John 19 - Iñupiatun Mumiksat Uqalugiksuat

¹ Tavra Pilate tigupkaŋagaa Jesus aasii ipiġaqtuqtiłługu.

² Aasiiḷi aŋuyaktit niaquġusiuŋarut kakiḷḷaġnaqtuanik qisiqsiutinik, aasii iḷivḷugu niaquanun, suli annuġaaqługu suŋauraammaġiksuamik annuġaamik umialiktun.

³ Ilaisa ullakługu ilaanun kipagivlugu nanġarraqsiŋagaat, Sivisuruamik iñuuli Umialgat Jews, pattakługulu argagmiŋnik.

⁴ Pilate anitqiŋaruq aasii uqallautivlugich, Uvva, annisiniaġiga ilivsiññun iḷisimatquvlusi uvaŋa iḷitchuġiŋisilaamnik patchisiksramik ilaani.

⁵ Tavra Jesus aniŋaruq atuqłuni niaquġunmik kakiḷḷaġnaqtuanik suli suŋauraammaġiksuamik annuġaamik.

⁶ Aŋaiyyuliqsiqpaiḷḷu munaqsriḷḷu tautukamirruŋ, nipaallaŋarut, Kikiaktuutili, kikiaktuutili aŋarrauramun. Pilate uqallautiŋagai, Piḷugu ilivsiññik kikiaktuuttusiuŋ, qanuq uvaŋa iḷitchuġiruŋa patchisiksraisilaaŋanik.

⁷ Jew-guruat kiuŋagaat, Pitquraqaqtugut aasii taavrumuuna pitqurakun tuquruksraugaluaqtuq, qanuq ilaa inmiñik iḷiuqtuq Iġñiġinivḷuni God-mun.

⁸ Tavra Pilate tusaakamigich taapkua uqaluich, iqsitchavsaaŋaruq.

⁹ Isitqiŋaruq isivġiġviŋmun aasii apiġivlugu Jesus, Sumiñ qaivich? Jesus kiuŋaitkaa.

¹⁰ Pilate apiġiŋagaa, Uqautiniaŋitpiŋa? Iḷisimaŋitpich ataniġnaqutiqaqtilaamnik tigutaaqtauŋaiqsitchumiñaqłutin, suli kikiaktuutipkaġumiñaqłutin?

¹¹ Jesus kiuŋagaa, Ataniġnaqutiqaġumiñaitkaluaqtutin qanuġumiñaġluŋa aitchuusiaġiŋisuaġupku ilivich God-miñ. Tavra taamna iñuk aitchuutiginniktuaq uvamnik iliŋnun piḷuusiqiłhamaaqtuq.

¹² Taapkua uqaluich pisigivlugich Pilate-gum tigutaaqtauŋaiqsinniaŋagaluaġaa Jesus, aglaan Jew-guruat nipaallaksiññaŋarut, tigutaaqtauŋaiqsitkupku una iñuk, Caesar-m avilaitqatigiŋitkaatin. Iñupayaaq iḷiuqtuaq inmiñik umialiguqtiqłuni akiḷḷiḷiqsuutiruq Caesar-mun umialguruamun Rome-mi.

¹³ Tavra Pilate tusaakamigich taapkua uqaluich, ilaan annisiŋagaa Jesus aasii aquviłłuni isivġiġvium aquppiutaŋiñun inimun atiqaqtuamun Uyaġagmik natilik, aasii Hebrew-tun uqaġniġmi taggisaa Gabbatha.

¹⁴ Taamna uvluġiŋagaa Jew-guruat itqanaiyaġmata Itqaunmik Qulaurrusiqiviŋmun, aasii uvluq qitiqqaqpalliqł̣uni. Pilate uqallautiŋagai Jew-guruat, Uvva Umialiksi.

¹⁵ Iliŋich nipaallaŋarut, Tuqulli. Tuqulli. Kikiaktuutilugu aŋarrauramun. Pilate uqallautiŋagai, Kikiaktuutiniaqpigu Umialiksi? Aŋaiyyuliqsiqpaich uqallaŋarut, Umialgitchugut allamik, Caesar kisian.

¹⁶ Tavra ilaan aitchuutigiŋagaa ilaiññun kikiaktuutitquvlugu aŋarrauramun.

Jesus Kikiaktuurrauruq Aŋarrauramun

¹⁷ Tavra ilaisa tiguŋagaat Jesus, aasii anivḷuni iqsruŋagaa ilaan aŋarraurani, inimun taggisiqaqtuamun inaanik niaquġruam, taggisiqaqtuaq Hebrew-tun uqaġniġmi Golgotha.

¹⁸ Tavrani ilaisa kikiaktuutiŋagaat aŋarrauramun piqasiqł̣ugu malġugnik allaŋnik, Jesus qitqagnukługu.

¹⁹ Pilate suli aglaŋaruq aasii iḷivḷugu aŋarrauramun taiguaġnaqtuaq, Jesus Nazareth-miu, Umialgat Jew-guruat.

²⁰ Iñugiaktuat Jew-guruat taiguaŋagaat taamna aglak, qanuq ini Jesus kikiaktuurrauvia qaninŋaruq iniqpaŋmun, suli aglaaguvluni Hebrew-tun Latin-tullu Greek-tullu.

²¹ Aŋaiyyuliqsiqpaich tavrani uqallaŋarut Pilate-mun, Aglagnagu Umialgannik Jew-guruat, aglaan aglagiñ Una iñuk uqaqtuaq uvaŋa Umialguruŋa Jew-guruanun.

²² Pilate kiuŋagai, Aglaaġianikkaġa allaŋŋuġniaŋitchuq.

²³ Aŋuyaktit Jesus kikiaktuutianikamirruŋ aŋarrauramun, tiguŋagaich annuġaaŋi aasii autaaqługich sisamaigułługich, atautchimik piḷḷaayumiñaqsivḷugu aŋuyakti. Aglaan iḷagiŋaitkaat iḷulliat annuġaaŋisa kiluiḷaaq, qiḷaaq qulaaniñ anmun,

²⁴ uqaqłutiŋ inmiŋnun, Aligaŋaiḷḷakput una, aglaan saaptautigilakput iḷitchuġisaġluta kimun piginiaqtilaaŋanik. Taamna taŋŋiutauniqsuq Bible uqaluannun inna, “Ilaisa autaaŋagaich annuġaatka inmiŋnun, suli annuġaaġa saaptautigiŋagaat.”

²⁵ Tavra taamna aŋuyaktit piŋagaat. Aasiivsauq makitaŋarut saniġaani aŋarrauraŋan Jesus, aakaŋa, aakaŋallu aniqataa, Mary-ḷu nuliaŋa Clopas, Mary-ḷu Magdalene.

²⁶ Tavra Jesus tautukamiuŋ aakani iḷitchitquraġlu ilaan piviuttaġirani makitaruak qaniłłutiŋ, uqallautiŋagaa aakani, Aġnaaq, ikka iġñiġiñ.

²⁷ Aasii uqallaŋammiuq iḷitchitquramun, Ikka aakan. Tavraŋŋaaglaan iḷitchitquram nuutinŋagaa ilaan aimaaġviŋmiñun.

Jesus Tuquruq

²⁸ Taavruma aquagun Jesus, iḷisimavluni supayaat paŋmapak naatilaaŋannik, uqallaŋaruq, Imiġuliqsuŋa. Taamna uqallausiġiŋagaa taŋŋiquvlugich Bible uqaluŋich.

²⁹ Tavrani napaŋaruq qattaq siḷivinŋaruaq wine-mik, tavra iḷiŋagaat ivsaktaqtuaq ivsaktilluataqługu wine-mik aasii isaaġutivlugu qiruatchiamik qanġanun.

³⁰ Jesus aitchuusiaġianikamiuŋ wine uqallaŋaruq, Naattuq. Aasii sikivlugu niaqquni aniġniġiŋaruq.

Jesus Kapigaat Saniqsuagun

³¹ Tavra uvluġimmagu Itqanaiyaġvium Qulaurrusiqivikun niqinaqivium, Jew-guruat apiġiŋagaat Pilate niuŋich navguġukługich, suli aullautitquvlugich, timit aŋarrauraniititquŋił̣ł̣ugich Jew-guruat Savaiññiŋanni. Qanuq taamna Savaiññiq nuimaruaguruq allaniñ Savaiññiġniñ.

³² Tavra aŋuyaktit qaiŋarut aasii navguqługik niuŋik sivullium, igḷuatalu kikiaktuurrauqatauruam Jesus-mun.

³³ Aasii tikiññamirruŋ Jesus iḷitchuġivlugu tuquaniktilaaŋanik, naviŋaitkaich niuŋik.

³⁴ Aglaan iḷaŋata aŋuyaktit kapiŋagaa saniqsuagun panamik, aasii tavrauvvaa maqiŋaruk auglu imiġlu.

³⁵ Iñuk taamna tautuŋaruaq taavrumiŋa quliaqtuaŋaruq ilivsi ukpiliquvlusi. Ilaan quliaqtuaŋa iḷumun ittuq, suli ilaa iḷisimaruq iḷumun ittuamik uqaqtilaamiñik.

³⁶ Tavra tamatkua piŋarut taŋŋiqsautquvlugich Bible uqaluŋich inna, “Atausiuraq-unnii sauniŋa naviktauniaŋitchuq.”

³⁷ Aasiisuli alla Bible uqaluat uqaġmiuq, “Ilaisa qiñiġniaġaat kapiŋaraqtiŋ.”

Jesus Iḷuvviuġaat

³⁸ Taavruma aquagun Joseph Arimathea-ġmium ullakługu Pilate apiġiŋagaa pisukługu timaa Jesus. Taamna Joseph ukpiqtuaguruaq Jesus-mun aglaan nalunautchivḷuni sivuuġagivlugich Jew-guruat. Pilate-gum uqallautiŋagaa piyumiñaġnivḷugu timaa Jesus. Anivḷuni Joseph-gum aullautiyaqtuŋagaa Jesus timaa.

³⁹ Nicodemus-lu, Jesus-mukpaalluŋaruaq unnuami, qaiŋammiuq qaġġirrivḷuni akuvliġiiñik tivluktuaniglu tivraġiksuaniglu iḷuvviuġutinik tallimakipiatun uqumaisigiruanik.

⁴⁰ Iliŋikta piŋagaak timaa Jesus, aasii nimmaaqługu qattiġiksuanik ukił̣haanik tivraġiksausiqł̣ugu, piḷġusiatitun iḷuvviuqamiŋ Jew-guruat.

⁴¹ Tavra qaniŋani ilaan kikiaktuurrauviata nauvianni napaaqtut inŋaruq nutaaq iḷuvvivik iñuum qaŋaunnii iḷuvġuvigiŋaisaŋa.

⁴² Tavra pisigivlugu uvluq sivuani Jew-guruat Savaiññiŋata, pisigivlugulu iḷuvvivium qaninniŋa, iḷiŋagaat Jesus tavruŋa.