John 21 - Iñupiatun Mumiksat Uqalugiksuat

Jesus Niptaqtuq Tallimat Malġugnun Iḷitchitquranun

¹ Taavruma aquagun Jesus salapqivsaaŋaruq iḷitchitquranun Tasiani Tiberias. Aasii salapqiŋaruq inna.

² Simon Peter, Thomas taggisiqaqtuaq igḷuanik Malġim, Nathanael Cana-miu Galilee-miittuami, iġñiŋiglu Zebedee-m, suli malġuk allak iḷaŋich iḷitchitquraŋisa atautchimiinŋarut.

³ Simon Peter-m uqallautiŋagai, Iqalliagaqsiruŋa. Ilaisa uqallautiŋagaat, Piqasiġñiaġiptigiñ. Tavra aullaŋarut aasii ikivlutiŋ umiaqpauramun. Taavrumani unnuami aŋiiññaŋarut.

⁴ Uvluq qauksrauraqsaġataġman, Jesus makitaŋaruq tatchim siñaani, aasii iḷitchitqurat iḷisaġiŋaitkaat Jesus-gutilaaŋanik.

⁵ Jesus apiġiŋagai, Katkuqsii, iqaluutiqaqpisi? Ilaisa kiuŋagaat, Naumi.

⁶ Ilaan uqallautiŋagai, Niŋitchiuŋ kuvraq taliqpiata tuŋaanun umiaqpauram aasii iqalugniaqtusi. Tavra niŋinŋagaat aasii payyaksaŋagaat nuqitchaqamirruŋ umiam iḷuanun qanuq iqaluuvaił̣ł̣uni.

⁷ Taamna iḷitchitquraq Jesus piviuttaġikkaŋa uqallaŋaruq Peter-mun. Ataniq pikka. Simon Peter-m tusaakami Atanġutilaaŋanik, ilaan atiŋagai annuġaani, annuġaakłiḷiŋaruaq savakkumiññaksaaqłuni, nautkiaŋaruq immamun.

⁸ Aasiiḷi allat iḷitchitqurat tulaŋarut umiaqpauramik, kaliłługu kuvraq siḷivinŋaruaq iqaluŋnik, qanuq uŋasiŋił̣ł̣utiŋ nunamiñ, tallimakipiatun avluġaaġniqtun.

⁹ Tulakamiŋ nunamun, tautuŋarut aluatun ittuaniñ igniġmik tavrani, iqaluŋmik qaamiutaqaqłuni punniġmiglu.

¹⁰ Jesus uqallautiŋagai, Qaġġirrisitchi iḷaŋiññik akkupak iqaluktavsi.

¹¹ Tavra Simon Peter ikiŋaruq umiaqpauramun aasii nuqiłługu kuvraq nunamun, siḷivinŋaruaq iqalukpaŋnik 153-ñik. Aasii iñugiakkaluaqtillugich iqaluich kuvraq aliktuŋitchuq.

¹² Jesus uqallautiŋagai, Qaiḷusi itqutchiġiaġitchi. Nalliataunnii iḷitchitqurat apiġisausiiñŋagaat, Kiñailivich? Iḷisimaŋagaat Atanġutilaaŋanik.

¹³ Jesus qaivḷuni tiguŋagaa punniq aasii aitchuutigivlugu ilaiññun, tainnatun suli iqaluk piŋagaa.

¹⁴ Tavrani piŋatchiŋagik Jesus salapqiqsitaunini iḷitchitquranun aŋipkaqtitauganikami tuqqunmiñ.

Jesus-lu Peter-lu Kasuutiruk

¹⁵ Itqutchianikamiŋ, Jesus uqallautiŋagaa Simon Peter, Simon, iġñiŋa John, piviuttaġiłhaaqpiŋa ukua iḷitchitqurat piviuttaqqutaanniñ uvamnun? Aaŋ Ataniiq, ilaan kiuŋagaa, Iḷisimarutin uvaŋa nakuaġigikpiñ. Jesus uqallautiŋagaa Peter, Niġipkakkich imnaiyaatka.

¹⁶ Igḷuani Jesus uqallautitqiŋagaa, Simon, iġñiŋa John, piviuttaġiviŋa? Aaŋ Ataniiq, iḷisimarutin uvaŋa nakuaġigikpiñ, Peter uqallaŋaruq. Ilaan uqallautiŋagaa, Qaunagikkich imnaitka.

¹⁷ Jesus uqallautiŋagaa piŋayuaŋni, Simon iġñiŋa John, nakuaġiviŋa? Peter atqunaqłuni ipiqtutchaŋaruq pisigivlugu Jesus apiqqutaa piŋayuaŋni, Nakuaġiviŋa? Tavra Peter-m uqallautiŋagaa, Ataniiq, iḷisimarutin supayaanik. Iḷisimarutin uvamnun nakuaġitilaaġnik. Jesus uqallautiŋagaa, Niġipkakkich imnaitka.

¹⁸ Iḷumutupiaġataq uqallautigikpiñ, nutaġaukavich iliŋnik tavsisuurutin aasii aullaqłutin sumugukavich. Aglaan utuqqaġuġuvich allam iñuum qiḷiqsruiñiaġaatin isaaqtillutin aasii aullautilutin ullaguŋisaġnun.

¹⁹ Jesus taamna uqallausiġiŋagaa Peter-mun iḷitchuġipkaqsaqługu qanutchikun tuqqutikun ilaanun kamanaqsiḷiġniaqtilaaŋa God. Aasii taavruma aquagun Jesus uqallautiŋagaa Peter, Maliŋŋa.

²⁰ Peter-m kiŋiaqłuni tautuŋagaa iḷitchitquraq Jesus piviuttaġiraŋa maliktuaq inmiŋnun. Taamnauŋaruq iḷitchitquraq ikusiksimaaŋaruaq qaniłłuni Jesus-mi nullautchiqamiŋ aasii apiqsrivḷuni, Ataniiq, kia aitchuutiginiaqpatin?

²¹ Peter-m tautukamiuŋ, uqallautiŋagaa Jesus, Ataniiq, qanuġniaqpaliuna?

²² Jesus kiuŋagaa, Uvaŋa pisuutiginiġupku ilaa iñuutqulugu qaiñimnun aglaan, suuva taamna iliŋnun? Maliŋŋa.

²³ Taamna uqallaun siaminŋaruq akunġanni aniqatiit taamna Iḷitchitquraq tuquniaŋiññivḷugu. Jesus uqallaŋaitkaluaġmiuq ilaanun tuquniaŋiññiḷugu, aglaan uqallaŋaruaq, Pisuutiginiġupku iñuutqulugu qaiñimnun aglaan, suuva taamna iliŋnun?

²⁴ Taamna iḷitchitquraq taamnauruq quliaqtuaqtuaq tamatkuniŋa, suli ilaaguruq aglaktuaq tamatkuniŋa, aasii iḷisimarugut ilaan quliaqtuaŋi iḷumun ittut.

²⁵ Jesus piŋagaluaġmiuq iñugiaktuanik allanik sunik. Iluqaqpiuraġmiŋ aglautiŋakpata makpiġarriuġlugich iñugiakpaiḷḷutiŋ matugaluaqparruŋ nuna sippaqaġayaqtutsuli.