John 14 - Iñupiatun Mumiksat Uqalugiksuat

Jesus Apqutauruq Aapamun

¹ Isumaaluutaittitchi. Ukpiqsimaaġitchi God-mun, ukpiqsimaaġitchiḷu uvamnun.

² Aapama igluqpaŋani iñugiaktut inillaat. Taamna tainnainŋitpan, uqallautiniaġaluaġivsi. Aullaaqsiruŋa itqanaiyaġiaġlugu iniksraqsi.

³ Aasii aullaġuma itqanaiyaġiaġlugu iniksraqsi, qaitqigñiaġmiuŋa aasii nayuqsiutilusi uvamnun, sumiitkuma tavranivsauq itquvlusi.

⁴ Aasii iḷisimagiksi apqutaa aullaġviksraunma.

⁵ Thomas uqallautiŋagaa, Ataniiq, nalurugut sumugniaqtilaaġnik, qanuġlugu iḷisimaniaqpisigu apqun?

⁶ Jesus kiuŋagaa, Uvaŋa apqutauruŋa, iḷumun ittuaġlu, iñuggullu. Kiñaliqaa Aapamukkumiñaitchuq aglaan uvapkun kisian.

⁷ Iḷisimaŋaguvsiŋa, iḷisimayumiñaŋagaluaġmigiksi Aapaga. Tavraŋŋaaglaan iḷitchuġigiksi suli tautuaniŋagiksi.

⁸ Philip uqallautiŋagaa, Ataniiq, tautuktittigut Aapamik aasii katchuġniaqtugut.

⁹ Jesus uqallautiŋagaa, Itqatigiŋagaluaġikpiñ sivisuruamik, naluviŋa suli Philip? Iñuum tautuŋaruam uvamnik tautuŋammigaa Aapa. Qanuġlutin uqallakkumiñaqpich, tautuktittigut Aapamik?

¹⁰ Ukpiŋitpich uvaŋa Aapamiitilaamnik suli Aapa uvamniitilaaŋanik? Uqaluich uqalugikkatka ilivsiññun uqautigilaitkitka uvaŋa ataniġnaqutipkun, aglaan Aapam iñuuruam uvamni pigai savaani.

¹¹ Ukpiġisiŋa uqallakama Aapamiitilaamnik suli Aapa uvamniitilaaŋanik, naaggaunnii ukpiġisiŋa pisigilugich savaatka.

¹² Iḷumutupiaġataq uqallautigivsi, iñuk ukpiqtuaq uvamnun piñiaġmiuq savaanik pikkamnik, suli kamanałhaaqtuanik savaanik makkunaŋŋa ilaa piñiaqtuq, qanuq aullaaqsiruŋa Aapamun.

¹³ Sunapayaaq apiqsriaqsi atipkun, piñiaġiga, Aapa kamanaqsipkaqtautqulugu Iġñikun.

¹⁴ Apiġiguvsiŋa supayaamik atipkun, piñiaġiga.

Ilitqusiġiksuaq Unniqsuqłiisauruq Qaipkaġniaġnivḷugu

¹⁵ Piviuttaġiguvsiŋa, kamagisigik pitquratka.

¹⁶ Aasii aŋaiyyuviginiaġiga Aapa, ilaanun aitchuqulusi allamik Ikayuqtimik nayuqtiksravsiññik isuitchuamun.

¹⁷ Taamna Ilitqusia iḷumun ittuam, nunam iñuŋisa akuqtuġumiñaisaŋat qanuq tautulaitkaat naaggaunnii nalugaat. Ilivsi iḷisimagiksi, qanuq iñuuqatauruq piqatigivlusi, suli iḷuvsiññiinniaqtuq.

¹⁸ Qimaŋniaŋitkivsi kisiŋŋuġruiññaġlusi, aglaan qaiñiaqtuŋa ilivsiññun.

¹⁹ Sivikitchuami nunam iñuŋisa tautuaġiŋaiġñiaġaanŋa, aglaan tautugniaġivsiŋa, qanuq iñuuŋaiḷaiññama ilivsivsauq iñuuniaġmiusi.

²⁰ Taamna uvluq tikitpan, iḷisimaniaqtusi uvaŋa Aapamniitilaamnik, suli ilivsi uvamni, aasiivsauq uvaŋa iḷuvsiññi.

²¹ Iñuk iḷisimaruaq pitquramnik kamagivlugiḷḷu piviuttaġigaaŋa. Aapama piviuttaġiniaġaa piviuttaqsriruaq uvamnik, aasiivsauq piviuttaġiniaġmigiga suli iḷisimapkaġniaqtuŋa ilaanun.

²² Judas Iscariot-guŋitchuaq uqallaŋaruq ilaanun, Ataniiq, qanuġlutin iḷisimapkaġniaqpich uvaptiŋnun, iḷisimapkaġaluaġnak nunam iñuŋiñun?

²³ Jesus kiuŋagaa, Iñuum piviuttaġigumiŋa kamaginiaġai uqalutka, aasiiḷi Aapama piviuttaġiniaġaa, aasii uvaguk qaiñiaqtuguk ilaanun suli ilaa iñuuqatigilugu.

²⁴ Iñuk piviuttaqsriŋitchuaq uvamnik kamaksriḷaitchuq uqalumnik, aasii uqaluich tusaakkasi uvaŋa uqalugiŋitkitka aglaan uqalugigai Aapam tilisiruam uvamnik.

²⁵ Tamatkuniŋa uqautiŋagivsi itqatigiŋŋavsisuli,

²⁶ aglaan imma Ikayuqti, Ilitqusiġiksuaq, Aapam tiliñiakkaŋa uvamnik pirritqulugu, iḷisautiniaġaasi supayaanik suli itqaqtinniaġaasi iluqaiññik uqalugiŋakkamnik ilivsiññun.

²⁷ Qimaaqsikavsi tutqiqugivsi. Tutqigitchi uvaptun tutqiksuatun. Nunam iñuŋi tutqiutaitchut tutqiutipiamik tutqiutiqaqtirrutiptun ittuamik. Isumaaluutaittitchi iqsiñasiḷu.

²⁸ Tusaaŋagivsiŋa uqallautikavsi, aullaġniaġnivḷuŋa suli utiġniaġnivḷuŋa ilivsiññun. Piviuttaġipiaŋaguvsiŋa quviasugniaŋagaluaqtusi aullaġniaġnikama Aapamun, Aapakiataŋ kamanałhaaqtuq uvamniñ.

²⁹ Aasii paŋmapak kilianikkivsi taŋŋiŋaiñŋaan nalaulġiñaqpan ukpiliquvlusi.

³⁰ Tavraŋŋaaglaan uqaqatigipiaŋaiġñiaġivsi, qanuq Tuunġaq, atanauraŋat nunam iñuŋisa, qaigaqsiruq tigutaaqtitchukłuŋa. Suaŋŋataitkaluaqtuq payariyumiñaġluŋa.

³¹ Tuqutinniaqtuŋa. Taamna piraksriutigiŋagaa Aapam uvamnun, iḷitchuġipkaqsaġlugich iñupayaat uvamnun piviuttaġitilaaŋa Aapa. Makittitchi, aullaqta uvaŋŋa.