Jonah-m 3 - Iñupiatun Mumiksat Uqalugiksuat

Jonah-m Kamagigaa Ataniq

¹ Ataniq uqallavsaaŋaruq Jonah-mun.

² Uqaqłuni, “Aullaġiñ Nineveh-mun, iniqpagmun, uqautiyyaġlugich iñuich uqalugmik qaisamnik iliŋnun.”

³ Jonah-m kamagiŋagaa Ataniq aasii Nineveh-mukłuni, iniqpauvił̣ł̣uni piŋasuni uvluni pisuaqtuni tapiglagataġnaqtuq.

⁴ Jonah aullaqiŋaruq iniqpagmun, pisuaganikami uvluq naałługu, uqautinagutiŋagai, “Malġukipiat uvlut pianikpata Nineveh suksraunġiqsauniaqtuq!”

⁵ Tavraasi iñuŋisa Nineveh-m ukpiġiŋagaat Godim kiliktuutigipkaqtaŋa. Sivunniŋarut iluqaġmiŋ niġiŋaiḷaġukłutiŋ, aasii iluqaġmiŋ iñuich kamanautiqaġaluaqamiŋ kamanaiññiqtaugaluaqamiŋ, atiŋarut miitchugnik nalunaiqsaqługu isumalitqiktilaaqtiŋ.

⁶ Umialikpaŋa Nineveh-m tusaakami, makiłłuni aquppiutaqpagmiñiñ, mattaqługu qaliġuani, ativluni miitchugnik, aquvinŋaruq aġranun.

⁷ Kiliktuipkaiŋaruq iñuŋiñun Nineveh-m: “Uvva una piraksriutaa umialgum atanauraŋisalu: Kiñaunnii sumik niġiñiaŋitchuq; iluqaġmiŋ iñuich, niġrutit, suli imnaich niġitquŋisaurut naakkaunnii imiqtuksrauŋitchut.

⁸ Iñupayaat suli niġrutit atiruksraurut miitchugnik. Iluqaġmiŋ iŋiqsruqtuksraurut God-mun suli aġiulugich pigiiḷḷiqutitiŋ suli piaġiitchuat piraġausitiŋ.

⁹ Suagguuq God isummitqigñiaqtuq; suagguuq qinnautini aġiuniaġaa, aasii uvagut tuquŋiḷḷuta!”

¹⁰ Godim tautugniġai qanuq pitilaaŋiññik; tautukkai aġiuŋatilaaŋiññik pigiiḷḷiqutimignik. Tavra tainnaqłuni isummitqiŋaruq suli tatavsaun iliŋiññun sivunniutikkaluni atuŋił̣ł̣ugu.