John 7 - Iñupiatun Mumiksat Uqalugiksuat

Jesus-lu Nukaaluuniḷu

¹ Taavruma aquagun Jesus kukiḷuŋaruq Galilee-mi. Kukiḷuguŋiñŋaruq Judea-mi, qanuq Jew-guruat tuqurviksraqsiuŋagaat.

² Tavra Jew-guruat niqinaqiviat tupiġni tikiyasiŋaruq.

³ Tavra Jesus nukaaluŋisa uqallautiŋagaat, Aullaġiñ maaŋŋa aasii Judea-muglutin, iḷitchitquratin taamani qiñiġumaut savaanik pikkaġnik.

⁴ Qanuq iñulimaaq nalunautchiḷuni savalaitchuq iḷisimatqugumi salapqiruakun. Tamatkua savaaġikapkich, salapqiġiñ iliŋnik iñupayaanun.

⁵ Qanuq nukaaluŋi unnii ukpiŋaitchut ilaanun.

⁶ Jesus uqallautiŋagai, Nalautinŋaitchuq aullaġviksraġa. Aglaan ilivsi aullaġumiñaqtusi qakuguliqaa,

⁷ qanuq nunam iñuŋisa uumigiŋitkaasi. Aglaan uvaŋa nunam iñuŋisa uumigigaanŋa, qanuq uqautigaluamiiġuugitka ilaisa piḷġusiŋich pigiiññivḷugich.

⁸ Ilivsi niqinaqiyaqtuġitchi. Uvaŋa niqinaqiyaqtuŋitchuŋa paŋmapak, qanuq nalautinŋaitchuq suli aullaġviksraġa.

⁹ Tainna uqallaqqaaqłuni, Galilee-miinŋaruq suli.

Jesus Aullaqtuq Niqinaqiruanun Tupiġni

¹⁰ Tavra nukaaluŋi aullaaniŋmata niqinaqiyyaqłutiŋ, Jesus-tauq aullaŋammiuq nalunautchivḷuni.

¹¹ Jew-guruat ivaġaluaŋagaat niqinaqiviŋmi uqaqłutiŋ, Sumiitpaimña?

¹² Iñuich atqunaqługu uqamayuutigiŋagaat avanmun, iḷaŋich uqaqłutiŋ, Iñulluatauruq. Allalli uqaŋarut, Naumi, ilaa asiñuurriruq iñuŋnik.

¹³ Tavra sivuuġavlutiŋ Jew-guruanik, iñuich uqaġiŋagaat nalunautchivḷutiŋ.

¹⁴ Niqinaqivik qitiqquiḷivalliġman, Jesus aŋaiyyuvikpaŋmuŋaruq aasii iḷisaurrivḷuni.

¹⁵ Jew-guruat aliuŋarut iḷisaurrutaagun uqaqłutiŋ, Qanuqłuni una iñuk iḷisimatigiva iḷisaurriqaŋaitkaluaŋŋaġmi?

¹⁶ Jesus kiuŋagai, Iḷisaurrutiga uvaŋa pigiŋitkiga, aglaan pigigaa tilisiruam uvamnik.

¹⁷ Kiñaliqaa pisukkumi tuvraġuglugu God-im pisuutaa, ilaa iḷisimayumiñaqtuq iḷisaurrutiga God-miŋŋaqtautilaaŋanik naaggaqaa uvamniġruiññaq.

¹⁸ Iñuk iḷisaurriruaq ilaan isummatimiñik ivaqłiaruq nanġausiaksramiñik iñuŋniñ, aglaan taamna ivaqłiaruaq nanġausiaksraŋanik God-im tilirimi iḷumun ittuaguruq nalaunŋaruġlu.

¹⁹ Moses aitchuŋaitpasi pitquranik? Naaggauvva nallivsiunnii kamagiŋitkai pitqurat. Summan tuqurviksraqsiuqpisiŋa?

²⁰ Iñuich kiuŋagaat, Ilitqusiqł̣uqaqtutin. Kia tuqurviksraqsiuqpatin?

²¹ Jesus kiuŋagai, Piŋaruŋa atautchimik savaamik, aasii iluqasi aliuġiŋagiksi.

²² Moses piraksriŋagaasi nukatpiaġruich nalunaiñŋutchiqsuksrauvlugich. Nalunaiñŋutchiqsauviksraŋat miqłiqtut uvluq nalaurrutimman Savaiññiġmun nalunaiñŋutchiqsisuurusi Savaiññiġmi. Isagutiŋaitkaluaġmiuq taamna pitquraq Moses-miñ, aglaan maŋŋuuvsiññiñ sivuani Moses.

²³ Nalunaiñŋutchiḷḷakavsiuŋ nukatpiaġruk Savaiññiġmi, Moses pitquraŋi naviguŋił̣ł̣ugich, summan qinnautivisiŋa pisigivlugu iłuaqsikapku iñuum timaa surruipiaqługu Savaiññiġmi?

²⁴ Isivġiiñasi qiññałhiñakun, aglaan isivġiisitchi nalaunŋaruakun.

Ilaa Christ-guva?

²⁵ Iḷaŋich Jerusalem-miut uqallaŋarut, Tavrauŋitpauna iñuk tuqurviksraqsiukkaŋat?

²⁶ Aasiuvva maaniittuq, uqaqtuq salapqiruami, aasii qanuq nivliutilaitkaat. Iḷaanniipkua ataniġnaqusiraqtuat iḷitchuġipiaġisiuraaġaat Christ-gutilaaŋanik.

²⁷ Christ niptaqpan kiñapayaaq iḷisimayumiñaitchuq sumiñ qaisilaaŋanik, aglaan una iñuk iḷisimagikput sumiñ qaisilaaŋanik.

²⁸ Tavra Jesus iḷisaurrivḷuni aŋaiyyuvikpaŋmi nipatuvluni uqallaŋaruq. Iḷisimagivsiŋaliqaa sumiñ qaisilaamnik. Aglaan qaiŋaitchuŋa uvaptuġruiññaq. Ilaa tilisiruaq uvamnik iḷumun ittuq. Ilivsi nalugiksi.

²⁹ Uvaŋaaglaan iḷisimagiga, qanuq qairuŋa ilaaniñ, suli ilaan tiliŋagaaŋa.

³⁰ Tavra tigutaaġviksraqsiurraqsiŋagaat, aasii kialiqaa tiguŋaitkaa, qanuq aitchuutauviksraŋa tikiñŋaitchuq.

³¹ Aasiivsauq iñugiaktuat iñuich ukpiliŋarut ilaanun, uqallakłutiŋ, Christ niptaġumi pił̣hamaniaqpa aliuġnaqtuanik uuma iñuum piŋaraŋiñiñ?

Tigurit Tiliraurut Tigutaaquvlugu Jesus

³² Tavra Pharisees tusaakamisigik iñusalaich uqautiqaqtuat Jesus-mik, iliŋich aŋaiyyuliqsiqpaiḷḷu tilisiŋarut tigurinik tigutaaquvlugu.

³³ Jesus uqallaŋaruq, Nayuvsaallagniaġivsi aasii aullaġluŋa tilirimnun.

³⁴ Ivaġniaġaluaġivsiŋa aasii paqinniaŋitkivsiŋa, aullaġviksrautimnun qaiyumiñaiñmiusi.

³⁵ Tavra Jew-guruat uqaurrutiŋarut avanmun, Sumuaqsivauna uvaptiŋnun paqitchumiñaiġḷuni? Ilaa sivuniqaqpa aullaġumavluni Jew-guŋitchuat nunaŋiññun, siaminŋaruat Jew-guruat iñuuviŋiññun, aasii iḷisautilugich Jew-guŋitchuat?

³⁶ Sumik sivuniqaqpauŋ uqallakami, Ivaġniaġaluaġivsiŋa paqitchumiñaitkivsiŋa? Sumik suli sivuniqaqpauŋ, Aullaġviksrautimnun qaiyumiñaitchusi?

Kuuŋi Iñuunaqtuam Imġum

³⁷ Aqulliġmi uvluani niqinaqivium, naumaniqsrami uvlumi, Jesus makinŋaruq aasii nipatuvluni uqallakłuni, Kiñaliqaa imiġuliġumi, qaiḷuni uvamnun imiġli.

³⁸ Innauvva Bible uqaluŋich uqaqtut iñukun ukpiqtuakun uvamnun, Iḷuaniñ maqiniaqtut kuuŋi iñuunaqtuam imġum.

³⁹ Tavra taamna uqallausiġiŋagaa sivuniqaqługu Ilitqusiġiksuamik, tamatkua ukpiqtuat ilaanun aitchuusiaġiyumaakkaŋat, qanuq Ilitqusiġiksuaq aitchuutauganiŋaitchuq suli, Jesus aŋipkaqtauŋaił̣ł̣uni utiqtitauŋaił̣ł̣uniḷu qiḷaŋmun.

Atiŋirrun Iñuŋni

⁴⁰ Tusaakamisigik taapkua uqaluich, iḷaŋich iñuich uqallaŋarut, Una uqaqtigipiaġaa God-im qaiyumaaqtuaq sivuani Christ.

⁴¹ Allalli uqallaŋarut, Ilaa Christ-gupiaqtuq. Aglaan iḷaŋich uqallaŋammiut, Christ qaiyumaaqpa Galilee-miñ?

⁴² Bible uqaluŋich uqaŋaitpat Christ maŋŋuqaġnivḷugu David-mik, aasii qaiḷuni Bethlehem-miñ, nunaaqqimiñ David iñuuvigiŋaraaniñ?

⁴³ Tavra atinġiŋarut iñuich ilaa pisigivlugu.

⁴⁴ Iḷaŋisa tigutaaġumalliŋagaluaġaat, aglaan iñuum tiguŋaitkaa.

Ukpiġutairrutaat Jew-guruat Aullarriŋisa

⁴⁵ Tavra tiguriŋich utiŋarut aŋaiyyuliqsiqpagnun Pharisee-ñullu, uqallautipkaqłutiŋ aasii, Summan qaġġisiŋitpisiuŋ?

⁴⁶ Tigurit kiuŋagaich, Qaŋaunnii iñuk uqaŋaitchuq taavrumatun iñuktun.

⁴⁷ Pharisees kiuŋagaich, Asiñuurrauvisivsauq ilivsi?

⁴⁸ Nalliŋich ataniġnaqusiraqtuat naagga Pharisee-ñiñ ilaanun ukpiliŋavat?

⁴⁹ Aglaan makua iñuaġruich asiñuurraurut naluvlugich pitqurat iḷisimakkavut uvagut. Iliŋich suksraunġiqsauyumaaqtut.

⁵⁰ Nicodemus, sivuani uqaqatiqaŋaruaq Jesus-mik, iḷagikkaŋat Pharisees, uqallaŋaruq ilaiññun,

⁵¹ Pitqurapta isivġiqusuuvarruŋ iñuk uqaqtitqaaŋaunnagu suli iḷitchuġigaluaġnagu sumik piŋatilaaŋa?

⁵² Ilaisa kiuŋagaat, Ilivitchauq Galilee-miñ pimmivich? Taiguammaġiksaaġiñ Bible-niñ iḷitchuġiyumautin uqaqtaa God-im iñukpalliġumaaŋisilaaŋanik Galilee-miñ.