John 15 - Iñupiatun Mumiksat Uqalugiksuat

Jesus Iḷumun Napaaqtuayaapiatun Ittuq

¹ Uvaŋa iḷumun napaaqtuayaapiatun ittuŋa, aasii Aapaga qaunaksritun ittuq napaaqtuayaamik.

² Qisiqsiutipayaaq uvamniittuaq siiġñiḷaiñman, ilaan piiġaa. Aasii qisiqsiutipayaaq siiġñisuuruaq nauyumiññaksaġuugaa siiġñivsaaquvlugu.

³ Ilivsi salummaanikkaasi uqaluich uvaŋa uqautigikkaġma ilivsiññun.

⁴ Atausiŋŋuqatigimaaqsiŋa, uvaŋaptauq atausiŋŋuqatigimaaġniaġmigivsi. Qisiqsiun siiġñiyumiñaitchuq inmisun pituummiŋitkumi napaaqtuayaamun, tainnatuttauq atausiŋŋuqatigimaaŋisuaġuvsiŋa piyumiñaitchusi piraksriutimnik.

⁵ Uvaŋa napaaqtuayaatun ittuŋa, ilivsiḷi qisiqsiutitun ittusi. Tavraasii siiġñiqpaŋmatun piñiaqtusi atausiŋŋuqatigimaaġuvsiŋa, qanuq atausiŋŋuqatigiŋaisuaġuvsiŋa sumik piyumiñaitchusi.

⁶ Iñuk atausiŋŋuqatauŋaitchuaq uvamnun qisiqsiutitun igitauvluni palliġuqtuatun ittuq. Palliich qisiqsiutit katitchuugaich aasii igiłługich igniġmun aasii ikirauvlutiŋ.

⁷ Ilivsi atausiŋŋuqatigimaaġuvsiŋa suli kamagituiññaġlugich uqalutka, apiqsrisitchi supayaamik pisukkavsiññik qaisauniaqtuq ilivsiññun.

⁸ Siiġñiqpakavsi satqummiġiksi Aapama kamanautaa. Tainna pikavsi, ukpiġnaqsigiksi iḷitchitqurautilaaqsi uvamnun.

⁹ Aapam piviuttaġimmaŋa piviuttaqsrisiatun piviuttaġimmigivsi. Iñuusiqaġitchiḷi piviuttaġipkaġumiñaqsiḷusi uvamnun.

¹⁰ Ilivsi kamagiguvsigik pitquratka, piviuttaġipkaġniaqtusi uvamnun, uvaŋaptauq kamagimmatun Aapama pitquraŋi aasii piviuttaġipkaqłuŋa ilaanun.

¹¹ Tamatkuniŋa uqautiŋagivsi, uvaŋa quviasuutiga iḷuvsiññiitquvlugu, suli quviasuurri naamatquvlugu.

¹² Uvva uvaŋa pitquraġa, piviuttaqqutisitchi avanmun piviuttaqsriñiptun ilivsiññik.

¹³ Kiñaliqaa kamanałhaaqtuamik piviuttaqqutaitchuq uumaŋŋa, iñuum tuqqutigimmagich avilaitqatini.

¹⁴ Avilaitqatigigivsi kamaksriguvsi pitquramnik ilivsiññun.

¹⁵ Tavraŋŋaaglaan taiŋaiġivsi kivganik, qanuq kivgaq naluruq suliqitilaaŋanik atanini, aglaan taigivsi avilaitqatinik, qanuq iluqaiññik iḷitchuġipkaŋagivsi tusaaŋakkamnik Aapamniñ.

¹⁶ Ilivsi piksraqtaaġiŋaitkivsiŋa, aglaan uvaŋa piksraqtaaġiŋagivsi aasii nalunaiqł̣usi aullaqtuksrauvlusi quliaqtuaġutiyaqtuġlugich iñuich tusaayugaaġiksuanik ukpiġumiñaqsiḷugich. Iliŋich siiġñiaġimmatun piñiaġisi nuŋulaiḷaagummatun illugich. Tavraasii sunapayaaq apiqsriaġikkaqsi Aapamun atipkun, ilaan aitchuutigiyumiñaġniaġaa ilivsiññun.

¹⁷ Uumiŋa pitqurriġivsi, piviuttaqqutisitchi avanmun.

Nunam Iñuŋi Uumikłiqsut

¹⁸ Nunam iñuŋisa uumigikpasi, itqaumaruksraurusi uumigiqqaaŋagaanŋa uumikłiqsaŋaunnatiŋ ilivsiññik.

¹⁹ Ilivsi atausiŋŋuqatigimaaġuvsigik nunam iñuŋi, nakuaġinayaġaasi nakuaqsrisimiktun ilaisa iḷamiŋnik. Aglaan nunam iñuŋisa uumigigaasi qanuq atausiŋŋuqatigimaaŋitkisi, uvaŋa piksraqtaaġiŋavlusi iliŋiññiñ pigisukłusi uvaŋa.

²⁰ Itqaumasigik uqaluich uqallautitka ilivsiññun, kivgaq kamanałhaaŋitchuq ataniġmiñiñ. Iliŋisa nagliksaaqtinŋakpanŋa, nagliksaaqtinniaġmigaasivsauq. Iliŋisa kamagiŋakpatigik uqalutka, kamaginiaġmigaitchauq uqalusi.

²¹ Aglaan tamarra tamatkua piñiaġaich iluqaisa ilivsiññun uvaŋa pigikkavsi, qanuq ilaisa naluvlugu taamna tilisiruaq uvamnik.

²² Qaiŋaiḷḷuŋa uqautiŋaitkupkich pasirauyumiñaitkaluaqtut, aglaan paŋmapak pasiraurut piḷuunmikkun.

²³ Iñuum uumikłiqsuam uvamnik uumigimmigaaptauq Aapaga.

²⁴ Savaŋaitkuma savaanik akunġanni iñuum allam piŋaisaŋiñik, pasirauyumiñaitkaluaqtut. Aglaan paŋmapak tautuŋarut savaamnik suli uumigivlunuk uvaŋalu Aapagalu.

²⁵ Taamna taŋŋiutausaġniqsuq uqaluŋmun aglausimaruamun ilaisa pitquraŋiññi, “Ilaisa uumigiŋagaanŋa patchisaiḷaakun.”

²⁶ Aglaan Ikayuqti qaikpan, uvaŋa tiliñiakkaġa ilivsiññun Aapamiñ, taamna Ilitqusia iḷumun ittuam qairuaq Aapamiñ, ilaa iḷitchuġipkaiñiaqtuq uvapkun.

²⁷ Aasiivsauq ilivsi quliaqtuaġiniaġmigivsiŋa, qanuq nayuŋagivsiŋa isuaniñqaŋa.