John 20 - Iñupiatun Mumiksat Uqalugiksuat

Iñuitchuq Iḷuvvivik

¹ Tavra Jew-guruat Itchaksriġmata Savaiññiŋat qaaŋiġman, Mary Magdalene iḷuvviviŋmuŋaruq uvlaaġuaqłuni taaŋŋaansuli, aasii tautuŋagaa uyaġagruaq piiŋaruaq iḷuvvivium paaŋaniñ.

² Tavra aqpamik aullaŋaruq Simon Peter-mun allamullu iḷitchitquramun taavrumuŋa Jesus piviuttaġikkaŋanun, aasii uqallautivlugik, Aullautiniġaat Ataniq iḷuvviviŋmiñ, aasii nalugikput sumun iḷisilaaŋanik.

³ Peter tavrani aniŋaruq piqatigivlugu alla taamna iḷitchitquraq, aasii aullaqiŋaruk iḷuvviviŋmun.

⁴ Iluqatik aqpanŋaruk, aglaan allam iḷitchitquram unitchaŋagaa Peter aasii tikitqaaqłuni iḷuvviviŋmun.

⁵ Aasii puuŋasivḷuni itchuaqami qiñiqsaqłuni, tautuŋagai qattiġiksuat ukił̣haat tamaani, aglaan isiŋitchuq.

⁶ Tavra Simon Peter tikiñŋaruq aasii isiqłuni iḷuanun iḷuvvivium. Aasii tautuŋagai qattiġiksuat ukił̣haat tamaaniittuat,

⁷ ukił̣haaġlu niaquaniinŋaruaq itqatauŋiññiqsuq qattiġiksuanun ukił̣haanun, aglaan imulaaŋavluni inniqsuq inmigun.

⁸ Tavra alla iḷitchitquraq, tikitqaaŋaruaq iḷuvviviŋmun, isiŋammiuq aasii tautukługich ukpiliŋaruq.

⁹ Tamauŋanun aglaan kaŋiqsiŋaitkaich Bible uqaluŋich, ilaan aŋiruksrauniŋagun tuqqunmiñ.

¹⁰ Tavra iḷitchitqurak utiŋaruk aimaaġviŋmiŋnun.

Jesus Niptaqtuq Mary Magdalene-mun

¹¹ Tavrali Mary makitaŋaruq qiavluni siḷataani iḷuvvivium, qianiallaġmi puuŋasivḷuni itchuaŋaruq iḷuvvivium iḷuanun,

¹² aasii tautuŋaruq malġugnik isaġullaŋnik qatiqtuanik annuġaaqaqtuaŋnik, aquppiruaŋnik timaata Jesus nallavigiŋaraani, igḷua niaquani aasii igḷua isigaŋiñi.

¹³ Iliŋikta apiġiŋagaak, Aġnaaq, summan qiavich? Ilaan kiuŋagik, Atakkiataŋimma aullautiŋaniġaat Ataniġa, aasii nalugiga sumun iliŋiññun iḷisilaaŋanik.

¹⁴ Tainna uqallaanikami, kiŋiaŋaruq aasii tautuŋagaa Jesus makitaruaq, aglaan iḷisaġiŋitkaa Jesus-gutilaaŋanik.

¹⁵ Jesus apiġiŋagaa, Aġnaaq, summan qiavich? Kiña ivaqpiuŋ? Isummatigivlugu nunaliqiraunasugalugu, Mary uqallaŋaruq ilaanun, Iñuuk, sumun aullautiŋagupku uqallautiŋŋa sumun iḷiŋatilaaŋanik, aullautiyumagiga.

¹⁶ Jesus tuqłuŋagaa atqanik, Mary. Mary qiviaŋaruq aasii uqallakłuni ilaanun Hebrew-tun, Rabboni (sivuniqaqtuaq Iḷisaurrii).

¹⁷ Jesus uqallautiŋagaa, Tiggunaŋa qanuq mayuaniŋaitchuŋasuli Aapamun. Aglaan aullaġiñ aniqatiimnun aasii uqallautilugich, mayuġumaagaqsiruŋa Aapamnun Aapavsiññullu, suli God-imnun God-ivsiññullu.

¹⁸ Mary Magdalene aullaŋaruq aasii uqallautiŋagai iḷitchitquraŋi, Tautuŋagiga Ataniq. Suli quliaqtuaġutiŋagai Jesus uqaluŋiñik.

Jesus Niptaqtuq Iḷitchitquramiñun

¹⁹ Unnugiaġniŋani taavruma uvlum, tugliani uvlum Jew-guruat Savaiññiŋata, upkuat umiktuŋapkaqługich iḷitchitqurat irvianni, iqsivḷutiŋ Jew-guruanik, Jesus qaiŋaruq aasii makiłłuni akunġannun uqallautivlugich, Tutqiutiqaġitchi.

²⁰ Taamna uqallausiġianikamiuŋ, ilaan maniŋagai ilaiññun argagni saniqqaniḷu. Tavra iḷitchitqurat quviatchaŋarut tautukamirruŋ Ataniq.

²¹ Jesus uqallautitqiŋagai, Tutqiutiqaġitchi. Aapavli tiliŋammaŋa, tainnatulli tiligivsi.

²² Taamnaasii uqallausiġianikamiuŋ, aniqsaaġvigiŋagai uqallautivlugich, Ilitqusiġiksuaq aitchuusiaġisiuŋ.

²³ Uqallautiguvsigik iñuich God-mun suliqutigiŋaiġñiḷugich itqaumayumiñaiġḷugich piḷuutiŋich ukpiliqpata, suliqutigiŋaiqsaurut. Aasiisuli uqallautimmiguvsigik God-mun suliqutigiŋaiŋiññiḷugich piḷuutiŋich ukpiliŋitpata, suliqutigiŋaiqsauŋitchut.

Jesus-lu Thomas-lu Kasuutiruk

²⁴ Tavra Thomas, iḷaŋat qulit malġuk, taggisiqaqtuaq igḷuanik Malġim, piiñŋaruq iḷamiñi Jesus qaimman.

²⁵ Tavraasii allat iḷitchitqurat uqallautiŋagaat, Tautuŋagikput Ataniq. Thomas uqallautigiññaŋagai, Tautuŋisuaġupkich argaŋiñi ikiŋich kikiagich, suli argatka iḷiḷugich ikiŋiññun kikiagich, iḷiḷugiḷḷu argatka saniġaanun, ukpiġumiñaipiaqtuŋa.

²⁶ Tallimat piŋasut uvlut pianiŋmata, iḷitchitquraŋi iglumiinŋalgitchut, aasii Thomas itqatauŋaruq. Upkuat umiktuutiqaŋarut, aasii Jesus qaiŋaruq qikaqłuni akunġannun. Uqallaŋaruq, Tutqiutiqaġitchi.

²⁷ Tavraasii ilaan uqallautiŋagaa Thomas, Iḷḷiuŋ argaiñ uvuŋa suli tautukkich argatka, isaaġutilugiḷḷu argaktin aasii iḷiḷugich saniqsumnun. Arguasuŋaiġiñ aglaan ukpiqsimaaġiñ.

²⁸ Thomas kiuŋagaa Jesus, Ataniiŋ, God-iiŋ.

²⁹ Jesus uqallautiŋagaa, Ukpiliqsutin tautuanikamŋa kisianik. Quviasuglich iñuich tautuŋaitkaluaqłuŋa ukpiliqsuat.

Ukua Aglaagurut Ukpiliquvlusi

³⁰ Tavra Jesus takkuanni iḷitchitqurat piŋagaluaqtuq iñugiaktuanik allanik aliuġnaqtuanik nalupqinaiyautinik kiutilaamiñik aglausimaŋitchuanik ukunani makpiġaani.

³¹ Aglaan makua aglaagurut ilivsi ukpiquvlusi taamna Jesus Christ-gutilaaŋanik, Iġñiŋa God-im, aasii ukpiliġḷusi iñuggutinnaquvlusi ilaan suaŋŋataagun.