Jonah-m 2 - Iñupiatun Mumiksat Uqalugiksuat

Jonah-m Aŋaiyyutaa

¹ Jonah aasii aŋaiyyunagutiŋaruq ATANIĠ-mun God-imiñun iḷuaniillaġmi iqaluum:

² “Iłuiḷḷiuġnimni, Ataniiq, ququulaŋaruŋa iliŋnun, aasii ilvich kiuŋagiŋma. Itiruaŋiññiñ nunaŋata tuquŋaruat ququulaŋaruŋa ikayuquvluŋa, aasii ilvich tusaaŋagiŋma.

³ Iginŋagaluaġiŋma itiruanun, natiqpiaŋanun taġium, immat avanŋagaanŋa, qaiḷḷiqpagiraqpich aksraligvigiŋagaanŋa.

⁴ Isumaŋaruŋa iñiqługu igitaunasugaluŋa ilvich takkuġniñ suli taututqigñiaŋiññasugiŋagiga salumaruaq Aŋaiyyuvikpagiran.

⁵ Immat matuvluŋa ipisiapkaŋagaanŋa; taġium samani iḷuaniinŋaruŋa, suli iŋalugaaluich nimmaaŋagaat niaquġa.

⁶ Atchiksuamuŋaruŋa samuŋa maŋŋuŋiññuaglaan iġġich, nunamun upkuaqpaŋich pitchiġiiyaŋaruanun isuitchuamun. Aglaan ilvich, Ataniq God-iiŋ, utqutiŋagiŋma tasamaŋŋa natqaniñ iñuuvluŋa.

⁷ Iñuggutiga uvamniñ piiġruiññaaqsimman, tavra, Ataniiq, aŋaiyyuŋaruŋa iliŋnun, aasii salumaruamiñ Aŋaiyyuvikpagiraġniñ tusaaŋagiŋma.

⁸ Iliŋich aŋaiyyuviqaqtuat suunnauŋitchuanun iñuuraqpagnun uniñŋagaat ukpiqqutiktiŋ iliŋnun.

⁹ Aglaan atuġniaqtuŋa nanġautinik iliŋnun; Qaitchiñiaqtuŋa iliŋnun ikipkautinik suli taŋŋiġñiaġiga unniqsuqłiisigiŋaraġa. Annaun qairuaguruq ATANIĠ-miñ!”

¹⁰ Tavraasii Atanġum piraksriŋagaa tivvuaquvlugu Jonah paliumaruamun nunamun, aasii tivvuaŋagaa.