksramniñ,” uqallaktuq.

⁹ Aglaan God uqallaktuq ilaanun, “Iłuaġnasugiviuŋ tavra qinnaliqavich nauriaq pisigivlugu?” Jonah-m kiugaa, “Qinnaliġumiñaqtuŋa—qinnakpaiḷḷuŋa tuqugaluaġlaŋaunnii!”

¹⁰ Atanġum uqallautigaa, “Nauriaq una nauruaq unnuaġmagu aasii piiġmivḷuni; ilvich savaaġiŋitkaluaġiñ suli naupkaŋitkaluaġiñ—naakkauvva isumaaġutigigiñ!

¹¹ Qanutułhaaq, aasii, nagligiyumiñaqpigu Nineveh, aŋitigiruaq nunaaqqiq. Qanuq uvva, iñuqaqtuq 120,000-tun iñugiaktigiruanik patchisaiḷaanik miqłiqtunik, suli iḷaqaqhutiŋ iñugiaktuanik niġrutinik!”