John 4 - Iñupiatun Mumiksat Uqalugiksuat

Jesus-lu Aġnaġlu Samaria-ġmiu

¹ Pharisees tusaaŋarut Jesus iḷitchitquraukkałhaaqsiñivḷugu paptaiqsił̣haaġnivḷugulu John-miñ. (

² Ilaa ami Jesus paptaiqsiŋitkaluaqtuq, aglaan iḷitchitquraŋi kisimiŋ.)

³ Tavra Jesus tusaakami taavrumiŋa, qimaŋagaa Judea aullatqikł̣uni Galilee-mun,

⁴ aasii ilaa Samaria-kuaqtuksrauŋaruq.

⁵ Tavra tikiñŋaruq iniqpaŋmun, atiliŋmun Sychar-mik, Samaria-miittuami qanittuaq nautchiaqaġviŋmun Jacob aitchuutigiŋaraanun iġñiġmiñun Joseph-mun.

⁶ Jacob nivviaŋa tavraniinŋaruq, aasii Jesus piḷaiqł̣uni iglauvlutiŋ aquptaaŋaruq saniġaanun nivviam, uvluq qitiqqaqpalliŋman.

⁷ Aġnaq Samaria-ġmiu imiqtaŋaruq aasii Jesus uqallautiŋagaa, Imiksriñŋa.

⁸ Iḷitchitquraŋi iniqpaŋmuŋarut tauqsiġiaqłutiŋ niqiksramiŋnik.

⁹ Tavra Samaria-ġmium aġnam kiuŋagaa, Qanuġimña ilivich Jew-guruatiin qasiḷivich imiksraġnik uvamniñ, aġnamiñ Samaria-ġmiumiñ? Qanuq Jew-guruat piñiaqatiqalaitchut Samaria-ġmiunik.

¹⁰ Jesus kiuŋagaa, Iḷisimaŋagupku suutilaaŋa aitchuutaa God-im, suli kiutilaaŋa qasiḷiruaq iliŋniñ imiksritquvluni, tavra qasiḷiqqaaġumiñaŋagaluaqtutin ilaanun aasii aitchuġumiñaŋagaluaġaatin iñuunaqtuamik imiġmik.

¹¹ Aġnam uqallautiŋagaa, Aŋuun, imiqtautiksraitchutin, nivviam imġa atchiksuq. Sumiñ piyumiñaqpiuŋ taamna iñuunaqtuaq imiq?

¹² Kamanałhaaqpich maŋŋuptiŋniñ Jacob-miñ? Ilaan aitchuŋagaatigut uumiŋa nivviamik imiġvigisuuŋaraġmiñik iġñiŋisalu pamiqsaaŋisalu.

¹³ Jesus kiuŋagaa, Iñupayaaq imiqtuaq uumaŋŋa imiġmiñ, imiġulitqigñiaqtuq,

¹⁴ aglaan kiñapayaaq imiqtuaq imiġmiñ aitchuutiginiakkamniñ imiġulitqigñiaŋitchuq. Imiq aitchuutiginiakkaġa ilaanun, nivviatun imaiḷaitchuatun inniaqtuq iḷuani iñuupkaġlugu isuitchuamun.

¹⁵ Aġnam uqallautiŋagaa, Aŋuun, aitchuŋŋa taavrumiŋa imiġmik, imiġuliŋitchumauŋa imiqtallaiġḷuŋalu uvuŋa.

¹⁶ Tavra Jesus uqallautiŋagaa, Aullaġlutin qaitquyaqtuaġuŋ uiñ, aasii utiġlutik uvuŋa.

¹⁷ Aġnam kiuŋagaa, Uigitchuŋa. Jesus uqallautiŋagaa, Nalauttutin uqallakkavich uigiññivḷutin,

¹⁸ qanuq uiqaŋagaluaqtutin tallimanik, aasii taamna paŋmapak pigikkan uigiŋitkiñ. Tainna uqallakkavich nalauttutin.

¹⁹ Tavra aġnam uqallautiŋagaa, Aŋuun, iḷitchuġiruŋa uqaqtautilaaġnik God-mun.

²⁰ Maŋŋuvut Samaria-ġmiut aŋaiyyusuurut uumani iġġimi, aasiiḷi ilivsi Jew-guruasii uqaġuurusi Jerusalem-mi iñuich aŋaiyyuruksraunivḷugich.

²¹ Jesus uqallautiŋagaa, Aġnaaq, ukpiġiŋŋa, piviksraq qaiḷiqtuq aŋaiyyuvigiŋaiġñiaġmarruŋ Aapa uumani unnii iġġimi, naaggaunnii Jerusalem-mi.

²² Ilivsi Samaria-ġmiuguruasii iḷisimapiaŋitkiksi aŋaiyyuvigikkaqsi. Uvagut Jew-guruaguut iḷisimagikput aŋaiyyuvigikkaqput, qanuq annautiksraŋat iñuich kaŋiqaqtuq Jew-guruaniñ.

²³ Piviksraq qaiḷiqtuq paŋmapaglu itaniktuq, iḷumutun aŋaiyyurit aŋaiyyuviginiaġmarruŋ Aapa, qaałhiñakun piraġausiŋiḷaatigun, aglaan ilitqutchikun iḷumun ittuakullu. Qanuq tainna piruanun God aŋaiyyuvigitquruq.

²⁴ God ilitqusiuruq, aasii tamatkua aŋaiyyuruat ilaanun aŋaiyyuruksraupiaqtut ilitqutchikun iḷumun ittuakkullu.

²⁵ Aġnaq uqallaŋaruq ilaanun, Iḷisimaruŋa Messiah taggisiqaqtuaq Christ-mik qaiyumaaqtuq. Aasii qaigumi quliaqtuaġutiniaġaatigut supayaanik.

²⁶ Tavra Jesus kiuŋagaa, Uvaŋa uqaqtuaŋaa iliŋnun ilaaguruŋa.

²⁷ Tavrani iḷitchitquraŋi qaiŋarut. Niġiiḷḷaqtauŋarut ilaan uqaqatigimammagu aġnaq, aglaan nalliat unnii apiqsriŋaitchuq, Susukpich? naagga, Summan uqaqatigiviuŋ aġnaq?

²⁸ Tavra aġnam qimaŋagaa qattani, aasii aivḷuni iniqpaŋmun, aasii uqallautiŋagai iñuich,

²⁹ Qaiḷusi tautugiaqsiuŋ iñuk uqaurriga supayaanik piŋaramnik. Christ-guŋitkaluaqpa?

³⁰ Tavra iliŋich aullaŋarut iniqpaŋmiñ, aasii qaivḷutiŋ Jesus-mun.

³¹ Aġnaq aullaaniŋman, iḷitchitquraŋisa uqallautiŋagaat, Rabbi, niġġiiñ.

³² Tavra ilaan kiuŋagai, Niqiqaqtuŋa niġiramnik nalukkavsiññik.

³³ Tavra iḷitchitqurat apiqsruqtuutiŋarut, Iñuum una qaġġirriŋavauŋ niqiksraŋanik?

³⁴ Jesus uqallautiŋagai, Niqigauvva kamagilugu pisuutaa tilisiruam uvamnik, suli naatchiḷuŋa savaaŋanik.

³⁵ Uqaġuurusi inna, kivriviksraq nautchianik tikiññiaqtuq sisamat tatqich pianikpata. Uvaŋaliasii uqallautigivsi, aaġluġlusi tautuksigik avva iñuich ittut palauvaksratun nauganiktuatun kivraksraġuqłutiŋ katillugiḷḷu.

³⁶ Iñuktun kivrikami katitchikamiḷu palauvaksranik akiññaktuatun aasii quviasuqatigivlugu nautchirriiŋaruaq, tainnatuttauq iñuk ukpiqtitchiruaq iñuŋnik uvamnun, akiññagniaġmiuq isuitchuamun, suli quviasuqatigilugu quliaqtuaqtuaq sumulliqaa tusaayugaaġiksuanik.

³⁷ Innauvva uqaluusuuruaq nalautitchuuruq. Iñuum igḷua nautchirriiruq palauvaksranik, aasiiḷi alla kivrivḷuni katitchivḷuniḷu palauvaksranik.

³⁸ Tiliŋagivsi quliaqtuaġitquvlugu tusaayugaaġiksuaq. Ittusi iñuktitun kivriruatun katitchivḷutiglu palauvaksranik ilivsi nautchirriutigiŋisavsiññik. Allat iñuich nautchirriiŋarut, aasiiḷi ilivsi piqasiutivlusi savaaŋannun.

³⁹ Iñugiaktuat Samaria-ġmiut iniqpaŋmiñ ukpiŋarut Jesus-mun, aġnaq quliaqtuaġman inna, Ilaan uqautiŋagaaŋa supayaanik piŋaramnik.

⁴⁰ Tavra Samaria-ġmiut qaikamiŋ ilaanun, apiġiŋagaat Jesus itqatigitquvlutiŋ, aasii uvliŋaruq malġuŋni uvluŋni.

⁴¹ Aasii iñugiavsaaqtuat ukpiliŋarut pisigivlugich uqaluŋi.

⁴² Tavra uqallautiŋagaat aġnaq, Ukpiliŋaitchugut uqaluktin pisigigiññaġlugich, qanuq naalaġniŋagikput uvaptiŋnik, aasii iḷitchuġirugut ilaa iḷumutun Annaurriginiġaat iñuich.

Jesus Iłuaqsigaa Ataniġnaqutiqaqtuam Iġñiŋa

⁴³ Pianiŋmaŋnik uvluk malġuk ilaa aullaŋaruq Galilee-mun.

⁴⁴ Jesus uqallaŋaruq, God-im uqaqtaa nanġausiaqalaitchuq ilaan nunamiñi.

⁴⁵ Tavra tikiñman Galilee-mun, Galilee-ġmiut paġlaŋagaat, tautuŋavlugich iluqaisa savaaŋi Jerusalem-mi niqinaqimmata, qanuq iliŋitchauq niqinaqiyaqtuŋavlutiŋ.

⁴⁶ Tavra Jesus Cana-mutqiŋaruq Galilee-miittuamun, imiġmik wine-guqtitchiviŋmiñun. Aasii Capernaum-mi ataniġnaqutilgum iġñiŋa naŋinniqsuq.

⁴⁷ Tusaakamiuŋ Jesus qaiñivḷugu Judea-miñ Galilee-mun, aullaqłuni apiġiŋagaa Jesus qaitquvlugu Capernaum-mun, aasii iłuaqsiḷugu iġñini tuquaqsiruaq.

⁴⁸ Tavra Jesus uqallautiŋagaa, Tautuŋisuaġuvsi aliuġnaqtuanik nalupqinaiyautinik kiutilaamnun, ukpiġumiñaitchusi.

⁴⁹ Ataniġnaqutilgum uqallautiŋagaa, Aŋuun, qaiñasuaġiñ miqłiqtuġa tuquŋaiñŋaan.

⁵⁰ Jesus uqallautiŋagaa, Aggiiñ, iġñiġiñ iñuuniaqtuq. Tavra iñuum ukpiġiŋagaa uqaluk Jesus uqallautaa inmiñun, aasii aullaqłuni.

⁵¹ Aiñiaqtillugu, kivgaŋisa paaŋagaat aasii uqallautivlugu iġñiŋa iñuunivḷugu.

⁵² Tavra apiġiŋagai qavsiñuŋman iłuaqsiñmuksaġmagaan aasii kiuŋagaat, Ikpaksraq uanukłaaġman uunnautaiŋaruq.

⁵³ Aapaŋa iḷisimaŋaruq tainnaiḷimman Jesus uqallaŋatilaaŋanik inmiñun, Iġñiġiñ iñuuniaqtuq. Tavra ilaa ukpiliŋaruq, igluqatipayaaniḷu.

⁵⁴ Tavra taamna igḷua aliuġnaqtuam Jesus piraata qaikami Judea-miñ Galilee-mun.