John 9 - Iñupiatun Mumiksat Uqalugiksuat

Jesus Iłuaqsigaa Ayauŋaruaq Anikamiqaŋa

¹ Iglauvluni, Jesus tautuŋagaa iñuk anikamiqaŋa ayauŋaruaq.

² Aasii iḷitchitquraisa apiġiŋagaat, Rabbi, kiña piḷuksiŋava, una iñuk naagga aŋayuqaak, aniŋaniqpauna ayauŋavluni?

³ Jesus kiuŋagai, Una iñuk piḷuksiŋaitchuq naaggaunnii aŋayuqaaŋik, aglaan tainnaittuq savaaŋa God-im qiñiġnaqsitquvlugu iłuaqsiḷugu.

⁴ Savaktuiññaqtuksraurugut savaaŋiñik tilisiruam uvamnik uvluuŋŋaan. Taaqsimman iñuk savakkumiñaitchuq.

⁵ Sivisutilaaŋatun nunamiinniġma, qaummatauruŋa nunapayaanun.

⁶ Uqaġniallaġmi taavrumiŋa, tivvuaŋaruq nunamun aasii qikuyyalivḷuni tivvuaġunmiñik aasii nanukługik iñuum irrak qikuyyamik,

⁷ uqallautivlugu ilaanun, Aullaġiñ iqaġiyaqtuaġiñ imaqsuanun Siloam, sivuniqaqtuam Tiliramik. Tavra ilaa aullaŋaruq aasii iqaġivluni. Utiŋaruq tautullasivḷuni.

⁸ Siḷalliŋisa tamatkualu tautuktikaaŋisa piatchiaqtaqtauvlugu, uqallausiġiŋagaat, Uvvauna taimñauŋitpa iñuk aquppisuuŋaruaq piatchiaqtaqłuni?

⁹ Iḷaŋich uqallaŋarut, Tavrauruq. Allat uqallaŋarut, Naumi, aglaan taivrumatun uvva inniqsuq. Ilaa uqallaŋaruq, Taimñauruŋa.

¹⁰ Iliŋisa uqallautiŋagaat, Qanuqłutin ayauŋaiqpich?

¹¹ Tavra kiuŋagai, Iñuum atiqaqtuam Jesus-mik qikuyyalivḷuni nanuŋagik irraka uqallautiŋagaaŋa, aullaġiñ Siloam-mun aasii iqaġilutin. Tavra aullaqłuŋa iqaġivluŋa ayauŋaiqsitauŋaruŋa.

¹² Ilaisa apiġiŋagaat, Sumiitpaimma? Ilaan uqallautiŋagai, Naluruŋa.

Pharisees Apiqsruqtuġaat Iłuaqsirauruaq

¹³ Ilaisa qaġġisiŋagaat Pharisee-ñun iñuk sivuani ayauŋaruaq.

¹⁴ Tavra Jew-guruat Savaiññiŋanni Jesus qikuyyaliŋaruq aasii ayauŋaiqł̣ugik irrak.

¹⁵ Pharisees apiġitqiŋagaat qanuqłuni ayauŋaiġmagaan. Aasii uqallautiŋagai, Ilaan iḷiŋagaa qikuyyaq irramnun, aasii iqaġikama tautullasiruŋa.

¹⁶ Iḷaŋich Pharisees uqallaŋarut, Taimña iñuk God-miŋŋaqtuaguŋitchuq, qanuq kamaksriḷaitchuq Savaiññikun pitquranik. Allalli uqallaŋarut, Qanuġluni iñuk piḷuusiqirauruaq piyumiñaqpa tainnatchiñik aliuġnaqtuanik? Tavrani atinġiŋarut.

¹⁷ Tavra Pharisees apiġitqiŋagaat ayauŋaŋaruaq, Qanuġli uqallausiġiviuŋ ilaa ayauŋaiqsinŋammatin? Ilaan kiuŋagai, uqaqtauruq God-mun.

¹⁸ Jew-guruat arguagiŋagaat ayauŋaniŋa suli qiñillasiñiŋa, kiisaimmaa ququaqpaik aŋayuqaak ayauŋaiqsitauruam.

¹⁹ Aasii apiġiŋagaik, Una iġñiġivitku, uqausiġikkaqtik aniŋanivḷugu ayauŋavluni? Qanuqłuni paŋmapak qiñillasiva?

²⁰ Ilaan aŋayuqaaŋikta kiuŋagaich, Iḷisimaruguk una iġñiġigikpuk, aniŋatilaaŋalu ayauŋavluni,

²¹ aglaan nalugikpuk qanuqłuni paŋmapak qiñillasisilaaŋa, naaggaunnii iḷisimaŋitchuguk kimun ayauŋaiqsilaaŋanik. Apiqsruqsiuŋ. Ukiuqtusiŋaruq. Uqautiginiaqtuq inmiñik.

²² Aŋayuqaak uqallaŋaruk tainna sivuuġavlutik Jew-guruanik, qanuq Jew-guruat sivunnianiŋarut atisivḷutiŋ kialiqaa iḷisimanirualikpagu Jesus Christ-guniḷugu, ilaa anitauniaġnivḷugu Jew-guruat aŋaiyyuvianniñ.

²³ Taamna pisigivlugu aŋayuqaak uqallaŋaruk, Ukiuqtusiŋaruq apiqsruqsiuŋ.

²⁴ Tavra igḷuŋagaat qaitquriñiqtiŋ ayauŋaŋaruamik, aasii uqallautivlugu, Uqaġiñ iḷumun ittuamik. God nanġaġuŋ iłuaqsiraukavich. Iḷisimagikput iñuk taimña piḷuusiqirauruq qiñillasipkairuaq iliŋnik.

²⁵ Ilaan kiuŋagai, Piḷuusiqirautilaaŋa nalugiga. Aglaan atausiq iḷisimagiga, ayauŋagaluaqtuaŋaa paŋmapak qiñillasiruŋa.

²⁶ Ilaisa apiġiŋagaat, Qanusiġaqpatin? Qanuqłuni ayauŋaiqsitpatin?

²⁷ Ilaan kiuŋagai, Quliaqtuaġutianiŋasugaavsi, aasii naalaġnisuŋitchusi. Summan tusaatqigukpisiuŋ? Ilivsivsauq iḷitchitquraliutisukpisi ilaanun?

²⁸ Tavra ilaisa kiuŋagaat suammautivlugu, Ilivitkiuvva iḷitchitquraġiniġaatin, aglaan uvagut iḷitchitquraġigaatigut Moses.

²⁹ Iḷisimarugut God-mun uqautisuuŋatilaaŋanik Moses, aglaan taimña iñuk nalugikput sumiñ qaisilaaŋa.

³⁰ Iñuum kiuŋagai, Allayuaġnapaluktuq una naluniqavsiuŋ sumiñ qaisilaaŋa, naaggauvva ayauŋaiŋagaaŋa.

³¹ Iḷisimarugut God naalaġniḷaitchuq piḷuusiqirinun, aglaan kiñaliqaa aŋaiyyuraumman God-mun suli kamagivlugu pisuutaa, God-im naalaġniḷḷagaa.

³² Nuna isagutilġataġmanqaŋa tusaġnaŋaitchuq iñuk aŋmaiñiḷugu irraŋnik iñuum aniŋaruam ayauŋavluni.

³³ Taimña iñuk God-miŋŋaqtuaguŋaitkumi, sumik piyumiñaiñŋagaluaqtuq.

³⁴ Ilaisa kiuŋagaat, Aniŋapiallaktutin piḷuutikun. Aasiuvva iḷisautiniaqsaavisigut? Tavra ilaisa aninŋagaat aŋaiyyuviŋmiñ.

Iñuich Ayauŋaruatullu Tautullaruatullu Ittut

³⁵ Jesus tusaaŋagaa ilaiññun anitilaaŋa, aasii paqiłługu uqallautiŋagaa, Ukpiqpich Iġñiŋanun Iñuum?

³⁶ Ilaan kiuŋagaa, Aŋuun, imma kiuva ukpiġvigiyumagiga?

³⁷ Jesus uqallautiŋagaa, Tautuaniŋagiñ, suli ilaaguruq uqaqtuaq iliŋnun.

³⁸ Tavra ilaa uqallaŋaruq, Ataniiq, ukpiqtuŋa. Suli ilaan qiksiksrautikun sitquġvigiŋagaa.

³⁹ Jesus uqallaŋaruq, Pisigilugu qaiŋaniġa nunamun, iñuich isivġiqsauyumiñaqsirut. Ayauŋaruat qiñillasipkaġmatun ittuq kaŋiqsipkaqtitaummata iḷumun ittuamik. Aasiiḷi tamatkua tautuksiḷḷaruat ayaupkaqtitaummatun kaŋiqsiḷaił̣ł̣ugu iḷumun ittuaq iḷisimagaluakkaqtiŋ.

⁴⁰ Iḷaŋisa Pharisees qanittuat ilaanun tusaaŋagaat taamna, aasii apiġiŋagaat, Uvaguttauq ayauŋammivisa?

⁴¹ Jesus uqallautiŋagai, Ayauŋaguvsi piḷuutaiññiaġaluaqtusi. Aglaan paŋmapak uqaqtusi, Tautullarugut, tavra piḷuutiqaqtusi.