John 16 - Iñupiatun Mumiksat Uqalugiksuat

¹ Uqallausiġiŋagitka tamatkua iluqaisa ukpiġutaiquŋił̣ł̣usi.

² Iñuich aninniaġaasi Jew-guruat aŋaiyyuviŋiññiñ. Iḷumutun, piviksraq tikitchumaaqtuq qakugu kiapayaaq tuqutkumisi isumaniaqtuq ilaa savaurriñasugaluni God-mik.

³ Aasii taamna piñiaġaat ilivsiññun qanuq iḷitchuġiŋaił̣ł̣ugu Aapa, naaggaunnii uvaŋa.

⁴ Aasiuvva tamatkua uqallausiġiŋagitka ilivsiññun, taimña piviksraq tikitpan, itqaquvlugich uqalutka ilivsiññun. Uqautiŋaitkivsi tamatkuniŋa isuaniñqaŋa, qanuq uvaŋa nayuqłusi.

Ilitqusiġiksuam Savaaŋa

⁵ Aasiuvva paŋmapak aullaaqsiruŋa tilirimnun, nallivsiunnii apiġiŋiñmigaaŋa sumuaqsimmagaaġma.

⁶ Pisigivlugu uqaluusiġa tamatkuniŋa ilivsiññun isumaalipiaġataqtusi.

⁷ Suŋiñmiuq, aasii uqallautigivsi iḷumun ittuamik, anniqsuutauniaqtuq ilivsiññun aullaġuma, qanuq aullaŋisuaġuma, Ikayuqtim ullaŋniaŋitkaasi. Aglaan aullaġuma, tiliñiaġiga ilivsiññun.

⁸ Aasii qaigumi, ilaan qanuqpisiiḷḷiñiaġai nunam iñuŋi piḷuutikun nalaunŋarualiqinikullu isivġiġvikullu.

⁹ Qanuqpisiiḷḷiñiaġai piḷuutikun, qanuq ukpiŋitchut uvamnun.

¹⁰ Qanuqpisiiḷḷiñiaġai nalaunŋarualiqinikun, qanuq aullaqtuŋa Aapamun aasii ilivsi tautuaġiŋaiġñiaġivsiŋa.

¹¹ Qanuqpisiiḷḷiñiaġai isivġiġvikun, qanuq Tuunġaq atanauraŋat mattuma nunam iñuŋisa isivġiqsauganiktuq.

¹² Iñugiaktuanik suli uqautiksraqaġaluaqtuŋa ilivsiññun, kaŋiqsiyumiñaitkisi paŋmapak.

¹³ Aglaan Ilitqusiata iḷumun ittuam qaigumi, kaŋiqsisaiññaqtinniaġaasi iluqaanik iḷumun ittuamik, qanuq ilaa uqaġniaŋitchuq ilaan ataniġnaqunmigun, aglaan sunapayaaq tusaarani uqautiginiaġaa. Aasii ilaa quliaqtuaġniaqtuq ilivsiññun sunik qaiyumaaqtuanik.

¹⁴ Ilaan kamanaqsiḷiġniaġaaŋa, qanuq uqautiniaġiga uqalumnik aasii ilaan qaaŋiqsinniaġaiḷḷi ilivsiññun.

¹⁵ Iluqaisa Aapam pigikkaŋi pigigitka. Taamna pisigivlugu uqallaŋaruŋa Ilitqusiġiksuaq uqautiniaġnivḷugu uqalumnik aasii qaaŋiqsinniaġai ilivsiññun.

Isumaaġullu Quviasuullu

¹⁶ Tautuaġiŋaiyasigivsiŋa. Aasiisuli sivikitchuami tautugniaġivsiŋa.

¹⁷ Iḷaŋich iḷitchitquraŋisa uqaurrutiŋarut avanmun, Sumik sivuniqaqługu uqallakpa, Tautuaġiŋaiyasiñivḷuni, aasiisuli, sivikitchuami tautugniaġivsiŋa? Suli sumik sivuniqaqługu uqallakpa uqallakami, Qanuq aullaqtuŋa Aapamun?

¹⁸ Iliŋich uqallaŋarut, Sumik sivuniqaqpauŋ uqallausiġikamiuŋ sivikitchuamiiġniñi? Nalugikput sumik uqautiqaqtilaaŋanik.

¹⁹ Jesus iḷisimaŋaruq apiġisuktilaamiñik iliŋiññun aasii uqallautiŋagai, Apiqsruqtuutivisi ilivsiññun sumik sivuniqaqtilaaŋanik uqallakama, tautuaġiŋaiyasiñivḷuŋa, aasiisuli, sivikitchuami tautugniaġnikama ilivsiññun?

²⁰ Iḷumutupiaġataq uqallautigivsi, qianiaqtusi suli kiŋuvġulusi, aglaalli nunam iñuŋi quviasugniaqtut. Isumaaqpagniaqtusi, aglaan isumaaŋaiġḷusi quviatchagniaqtusi.

²¹ Aġnaq iġñisuliaqsikami sivuuġasuuruq, qanuq piviksraŋa tikitchuq. Aasii iġñianikami, itqaumaŋaiġayukkaa iłuiḷḷiuġun, quviasuutinikłuni miqłiqtuni animman.

²² Tainnatun isumaaġutiqaqtusi paŋmapak, aglaan taututqigñiaġivsi aasii quviatchaktitaupiaġniaqtusi, suli kiapayaaq ipiqtusuliqsitchumiñaitkaasi.

²³ Taivrumani uvlumi apiqsruqtuġniaŋitkivsiŋa sutigun. Iḷumutupiaġataq uqallautigivsi, qiññuaġuvsi supayaamik Aapamiñ, aitchuutiginiaġaa ilivsiññun uvaŋa iḷitchitquraġikavsi.

²⁴ Paŋmapaŋmun aglaan apiqsriŋaitchusi sumik atipkun. Apiqsrisitchi, aasii aitchuusiaqaġniaqtusi quviasuutiksi naamatqulugu.

Jesus Akimaruq

²⁵ Uqautigiŋagitka tamatkua ilivsiññun uuktuutitigun. Piviksraq tikitchumaaqtuq tavraŋŋaaglaan uqaŋaiġviksraġa ilivsiññun uuktuutiqaġluŋa, aglaan uqautilusi Aapakun kaŋiqsiñaqsiḷugu.

²⁶ Taimña piviksraq tikitpan apiqsriñiaqtusi aŋaiyyulusi Aapamun atipkun. Uvaŋaunnii apiqsrisiŋiḷḷuġivsi Aapamun, aitchuġumiñaġaasi,

²⁷ qanuq Aapam ilaan piviuttaġigaasi ilivsi piviuttaġiŋakavsiŋa, suli ukpiliŋakavsi uvaŋa qaiŋatilaamnik God-miñ.

²⁸ Qaiŋaruŋa Aapamiñ aasii nunamukłuŋa. Qimaaqsiḷgitkiga nuna utiqsaqłuŋa Aapamun.

²⁹ Ilaan iḷitchitquraŋisa uqallautiŋagaat, Aaŋ, paŋmapak uqaqtutin kaŋiqsiñaqsipiaqługu uuktuutiŋiḷaatigun.

³⁰ Paŋmapak iḷitchuġirugut iḷisimatilaaġnik supayaanik. Nalupqisuŋaiqsugut apiqsruutiksraiqsugullu. Taamna pisigivlugu ukpiqtugut ilivich qaiŋatilaaġnik God-miñ.

³¹ Jesus kiuŋagai, Paŋmapak ukpiliqpisi?

³² Piviksraq qairuq, iḷumun tikisaniktuq, ilivsi siamitauniaqavsi, iñullaa aimaaġviŋmiñun, aasii kisiŋŋuġluŋa. Aglaan kisimġiuŋiñmiuŋa, qanuq Aapam nayuġaaŋa.

³³ Uqautiŋagivsi tamatkuniŋa tutqiutiqaquvlusi atausiŋŋuqatigiŋakavsiŋa. Nunami iłuiḷḷiuġutiqpaqaġniaqtusi, aglaan qapiŋairrutiqaġluataġitchi, uvaŋa akiiḷipiaġataŋagitka nunam iñuŋi iłuiḷḷiuqtitchiruat ilivsiññik.