John 17 - Iñupiatun Mumiksat Uqalugiksuat

Jesus Aŋaiyyutigai Iḷitchitqurani

¹ Tavra Jesus uqautigianikamigich taapkua uqaluich, ilaa aaġluŋaruq qiḷaŋmun uqallakłuni. Aapaa, ikarraq tikitchuq. Kamanaqsipkaŋŋa uvaŋa Iġñiġiñ Iġñiqpiḷḷi kamanaqsiḷiġumagaatin,

² qanuq ilivich ataniġnaqusiŋagiŋma kamanałhaaġumiñaqsivḷuŋa iñupayaaniñ. Taamna pisigivlugu iñuupkaiyumiñaqtuŋa isuitchuamun iluqaiññik qaisaġnik uvamnun.

³ Aasiuvva isuitchuaq iñuggun, ilaisa iḷitchuġivlutin kisivisualuk iḷumun God-autilaaġnik, suli Jesus Christ ilivich tiliŋakkan.

⁴ Iḷitchuġipkaŋagiga kamanautin iñuŋnun naatchivḷuŋa piraksriutiŋnik uvamnun nunami.

⁵ Paŋmapak Aapaa, kamanaqsipkaŋŋa sivuġaġni taavrumiŋa kamanaunmik pigiŋakkamnik piqatigivlutin nuna savaaguŋaunnagu.

⁶ Iḷitchuġipkaŋagikpiñ iñuŋnun qaisaġnun uvamnun nunam iñuŋiñiñ. Ilivich pigiŋagitin, aasii qaiñŋagitin iliŋich uvamnun, aasii kamagiŋagaich uqaluktin.

⁷ Paŋmapak iḷitchuġirut supayaat qaisatin uvamnun iliŋniŋŋaqtautilaaŋannik.

⁸ Uqautiŋagitka uqaluksrirrutiŋnik uvamnun aasii iliŋisa ukpiġiŋagaich. Nalupqisuŋaiŋarut uvaŋa qaiŋatilaamnik iliŋniñ, ukpiliqł̣utiŋ tiliŋatilaamnik iliŋnun.

⁹ Aŋaiyyutigitka. Aŋaiyyutiŋitkitka nunam iñuŋi aglaan aŋaiyyutigitka tamatkua qaisatin uvamnun, qanuq pigigitin.

¹⁰ Iluqaisa pitka pigigitin suli ilivich pisin pigigitka, aasii uvaŋa kamanautiga iḷisimanaqsiruq ilaisigun.

¹¹ Aasii paŋmapak nunamiinŋaigaqsiruŋa, aglaan iliŋich nunamiittut, aasii ullaaqsigikpiñ. Piḷuutaitchuatiin Aapa, qaunagikkich ilivich suaŋŋatipkun iñuich qaisatin uvamnun, atautchisun itqulugich atausiŋŋuummatiptiktun.

¹² Qaisatin uvamnun nayuŋŋaisa qaunagiŋagitka ilivich suaŋŋatipkun. Qaunagiŋagitka aasii atausiq unnii tammaŋaitchuq, aglaan taamna iñuk tammaġumaaqtuaq Bible uqaluŋich nalautquvlugich.

¹³ Aasii paŋmapak qaiyasiruŋa iliŋnun, aasii tamatkua aŋaiyyutigigitka takkuanni ukua, iliŋich quviasuutiqpaqaquvlugich quviasuutiqpaqaqtilaaptun.

¹⁴ Uqautiŋagitka piraksriutiŋnik iñuŋnun, aasii nunam iñuŋisa uumigiŋagaich qanuq iliŋich iḷauŋitchut nunam iñuŋiñun, uvaptuttauq nunam iñuŋiñun iḷauŋitchuatun.

¹⁵ Aŋaiyyuŋitchuŋa iliŋnun piiqulugich nunamiñ, aglaan qaunagitquvlugich Tuunġaġmiñ.

¹⁶ Iliŋich iḷauŋitchut nunam iñuŋiñun, uvaptuttauq nunam iñuŋiñun iḷauŋitchuatun.

¹⁷ Ilaaguakkich iliŋnuksriḷugich iḷitchuġipkaġlugich iḷumun ittuanik ilivich uqaluŋnik.

¹⁸ Ilivich tiliŋakamŋali iñupayaanun, tainnatun tiliŋammigitka iñupayaanun.

¹⁹ Aasii iliŋich pisigivlugich ilaaguaqtuŋa uvamnik iliŋnun tuqqutikun, iliŋitchauq ilaaguaqtautquvlugich iḷumutun iliŋnun.

²⁰ Aŋaiyyutiŋitkitka ukua iḷitchitquratka kisiisa, aglaallu taipkua ukpiġumaaqtuat uvamnun quliaqtuaŋannik tusaayugaaġiksuamik.

²¹ Aŋaiyyutigitka iluqaġmiŋ atautchisun itquvlugich. Aapaa, atautchisuttuq illich uvaptiŋni, ilivich uvamniinmatun uvaŋalu iliŋni. Atautchisuttuq illich nunam iñuŋi ukpiliqsitchumiñaqsiḷugich iliŋnun tiliŋatilaamnik.

²² Iḷisimanaqsiŋakavich iliŋnik uvamni, tainnatulli iḷisimanaqsiŋaruŋa uvamnik iliŋiññi, iliŋich atautchisun itquvlugich, uvaptiktun atausiuruatun.

²³ Uvaŋa ilaiññi suli ilivich uvamni, iliŋich atausiŋŋupiaġataġumaut, nunam iñuŋi iḷitchuġiyumiñaqsiyumaut iliŋnun tiliŋatilaamnik nunamun, suli piviuttaġivlugich ilivich piviuttaqsrisiktuttauq uvamnik.

²⁴ Aapaaŋ, kipiġniuqtuŋa taapkua aitchuutigiŋaratin uvamnun itqatigitquvluŋa sumiitkuma, tautuqulugu kamanaqsiḷiqtauniġa. Kamanautiqaqtinŋagiŋma piviuttaġiŋavluŋa nuna savaaguŋaiñŋaan.

²⁵ Nalaunŋaruatiin Aapa, nunam iñuŋisa iḷitchuġiŋaitkaatin, aglaan uvaŋa iḷisimaŋagikpiñ, suli ukua iḷitchitquratka iḷisimarut iliŋnun tiliŋatilaamnik.

²⁶ Iḷitchuġipkaŋagikpiñ ilaiññun, suli iḷitchuġipkavsaaġniaġikpiñ, iliŋich puttuqsrisaiññaqtuaġumaut iliŋnun piviuttaġitilaamiŋnik piviuttaqsrisiktun uvamnik, uvaŋalu iḷumiŋniitilaamnik.