John 3 - Iñupiatun Mumiksat Uqalugiksuat

Jesus-lu Nicodemus-lu Kasimaruk

¹ Tavra iñuk inŋaruq Pharisee-guruaq atiqaqtuaq Nicodemus-mik, atanauraq Jew-guruani.

² Taamna iñuk qaiŋaruq Jesus-mun unnuami aasii uqallautivlugu, Rabbi, iḷisimarugut iḷisaurrautilaaġnik qairuaq God-miñ, qanuq kialiqaa piyumiñaitkai tamatkua aliuġnaqtuat nalupqinaiyautauruat savaaġiratin, God-im itqatigiŋisuaqpani.

³ Jesus kiuŋagaa, Iḷumutupiaġataq uqallautigikpiñ. Iñuk anitqiŋisuaġumi, iḷitchuġiyumiñaitchuq God-im atanniqsimmataanik.

⁴ Nicodemus uqallaŋaruq ilaanun, Qanuġluni iñuk aniyumiñaqpa utuqqalikami? Isitqikkumiñaqpa aakami iḷuanun aasii aniḷuni?

⁵ Tavra Jesus kiuŋagaa, Iḷumutupiaġataq uqallautigikpiñ. Iñuk aniŋisuaġumi imikun Ilitqusiġiksuakullu, isiġumiñaitchuq God-im atanniqsimavianun.

⁶ Tamatkua aniruat iñuŋniñ iñugruiññaurut. Tamatkualiasii kisiisa Ilitqusiġiksuam anitqiksitaŋi iñuuniaqtut Ilitqusiġiksuatun.

⁷ Aliuġnak uqallautikapkiñ inna, Anitqiksuksraupiaqtutin.

⁸ Anuġi anuqłiġuuruq suŋnamun pisukami, aasii tusaallagiñ anuġivaalua, aglaan nalurutin sumiñ qaisilaaŋanik naagga sumun aullaqtilaaŋanik. Tainnatun ittuq iñupayaaq aniruaq Ilitqusiġiksuakun.

⁹ Nicodemus uqallaŋaruq ilaanun, Qanuġluni taamna piyumiñaqpa?

¹⁰ Tavra Jesus kiuŋagaa, Iḷisaurraugaluaqłutin Israel-nun taamna kaŋiqsiḷaitpiuŋ?

¹¹ Iḷumutupiaġataq uqallautigikpiñ. Uqautiqaqtugut iḷisimaraptiŋnik suli iḷitchuġipkairugut tautuŋakkaptigun, aasii akuqtuŋitkisi uqaluktuavut.

¹² Uqautiŋagupkiñ nunamiŋŋaqtauruanik aasii ilivich arguagivlugich, qanuġlutin ukpiġiyumiñaqpigich quliaqtuaġutigupkiñ qiḷaŋmiŋŋaqtauruanik?

¹³ Kiñaliqaa mayuŋaitchuq qiḷaŋmun aglaan taamna atqaŋaruaq qiḷaŋmiñ, Iġñiŋa Iñuum.

¹⁴ Aasii Moses kiviŋmatun nimiġiaq nunagluktuami, tainnatun Iġñiŋa Iñuum kiviktaksraupiaqtuq,

¹⁵ kiñaliqaa ukpiqtuaq ilaanun iñuggutiqaquvlugu isuitchuamik.

¹⁶ God-im piviuttaġivaił̣ł̣ugich nunam iñuŋi aitchuutigiŋagaa Iġñitualuni, kiñaliqaa ukpiqtuaq iġñiŋanun tammaquŋił̣ł̣ugu aglaan iñuggutiqaquvlugu isuitchuamik.

¹⁷ Qanuq God-im tiliŋaitkaa Iġñiq nunamun isivġiqsigitqulugu nunam iñuŋiñun, aglaan annaurrigitquvlugu.

¹⁸ Iñuk ukpiqtuaq ilaanun isivġiqsauŋitchuq. Iñuk ukpiŋitchuaq isivġiqsauganiktuq, qanuq ukpiŋaitchuq Iġñitualuanun God-im.

¹⁹ Aasii iñuich isivġiqsaurut qanuq qaummaq qaiŋagaluaqtuq nunamun, aasii iñuich piviuttaġiłhaaġaat taaqtuaq qaummaġmiñ qanuq piḷġusiŋich pigiitchuaguvlutiŋ.

²⁰ Qanuq iñupayaam piḷġusiqaqtuam pigiitchuamik uumigigaa qaummaq, suli qaiḷaitchuq qaummaġmun, piḷġusiñi satqummiġasugalugich.

²¹ Aglaan iñuk iñuusiqaqtuaq iḷumun ittuamik qairuq qaummaġmun, iñuusiñi salapqiquvlugu qaummaġmun kamaksrisilaamiñik God-mik.

Jesus-lu John-lu Paptaiqsi

²² Taavsruma aquagun Jesus iḷitchitquraniḷu aullaŋarut Judea-mun, aasii tavraniinŋaruq itqatigivlugich iḷitchitqurani suli paptaiqsivḷuni.

²³ John-tauq paptaiqsiŋammiuq Aenon-mi qaniŋani Salim, qanuq ayuġnaiñŋaruq imiq tavrani. Iñuich qaiŋarut tavruŋa aasii paptaiqsauvlutiŋ,

²⁴ qanuq John tigutaaqtauŋaił̣ł̣uni suli.

²⁵ Tavra Jew-guruaq John-lu iḷitchitquraŋi uqavaaŋarut pisigivlugu salummaqtauniq aŋaiyyuliqiniġmi.

²⁶ Tavra qaiŋarut John-mun aasii uqallautivlugu, Rabbi, taimña iñuk piqatauŋaruaq iliŋnun taavanitchiani Jordan iḷitchuġipkaŋaran iñuŋnun, amma paptaiqsiruq aasii iluqaġmiŋ iñuich ullakkaat.

²⁷ John kiuŋagai, Iñupayaaq piyumiñaqtuq kisianik God-im pitqukpani.

²⁸ Ilivsi quliaqtuaġumiñaqsiŋarusi uqallakama Christ-guŋiññivḷuŋa, aglaan tilirauŋaruŋa itqanaiyautitquvlugu.

²⁹ Iñuk tuvaaqatiksrautiniŋaruaq uiksrautauruq, aasii uiksrautim avilaitqataa makitaruaq saniġaani, quviasuktuq atqunaqłuni tusaakamiuŋ uiksrautim nipaa. Tavra uiksrautim avilaitqataatun, paŋmapak quviasupiaġataqtuŋa.

³⁰ Ilaa kamanaqsisaiññaqtuksrauruq, aasii uvaŋa kamanaiqsaiññaqtuksrauruŋa.

Ilaa Qairuaq Qiḷaŋmiñ Kamanałhaaqtuq

³¹ Iñuk qairuaq paŋmaŋŋa kamanałhaaqtuq iluqaiññiñ. Aasii iñugruiññaq nunam pigigaa, suli nunamiŋŋaqtanik uqaluqaqtuq. Iñuk qairuaq qiḷaŋmiñ kamanałhaaqtuq iluqaiññiñ,

³² aasii quliaqtuaqaqtuq tautuŋaramiñik tusaaŋaraġmiñiglu, naaggauvva kiapayaaq akuqtuŋitkaa quliaqtuaŋa.

³³ Aglaan iñuum akuqtuiruam uqaluanik nalupqinaiġaa God iḷumun innivḷugu.

³⁴ Iñuk God-im tiliraŋa uqaqtuq uqaluŋiñik God-im, qanuq God-im aitchuġaa iluqaanik suaŋŋataanik Ilitqusiġiksuam.

³⁵ Aapam piviuttaġigaa Iġñiq, aasii aitchuutigiŋagai supayaat ilaanun.

³⁶ Iñuk ukpiqtuaq Iġñiġmun isuitchuamik iñuggutiqaqtuq, aasii iñuk kamaksriŋitchuaq Iġñiġmik iñuggutiqaġniaŋitchuq, aglaan God-im tatavsaġniaġaa.