John 2 - Iñupiatun Mumiksat Uqalugiksuat

Katirrusiqiruat Cana-mi

¹ Tavra uvluk piŋayuaŋni katirrusiqiŋarut nunaaqqimi Cana-mi Galilee-miittuami, aasii Jesus aakaŋa tavraniinŋaruq.

² Jesus-tauq iḷitchitquraniḷu aiyugaaqtauŋammiut katirrusiqiruanun.

³ Tavra wine nuŋumman Jesus aakaŋata uqallautiŋagaa wine-gutaiġñivḷugich.

⁴ Tavra Jesus uqallautiŋagaa, Aġnaaq uŋiarrisigikkan uvaŋa uŋiarrisaġiŋitkiga. Ikarraġa tikiñŋaitchuqsuli.

⁵ Aakaŋa uqallaŋaruq kivganun, Pisitchi qanupayaaq pitqukpasi.

⁶ Tavra itchaksrat uyaġaich qattat tavrani inŋarut. Atausiq immaqtutilaaqallaavluni 20 naagga 30 gallon-tulluunnii. Aasii taapkua qattat imaŋich atuġuuruat Jew-guruat piraġausiannun salummaqtauniġmi.

⁷ Jesus uqallautiŋagai, Immiqsigik qattat imiġmik. Tavra immiŋagaich qaqłuqpiuraqługich.

⁸ Suli uqallautiŋagai, Qalusiñaqsigaasi aasii qaiḷḷugu qaukłiannun niqłiqirit. Tavra aanŋagaat ilaanun.

⁹ Niqinaqiruani niqłiqirit qaukłiata uukamiuŋ wine-ġuqtitauruaq naluŋaniqsuq sumiñ pisilaaŋanik, kivgat aglaan imiqtaŋaruat iḷisimagaluaqtut. Niqłiqirit qaukłiata niqinaqiruani ququaŋagaa uiksraun

¹⁰ aasii uqallautivlugu, Iñupayaam sivulliġisuugaa nakuuruaq wine aasii iñuich imianiŋmata iḷaŋaniñ, kiŋummuuruaq wine pivaallukługu, aglaan uvva tutquqtaġiniġiñ nakuuruaq wine paŋmapaŋmun aglaan.

¹¹ Taamna aliuġnaqtuaq Jesus pikkaŋa Cana-mi Galilee-miittuami sivulliuŋaruq nalupqinaiyautinun kamanautiqaqtilaaŋanun, aasii iḷitchitquraŋi ukpiliŋarut ilaanun.

¹² Taavsruma aquagun Jesus aullaŋaruq Capernaum-mun, piqatigivlugich aakaniḷu aniqatiiniḷu iḷitchitquraniḷu, aasii tavrani uvliuqtuallaŋarut.

Jesus Aŋaiyyuvikpaŋmuktuq

¹³ Tavra Itqaivik Qulaurrusiqiviannik Jew-guruat tikiñŋaruq, aasii Jesus aullaŋaruq Jerusalem-mun.

¹⁴ Aŋaiyyuvikpaŋmi paqinŋagai iñuich tuniuqqairuat immuliviich aŋusalluŋiññik imnaiñiglu tiŋmianiglu, suli simmiqsuqtit maniŋñik aquppiruat inimiŋni.

¹⁵ Tavra ipiġaqtuusivḷuni akłunaamik uŋuraŋagai iluqaisa aŋaiyyuvikpaŋmiñ, iñuiḷḷu imnaiḷḷu immuliviiḷḷu aŋusalluŋich, suli naavinŋagai simmiqsuqtit maniŋich ulġuuqługiḷḷu aglagviŋich.

¹⁶ Suli uqallautiŋagai tamatkua tuniuqqairuat tiŋmianik, Aullautisigik tamatkua, tauqsiqsuġviġuġniaŋitkiksi Aapama iglua.

¹⁷ Iḷitchitquraŋi itqaŋarut aglaaguŋaruamik Bible-ni, “Siġñiksrautiqpaum igluŋnun God payarigaaŋa.”

¹⁸ Tavra Jew-guruat apiġiniqłaŋagaat, Sumik aliuġnaqtuamik piyumiñaqpich nalupqinaiyautiksraġnik ataniġnaqutiqaqtilaaġnik tainna piyumiñaqłutin.

¹⁹ Jesus kiuŋagai, Suksraunġiqsiuŋ una aŋaiyyuvikpak aasii uvluni piŋasuni nappatqigñiaġiga.

²⁰ Tavra Jew-guruat uqallaŋarut, 46 ukiuni savaaguŋaruq una aŋaiyyuvikpak, aasii ilivich piŋasuni uvluni nappaġniaqpiuŋ?

²¹ Ilaan uqautigikamiuŋ aŋaiyyuvikpak sivuniġiŋagaa ilaan timini.

²² Tavra aŋipkaqtauganiŋman tuqqunmiñ, iḷitchitquraŋisa itqaŋagaat taamna uqallautaa, aasii ukpiġiŋagaat Bible uqaluat uqaluiḷḷu Jesus uqausiġiŋaraŋi.

Jesus Iḷisimaruq Iñuich Isumaŋiññik

²³ Tavra ilaa Jerusalem-miinman Itqautaanni Qulaurrusiqiviŋmun niqinaqiviŋmi, iñugiaktuat ukpiŋarut ilaanun tautukamisigik aliuġnaqtuat pikkaŋi nalupqinaiyautit kiutilaaŋanun.

²⁴ Tavra Jesus ukpiġiŋaitkai ukpipiaġniḷugich inmiñun, qanuq iḷisimaŋagai iñupayaat.

²⁵ Iñuŋmik uqallaurrituŋitchuq qanuq iñuich isummatiqaqtilaaŋannik inmigun, inmiñi iḷisimavluni qanuq isumaqaqtilaaŋannik.