John 8 - Iñupiatun Mumiksat Uqalugiksuat

Aġnaq Allatuqtuaq

¹ Tavra aiyaaŋarut iglullaamiŋnun, aasii Jesus aullaŋaruq Iġġianun Olives.

² Uvlaatchaurami Jesus qaitqiŋaruq aŋaiyyuvikpaŋmun. Iñuich iluqaġmiŋ qaiŋarut ilaanun, aasii aquviłłuni iḷisautiŋagai.

³ Iḷisaurrit pitquranik Pharisees-lu qaġġisiŋagaat aġnaq paqitauruaq allatuqłuni, aasii inillakługu qitiġmun.

⁴ Uqallautiŋagaat ilaa, Iḷisaurrii, una aġnaq paqitauruq allatuqtillugu.

⁵ Moses pitqurani piraksriŋagaatigut tainnasiq uyaġaktautquvlugu. Qanuġli una aġnaq uqallausiġiviuŋ?

⁶ Taamna uqallausiġiŋagaat uuktuaġutigisaqługu ilaanun, piqaġukkaluaqłutiŋ qanutchimik pasisukługu Jesus aġnakun qaġġirraġmikkun. Jesus pułłuni nunamun aglaŋaruq argagmiñik.

⁷ Apiqsruqtuġaluaġmanni, ilaan qiviaŋagai aasii uqallautivlugich, Nallivsi piḷuutaitchuam miḷuqsaqqaaġliuŋ uyaġaŋmik.

⁸ Atausivsaami putqiŋaruq aasii aglakłuni nunamun.

⁹ Tavra tusaakamirruŋ taamna, aullaŋarut atausiullaavlutiŋ, sivulliġivlugu utuqqauniqsraq, aasii Jesus kisiŋŋuqatauŋaruq aġnamun qikaqtuamun sivuqqamiñi.

¹⁰ Jesus qiviaŋaruq aasii uqallautivlugu, Aġnaaq nauŋ ipkua iñuich? Nalliata unnii isivġiŋitpatin suksraunġiqsauyumiñaqsiḷutin?

¹¹ Aġnam kiuŋagaa, Aaŋ Ataniiq. Aasii Jesus uqallautiŋagaa, Uvaŋaptauq isivġiŋitkikpiñ suksraunġiqsauyumiñaqsiḷutin. Aullaġiñ piḷuksitqigñak.]

Jesus Qaumman Iñupayaanun

¹² Jesus uqautivsaaŋagai iñuich uqaqłuni, Uvaŋa qaummatauruŋa iñupayaanun. Iñuk maliktuaq uvamnik pisuaġniaŋitchuq taaqtuami, aglaan pisuaġniaqtuq qaummaġmi iḷitchuġipkaqtitauluni iḷumun ittuakun iñuuniaġniġmik.

¹³ Pharisees uqallautiŋagaat, Quliaqtuaġirutin iliŋnun, uqaluktuaġiran iḷumun inŋitchuq.

¹⁴ Jesus kiuŋagai, Quliaqtuaġaluaġumaunnii uvapkun, uqaluktuaġiraġa iḷumun ittuq, qanuq iḷisimaruŋa sumiñ qaiŋatilaamnik suli sumun aullaġniaqtilaamnik. Aglaan ilivsi nalurusi sumiñ qaiŋatilaamnik naagga sumun aullaġniaqtilaamnik.

¹⁵ Ilivsi isivġiirusi iñugruiññaqtun, uvaŋa isivġiiŋitchuŋa iñuŋmik kimigliqaa.

¹⁶ Isivġiigaluaġmiguma, isivġiutiga iḷumun ittuq, qanuq kisima isivġiiŋitchuŋa, aglaan Aapalu tiliriga isivġiiruguk.

¹⁷ Aglausimaruq pitquravsiññi uqaluktuaŋak malġuk iññuk iḷumun innivḷugu.

¹⁸ Quliaqtuaġiruŋa uvamnun, suli Aapa tilisiruaq uvamnik quliaqtuaqaqtuq uvapkun.

¹⁹ Tavra iliŋisa apiġiŋagaat, Aapan sumiitpa? Jesus kiuŋagai, nalugiptiguk Aapagalu. Iḷitchuġiŋaguvsiŋa iḷisimayumiñaġaluaġmigiksivsauq Aapaga.

²⁰ Taapkua uqaluich ilaan uqautigiŋagai inimi aitchuutiqaġviŋmi, iḷisaurrivḷuni aŋaiyyuvikpaŋmi. Iñuum tigutaalaiñmigaa, qanuq ikarraŋa tikiñŋaił̣ł̣uni.

Aullaġumiñaitchusi Aullaġviksrautimnun

²¹ Jesus uqallautitqiŋagai, Aullaġniaqtuŋa. Ivaġniaġaluaġivsiŋa aasii tuquniaqtusi piḷuusiqiraulusi. Qaiyumiñaitchusi aullaġviksrautimnun.

²² Tavra Jew-guruat uqallaŋarut, Tuqunniaqpa ilimiñik? Uqallaktukkiuvva qaiyumiñaitchusi aullaġviksrautimnun.

²³ Ilaan uqallautiŋagai, Maaŋŋaqtaurusi, uvaŋa paŋmaŋŋaqtauruŋa. Ilivsi qairuagurusi mattumaŋŋa nunamiñ, uvaŋaasii qairuaguŋitchuŋa mattumaŋŋa nunamiñ.

²⁴ Uqallautiŋagivsi tuquniaġnivḷusi piḷuusiqiraulusi. Qanukkiuvva ukpiŋisuaġuvsi Christ-gutilaamnik, tuquniaqtusi piḷuusiqiraulusi.

²⁵ Iliŋisa uqallautiŋagaat, Kiña ilivich? Jesus uqallautiŋagai, Taavrumiŋauruŋa uqallautiŋasugaavsi isuaniñqaŋa.

²⁶ Qanuqinniġaġumiñaġaluaġivsi iḷisautilusiḷu sutigun iñugiaktuatigun, aglaan uqautigivsi iñupayaallu kisianik sunik tusaaŋakkamnik ilaaniñ iḷumun ittuaguruamiñ, tilisiŋaruamiñ uvamnik.

²⁷ Iliŋich kaŋiqsiŋitchut ilaanun uqautitilaamiŋnik Aapakun.

²⁸ Kiisaimmaa Jesus uqallakpuq, Kivianikkuvsiuŋ Iġñiŋa Iñuum iḷitchuġiniaqtusi Christ-gutilaamnik, suli pisuisilaamnik sunik ataniġnaqutipkun aglaan uqaqłuŋa Aapam iḷisaurrutaagun.

²⁹ Aasii tilisiruam uvamnik itqatigigaaŋa. Kisiŋŋuŋaitkaaŋa, qanuq uvaŋa ataramik pisuuruŋa iviġaummatauruanik ilaanun.

³⁰ Uqaġman tamatkuniŋa, iñugiaktuat ukpiliŋarut ilaanun.

Kivgauŋitchuallu Kivgallu

³¹ Jesus tavra uqallaŋaruq Jew-guruanun ukpiliqsuanun inmiñun, Iḷitchitquraġipiaġivsi kamagituiññaġuvsigik uqalutka,

³² aasii iḷitchuġiniaġiksi iḷumun ittuaq, suli iḷumun ittuam atanġiqsinniaġaasi.

³³ Ilaisa kiuŋagaat, Uvagut maŋŋuqaqtugut Abraham-mik, aasii kivgauŋaitchugut kimulliqaa. Qanuqłutin uqallakpich, Atanġiqsitauniaqtusi?

³⁴ Jesus kiuŋagai, Iḷumutupiaġataq uqallautigivsi, iñupayaaq piḷuusiqiruaq kivgauruq piḷuunmun.

³⁵ Kivgałhiñauruaq-aasii nayuutiłhaiññalaitchuq igluani ataniġmi isuitchuamun, aglaan atanġuruam iġñiŋa nayuutiruq isuitchuamun.

³⁶ Tavra Iġñiġum atanġiqsitpasi, ilivsi atanġiqsitauniaqtusi nalupqinaitchuamik.

³⁷ Iḷisimagivsi maŋŋuqaqtilaavsiññik Abraham-mik, naaggauvva tuqurviksraqsiuġivsiŋa qanuq ukpiġiŋitkisi uqalutka.

³⁸ Uqautiqaqtuŋa tautuŋaramnik Aapamniinnama, aasiiḷi ilivsi piusi tusaaŋaravsiññik aapavsiññiñ.

³⁹ Ilaisa kiuŋagaat, Abraham aapagigikput. Jesus uqallautiŋagai, Ilivsi Abraham miqłiqtuġikpasi, piyumiñaġaluaqtusi Abraham piraiñik,

⁴⁰ aasii paŋmapak tuqurviksraqsiuġivsiŋa, iñuk uqaurriruaq ilivsiññik iḷumun ittuamik tusaaŋakkamnik God-miñ. Tainna piŋaitchuq Abraham.

⁴¹ Ilivsi piusi aapavsi piŋaraŋanik. Tavra uqallautiŋagaat, Uvagut aapaiḷḷiaguŋitchugut. Aapaqaqtugut atautchimik God-mik.

⁴² Jesus uqallautiŋagai, God Aapagiguvsiuŋ, piviuttaġiniaġaluaġivsiŋa. Qaiŋaruŋa God-miñ aasii paŋmapak maaniittuŋa. Qaiŋaitchuŋa uvaptuġruiññaq, aglaan God-im tiliŋagaaŋa.

⁴³ Summan kaŋiqsiḷaitpisiuŋ uqautigikkaġa? Qanuq uqalumnik naalaġniḷguitchusi.

⁴⁴ Tuunġaq aapaksi, aasii pisuutigigiksi pisukługu aapavsi kipiġniuġutaa. Ilaa iñuaqtauruq aullaqisaamiñqaŋa, suli suksraġiŋitkaa iḷumun ittuaq, qanuq iḷumun ittuagitchuq ilaani. Saglukami ilaa uqaqtuq nanmiñiq irrutchimiñiñ, qanuq sagluturuq suli aapauruq sagluruanun.

⁴⁵ Aglaan uvva ukpiġiŋitkivsiŋa uvaŋa uqaqtuaŋaa iḷumun ittuamik.

⁴⁶ Nallivsi qanuqpisiiḷḷiyumiñaitkaaŋa piḷuusiqiniḷuŋa. Summan aasii ukpiġisuŋitpisiŋa uqautikavsi iḷumun ittuamik?

⁴⁷ Iñuum piruam God-miñ kaŋiqsigai uqaluŋi God-im. Ilivsi piŋił̣ł̣usi God-miñ kaŋiqsiḷaitkisi tamatkua.

Jesus-lu Abraham-lu

⁴⁸ Jew-guruat kiuŋagaat, Nalauttugut uqallakapta Samaria-ġmiugunivḷutin aasii ilitqusiqł̣uqaqtutin.

⁴⁹ Jesus kiuŋagai, Ilitqusiqł̣uitchuŋa. Aglaan iviġaumagiga Aapaga kamagivlugu, aasiiḷi ilivsi suksraġiŋitkivsiŋa.

⁵⁰ Nanġaqtinniataŋitchuŋa iñuŋnun. Imma kamanaqsipkaiñiaqtuaqaqtuq uvamnik nalaunŋaruakun isivġiiruamik.

⁵¹ Iḷumutupiaġataq uqallautigivsi, kialiqaa kamagikpagich uqalutka tuquyumiñaipiaqtuq.

⁵² Jew-guruat uqallautiŋagaat, Paŋmapak iḷitchuġirugut ilitqusiqł̣uqaqtilaaġnik. Abraham tuquŋaruq, uqaqtiŋiḷu God-im, aasii ilivich uqallaktutin, kialiqaa kamagikpagich uqaluktin tuquyumiñaipiaġnivḷugu.

⁵³ Kamanałhaaqpich aapaptiŋniñ Abraham-miñ tuquŋaruamiñ? Suli uqaqtiŋi God-im tuquŋammiut. Kiunasugivich uvva?

⁵⁴ Jesus kiuŋagai, Kamanaqsiḷiġuma uvamnik, kamanaqsiḷġutiga suuŋitchuq. Aapama kamanaqsiḷġusiaqaqtitkaaŋa, taavruma uqautigikkavsi God-iginivḷugu ilivsi.

⁵⁵ Aasii ilaa nalugiksi aglaan iḷisimagiga. Uqallakkaluaġuma naluniḷugu, saglurauniaġaluaġmiuŋa ilivsisun. Aglaan iḷisimagiga suli kamagivlugich uqaluŋi.

⁵⁶ Aapari Abraham quviatchaŋaruq tautukkumaaġniqamiuŋ niptaġniksraġa. Paŋmapak tautuŋagaa qaisilaaġa aasii quyatchaŋaruq.

⁵⁷ Tavra Jew-guruat uqallautiŋagaat, 50-nik ukiuniŋaitchutin suli, aasii tautuŋaviuŋ Abraham?

⁵⁸ Jesus uqallautiŋagai, Iḷumutupiaġataq uqallautigivsi, iñuusaŋaiñŋaan Abraham, Inŋaruŋa.

⁵⁹ Taamna uqallausiġimmagu, tigusiŋarut uyaġagnik miḷḷuuġukługu qanuq inmiñik nalliummatirualiñivḷugu God-mun. Tavra Jesus iriŋaruq, aasii anivḷuni aŋaiyyuvikpaŋmiñ.