Jonah-m 1 - Iñupiatun Mumiksat Uqalugiksuat

Jonah-m Kamagiŋitkaa Ataniq

¹ Uvlut iḷaŋanni Atanġum uqallautigaa Jonah iġñiŋa Amittai-m.

² Uqaqhuni, “Aullaġiñ Ninevah-mun, iniqpagmun, kiliktuġlugich; Iḷisimatilaamnik uvva qanutun pigiiḷḷiqirautilaaŋiññik iñuŋich.”

³ Aglaan Jonah, qimaaŋaruq Tarshishmun unitchaqługu Ataniq. Spain-muŋaruq, paqiłłuniasii umiaqpagmik Tarshish-muksaqtuamik. Akiḷiqł̣ugu ikkutiksrani ikuŋaruq, aullaqatigisaqługich Tarshish-mun, qimaummiyumiñaqsivḷuni ATANIĠ-miñ.

⁴ Aglaan Ataniq aullaqtitchiŋaruq suaŋaruamik anuġimik taġiumun, anuġiqłuk suaŋavaił̣ł̣uni anayanniuliŋarut umiaqpaiyaiġniaġniġmun.

⁵ Umiaqpagaqtit iqsiññiulipiaġataŋarut suli ququulavlutiŋ ikayuquvlutiŋ nanmiñiq God-igillaaramignun. Tavraasii anayanniuŋaipayaaqsaqłutiŋ, iginŋagaich usiatiŋ. Tainna pipkaqługich, Jonah atqaŋaruq alliġmun, aasii nallaqhuni siquvluni.

⁶ Qaukłiŋata Umiaqpaum paqitkaa, aasii apiqsruqługu, “Summan immaimña siñiktuaqpich? Makillutin aŋaiyyuiñ God-ignun ikayuqulutin. Iḷaanni nagligiluta annautiviaġaatigut.”

⁷ Umiaqpagaqtit avanmun uqaaqsiñiqsut, “Saaptaġluta, iḷitchuġiyumaugut kiña patchisautilaaŋa anayanniuġniptigni.” Tavraasii tainna piŋarut, aasii Jonah-m atqa amuŋagaat.

⁸ Tavra uqallautigaat, “Ki, aasii, uqallautisigut! Kiña imña patchisauva? Suliqivich imña maani? Kisumiñ nunamiñ qairuatin? Sumiuyaaguvich?”

⁹ “Hebrew-guruŋa,” Jonah-m kiugai. “Qiksiksrautiqaqtuŋa ATANIĠ-mun, God-iŋanun qiḷaum, savaŋaruam nunamiglu taġiumiglu.”

¹⁰ Jonah-m uqallautiniġai qimaatilaamiñik ATANIĠ-miñ. Tavraasii umiaqpagaqtit iqsiḷipiaġataŋarut, aasii uqallautivlugu, “Uvva iłuaŋipiaġataqtuq tainna piñiqavich!” suli apiġivlugu, “Summan uvva qimaaruatin tainna?”

¹¹ Siḷaqłuk suamasisaiññaŋaruq, aasii umiaqpagaqtit apiġigaat, “Qanuq imña piñiaġniqpisigiñ siḷaqłiuŋaiġumaugut?”

¹² Jonah-m kiugai, “Igitchiñŋa taġiumun, anuġaiġumauq. Iḷisimaruŋa patchisautilaamnik uvva siḷaqłukpaguutimmasi.”

¹³ Aglaan, aŋutit tulautiniatanagutiŋagaat umiaqpak, aŋualgutilaamiktun. Aglaan anuġi iŋattaqsisaiññaqhuni, payyiñŋagaat.

¹⁴ Tainnamik ququulanagutiŋarut ATANIĠ-mun, “Ataniiq, tatavsaġnasigut tuqqunmik uuma iñuum iñuggutaa pisigilugu! Ilvich, Ataniiq, aŋalatkiñ tamanna; ilvich savaaġigiñ.”

¹⁵ Tavraasii tiguvlugu Jonah siŋitkaat taġiumun, aasii qaiḷḷiiqsautigillaaŋaruq.

¹⁶ Umiaqpagaqtit tavrani qiksiksralipiallaŋarut ATANIĠ-mik, aasii qaitchivḷutiŋ aitchuunmik suli unniqsuqłiivḷugu savautiniaġnivḷugu.

¹⁷ Ataniq piraksriimman aŋiruam iqaluum iiñiġaa Jonah, aasii iḷuaniinŋaruq iqaluum piŋasuni uvluni suli piŋasuni unnuani.