John 18 - Iñupiatun Mumiksat Uqalugiksuat

Jesus Tigurauruq

¹ Jesus aŋaiyyutigianikamigich taapkua uqaluich, ilaa aullaŋaruq iḷitchitquraniḷu ikaaqługu kuuġuuraq Kidron isiqłutiŋ napaaqtut nauviannun Gethsemane-mun.

² Judas-gum, aitchuutiginniktuam ilaanik, iḷisimaŋammiñiġaa taamna ini, qanuq Jesus akulaitchuami kasimaqatigisuugai iḷitchitqurani tavrani.

³ Tavra Judas aullaŋaruq piqasiqł̣uni aŋuyaktinik, suli iḷaŋiññik munaqsrich tilikkaŋiññik aŋaiyyuliqsiqpaich Pharisee-ḷḷu. Tavruŋaŋarut naniġuaqtuqłutiŋ satkuliraqłutiglu.

⁴ Tavra Jesus, iḷisimavluni supayaamik piñiaqtuamik inmiñun, saarvaŋaruq aasii uqallakłuni ilaiññun, Kiña ivaqpisiuŋ?

⁵ Ilaisa kiuŋagaat, Jesus Nazareth-miu. Tavra Jesus uqallautiŋagai, Ilaaguruŋa. Judas, aitchuutiginniktuaq ilaanik, makitaqatauŋaruq ilaiññun.

⁶ Jesus uqallautimmatiŋ ilaagunivḷuni, taluqsratchakłutiŋ utiqqiaŋarut aasii ulġuvlutiŋ nunamun.

⁷ Jesus apiġitqiŋagai, Kiña ivaqpisiuŋ? Ilaisa kiuŋagaat, Jesus Nazareth-miu.

⁸ Jesus kiuŋagai, Uqallautiŋasugaavsi ilaagunivḷuŋa. Tavra ivaġuvsiŋa, ukua iḷitchitquratka aullaġlich.

⁹ Taamna taŋŋiutausalgiññiqsuq uqaluŋnun Jesus uqallausiġiŋaraŋiññun aŋaiyyukami, Taapkunaŋŋa aitchuutiŋniñ uvamnun tammaiŋitchuŋa atautchimik-unnii.

¹⁰ Tavrani Simon Peter savikpaqaqłuni, amuŋagaa aasii anauvlugu aŋaiyyuliqsiqpaich qaukłiata kivgaŋa, aasii taliqpianik siutaiqł̣ugu. Kivgam atqa Malchus.

¹¹ Jesus uqallautiŋagaa Peter, Iḷḷiuŋ savikpaiñ puuŋanun. Isumavich akuqtuġniaŋiññasugalugu uvamnun nagliksaaġutiqpak Aapama sivunniŋakkaŋa uvamnun?

Annas Apiqsruqtuġaa Jesus

¹² Tavra aŋuyaktit atanauraŋatalu Jew-guruat munaqsriŋisalu tiguŋagaat Jesus aasii qiḷiqsruivḷugu.

¹³ Aullautiqqaaŋagaat Annas-mun, qanuq aaparuaġimmagu Caiaphas-gum. Taamna Caiaphas aŋaiyyuliqsiqpaich qaukłiat taavrumani ukiumi.

¹⁴ Caiaphas-gum uqallautiŋagai Jew-guruat anniqsuutaupiaġniaġnivḷugu iñuk atausiq tuqukpan pisilugich iñupayaat.

Peter-m Piiḷaaġigaa Jesus

¹⁵ Simon Peter-m allavlu iḷitchitquram maliŋagaak Jesus. Iḷitchitquraq taamna iḷisimaŋavlugu aŋaiyyuliqsiqpaich qaukłiata, isiġumiñaŋaruq piqatigivlugu Jesus siḷalliġuaŋanun inaata aŋaiyyuliqsiqpaum.

¹⁶ Peter qikaŋaruq siḷami paami. Tavra alla iḷitchitquraq, iḷisimakkaŋa aŋaiyyuliqsiqpaich qaukłiata, aniŋaruq aasii uqallautivlugu niviaqsiaq upkurriqiri, itqutiŋagaa Peter.

¹⁷ Niviaqsiam upkurriqirim apiġiŋagaa Peter, Iḷagiŋitkaluaqpatin uuma iñuum iḷitchitquraŋisa? Ilaa uqallaŋaruq, Iḷagiŋitkaanŋa.

¹⁸ Tavra kivgat munaqsriḷḷu igniqsuŋarut qanuq qiiyanaqłuni, aasii qikaġniqsut pasiaqłutiŋ. Peter iḷagiŋagaat qikaqłuni pasiaqtuaq.

Aŋaiyyuliqsiqpaich Qaukłiata Apiqsruqtuġaa Jesus

¹⁹ Tavra aŋaiyyuliqsiqpaich qaukłiata apiqsruqtuŋagaa Jesus iḷitchitquraŋigun iḷisaurrutiŋigullu.

²⁰ Jesus kiuŋagaa, Uqaŋaruŋa iñuŋnun salapqiruakun, ataramik iḷisaurrisuuruŋa aŋaiyyuviŋiññiḷu aŋaiyyuvikpaŋmiḷu, iluqaġmiŋ Jew-guruat katirvikaaŋannun. Uqaŋaitchuŋa sumik nalunautchiḷuŋa.

²¹ Summan apiqsruqpiŋa? Apiqsrukkich iñuich naalaġniritka qanuq uqaŋatilaamnik ilaiññun. Iḷisimarut uqautigiŋaramnik.

²² Taamna uqallausiġianiŋmagu, iḷaŋata munaqsrich qikaqtuam saniġaani patiŋagaa Jesus uqallakłuni, Tainna kiuraksraġiviuŋ aŋaiyyuliqsiqpaich qaukłiat?

²³ Jesus kiuŋagaa, Uqaŋaguma killukuaġluŋa, iḷitchuġipkaġuŋ iñuŋnun killukuaġutiga. Aasii nalaulluŋa uqaġuma, summan patikpiŋa?

²⁴ Tavra Jesus qiḷiqsruiŋavlugu, Annas-gum aullaqtitkaa Caiaphas-mun aŋaiyyuliqsiqpaich qaukłiannun taavrumani ukiumi.

Peter-m Piiḷaaġivsaaġaa Jesus

²⁵ Tavra Simon Peter qikaŋaruq pasiaqłuni. Iñuich iḷaŋisa uqallautiŋagaat, Iḷagiŋitpatin iḷitchitquraŋisa taavruma iñuum? Ilaa piiḷaaŋaruq aasii uqallakłuni, Iḷauŋitchuŋa.

²⁶ Iḷaŋata kivgaŋisa aŋaiyyuliqsiqpaich qaukłiata, nanmiñiŋata iñuum Peter-m siutaiŋakkaŋata, apiġiŋagaa, Tautuŋaitpigiñ Jesus piqatigivlugu Gethsemane-mi?

²⁷ Peter piiḷaatqiŋaruq. Aasii tavrauvvaa tiŋmiaq nipanŋaruq.

Jesus Apiqsruqtuġaa Pilate-gum

²⁸ Tavra iñuich aullautiŋagaat Jesus igluqpaŋaniñ Caiaphas isivġiġviŋmun igluqpaŋaniittuamun kavanam. Uvlaatchaurauŋaruq. Jew-guruat isiŋitchut isivġiġviŋmun salumaiḷisuŋił̣ł̣utiŋ niġiḷḷasukłutiŋ Itqaunmi Qulaurrusiqiviŋmun.

²⁹ Tavra Pilate anniqiŋagai aasii uqallautivlugich, Sumik pasikkutiqaqpisi uumuuna iñukun?

³⁰ Ilaisa kiuŋagaat, Una iñuk pitquranik navguirauŋitpan aitchuutiginayaitkikput iliŋnun.

³¹ Pilate uqallautiŋagai, Pisiuŋ ilivsiññik aasii isivġiġḷugu ilivsi nanmiñiq pitquravsigun. Jew-guruat uqallautiŋagaat, Uvagut tuqutchipkaqtauyumiñaitchugut iñuŋmik pitquraŋisigun Rome-miut.

³² Taamna taŋŋiutausaŋaniqsuq uqaluŋmun Jesus uqallautaanun qanutchikun tuqqutikun tuquniaqtilaamiñik.

³³ Pilate isitqiŋaruq isivġiġviŋmun aasii ququaqługu Jesus uqallautivlugu, Ilivich Umialigivatin Jew-guruat?

³⁴ Jesus kiuŋagaa, Taamna uqallausiġiviuŋ iliktuġruiññaq, naagga allat uqallautivatin uvapkun?

³⁵ Pilate kiuŋagaa, Jew-gunasugiviŋa? Jew-guqativich nanmiñiq aŋaiyyuliqsiqpaiḷḷu qaiñŋagaatin uvamnun. Sumik piŋavich?

³⁶ Jesus kiuŋagaa, Umialguŋitchuŋa mattumuŋa nunamun. Umialguguma mattumuŋa nunamun, kivgatka aŋuyakkayaqtut aitchuutautquŋiḷḷuŋa Jew-guruanun. Umialguŋitchuŋa nunam iñuŋiñun.

³⁷ Tavra Pilate uqallautiŋagaa, Uvva umialgurutin? Jesus kiuŋagaa, Ilivich uqallaktutin umialgunivḷuŋa. Taamna pisigivlugu aniŋaruŋa. Suli qaiŋaruŋa nunamun quliaqtuaġisukługu iḷumun ittuaq. Iñupayaam ivaqłiaruam iḷumun ittuamik naalaġnigaaŋa.

³⁸ Pilate apiġiŋagaa, Suuva iḷumun ittuaq? Taamna uqallausiġiqqaaqługu, anitqiŋaruq Jew-guruanun, aasii uqallautivlugich, Iḷitchuġiruŋa patchisiksraisilaaŋanik.

Jesus Tuquruksraġuġaat

³⁹ Aglaan ilivsi piḷġusiqaqtusi uvaŋa tigutaaqtauŋaiqsitchitquvluŋa iñuŋmik Itqaġviŋmi Qulaurrusiqiviŋmun. Tigutaaqtauŋaiqsitchitquvisiŋa Umialgannik Jew-guruat?

⁴⁰ Iliŋich nipaallatqiŋarut, Ilaaniŋiḷaaq aglaan Barabbas-mik. Barabbas tigligayuktiqpauŋaruq.