John 13 - Iñupiatun Mumiksat Uqalugiksuat

Jesus Iqaġigai Iḷitchitqurami Isigaŋich

¹ Tavra sivuani niqinaqivian Itqautim Qulaurrusiqiviŋmun, Jesus iḷitchuġiŋaruq ikarraq tikisilaaŋanik aullaġviksrani mattumaŋŋa nunamiñ Aapamun. Aasii ilaan piviuttaġivlugich nanmiñiq piñi nunamiittuat piviuttaġiŋagai isuanun-aglaan.

² Tavra Jesus-lu iḷitchitquraniḷu nullautchiŋarut. Tuunġaum isummiŋagaa Judas Simon Iscariot iġñiŋa aitchuutigitquvlugu Jesus.

³ Tavra Jesus iḷisimaŋaruq Aapamun qaisilaaŋanik iluqaan suaŋŋan inmiñun, suli iḷisimaŋammiuq qaiŋatilaamiñik God-miñ suli aullaġniaqtilaamiñik God-mun.

⁴ Jesus tavrani makinŋaruq niġġiviŋniñ, iḷivḷugich qalliich annuġaani, tavsiŋaruq imaiyaunmik.

⁵ Tavra kuvisiŋaruq imiġmik iqaqqiviŋmun, aasii iqaġirraqsivḷugich iḷitchitqurat isigaŋich, saluaqtiqługich imaiyaunmik tavsigikkamiñik.

⁶ Tikiñŋagaa Simon Peter, aasii Peter-m apiġiŋagaa, Ataniiq, iqaġiaqsivigich isigatka?

⁷ Jesus kiuŋagaa, Sutilaaġa nalugaluaġiñ paŋmapak, aglaan aquvatigun kaŋiqsiñiaqtutin.

⁸ Peter-m uqallautiŋagaa, Iqaġiyumiñaipiaġitin isigatka. Jesus kiuŋagaa, Iqaġiŋitkupkiñ, piqatauyumiñaitchutin uvamnun.

⁹ Simon Peter-m uqallautiŋagaa, Ataniiq, iqaġikkich isigałhiñaŋiḷaatka aglaan argatka niaquġalu.

¹⁰ Jesus uqallautiŋagaa, Iñuk ivvaqtuaniŋaruaq iqaġiraksraitchuq isigaŋiaglaan, qanuq salummaqtuq tamaġmi. Aasiuvva salumarusi, aglaan tamatkiŋitchusi.

¹¹ Qanuq Jesus iḷisimaŋaruq kimun aitchuutiginiaqtilaamiñik, taamna pisigivlugu ilaa uqallaŋaruq, Tamatkiġḷusi salummaŋitchusi.

¹² Iqaġianikamigich isigaŋich, tiguanikługiḷḷu qalliich annuġaani, inimiñukami uqallautiŋagai, Iḷisimavisi sutilaamnik ilivsiññun?

¹³ Taisuugivsiŋa Iḷisaurrimik Ataniġmiglu, aasii nalauttusi qanuq tainnasiuruŋa.

¹⁴ Uvaŋaasii, ilivsi Ataniqsi Iḷisaurriksiḷu, iqaġiŋagupkich isigasi, ilivsivsauq iqaġiraksraġigaluaġmigisi isigasi avanmun.

¹⁵ Qanuq tuvraaksriŋagivsi, ilivsiḷi piruksraugaluaqtusi pikkaptun ilivsiññun.

¹⁶ Iḷumutupiaġataq uqallautigivsi, kivgaq una kamanałhaaŋitchuq ataniġmiñiñ, naaggaunnii taamna tilirauruaq kamanałhaaŋiñmiuq taavrumaŋŋa tilirimiñiñ.

¹⁷ Tamatkua iḷisimaguvsigik, quviaginiaġisi piguvsigik.

¹⁸ Sivuniġiŋitkivsi iluqasi, iḷisimagitka piksraqtaatka. Taamna ittuq Bible uqaluŋich nalautitquvlugich. “Iñuk niġiŋaruaq punniġutimnik paaqłaŋasiruq uvamnun.”

¹⁹ Uqallautigivsi taavrumiŋa paŋmapak taŋŋiqsaŋaiñŋaan, nalautpan ukpiliquvlusi Christ-gutilaamnik.

²⁰ Iḷumutupiaġataq uqallautigivsi, iñuk taamna akuqtuiruaq kimigliqaa tilikkamnik akuqtuiruq uvamnik, aasiivsauq taavruma akuqtuiruam uvamnik akuqtuġmigaa tiliriga.

Jesus Uqautigigaa Piŋaiñŋaan Aitchuutauniksrani

²¹ Tavra Jesus tainna uqaanikami, iłuiḷḷiuqpaliŋaruq aasii uqallakłuni, Iḷumutupiaġataq uqallautigivsi, iḷavsi aitchuutiginiaġaaŋa.

²² Tavra iḷitchitqurat qiñiġutiŋarut avanmun, nalupqisukłutiŋ kimik uqautiqaqtilaaŋanik.

²³ Iḷaŋat iḷitchitquraŋisa, Jesus piviuttaġikkaŋa, ikusiksimaaŋaruq qaniłłuni Jesus-mun.

²⁴ Tavra Simon Peter-m kiruaqtuŋagaa niaqqumiñik sivuniqaqługu, apiqquuŋ kimik uqautiqaqtilaaŋanik.

²⁵ Tavra tainna ikusiksimaallaġmi qaniłłuni Jesus-mun uqallautiŋagaa, Ataniiq, kiuva?

²⁶ Jesus kiuŋagaa, Taamnauruq aitchuġniakkaġa uumiŋa punniviñauramik misuqqaaġlugu. Tavra misuqqaaqługu punniviñauraq, qaiñŋagaa Judas-mun, iġñiŋanun Simon Iscariot.

²⁷ Tavra Jesus qaisaniŋmagu punniviñauraq Judas-mun, Satan isiŋaruq ilaanun. Jesus uqallautiŋagaa, Piyumakkan piuŋ qilamik.

²⁸ Tavra kiñaliqaa niġġiviŋñi kaŋiqsiŋitchuq summan Jesus taavrumiŋa uqallaktilaaŋanik Judas-mun.

²⁹ Judas pigimmagu maniqaġviŋat, iḷaŋich isumaŋarut Jesus-mun uqallautinasugalugu, tauqsiġiaquvlugu pigiraksraġikkaġmiŋnik niqinaqikpata, naaggaqaa aitchuiyaqtuqunasugalugu iḷiappauruanun.

³⁰ Tavra, aitchuusiaġianikamiuŋ punniviñauraq, tavrauvvaa Judas aniŋaruq. Unnuaguruq.

Nutauruaq Pitquraq

³¹ Tavra Judas anianiŋman, Jesus uqallaŋaruq, Paŋmapak Iġñiŋa Iñuum kamanaqsipkaqtauruq, aasii God kamanaqsipkaqtaummiuq ilaagun.

³² Tavra God kamanaqsipkaqtaukpan ilaagun, God-iptauq kamanaqsipkaġniaġmigaa Iġñiŋa Iñuum, suli kamanaqsipkaġlugu tavrauvvaa.

³³ Miqłiqtuuraat, paŋmapak itqatigiurallakkivsi. Ivaġniaġivsiŋa. Aasii uqallausivsun Jew-guruanun paŋmapaktauq uqallautigivsi, qaiyumiñaitchusi aullaġviksrautimnun.

³⁴ Aitchuġivsi nutauruamik pitquramik, ilivsi piviuttaqqutisitchi avanmun, uvaŋaptauq piviuttaqqutiqaqtuatun ilivsiññun, piviuttaqqutisitchi avanmun.

³⁵ Piviuttaqqutiguvsi avanmun, iñupayaat iḷisimaniaqtut ilivsi iḷitchitquraġitilaavsiññik uvamnun.

Jesus Uqautigigaa Piŋaiñŋaan Peter-m Piiḷaaġniŋa

³⁶ Simon Peter-m apiġiŋagaa, Ataniiq sumuŋniaqpich? Jesus kiuŋagaa, Aullaġviksrautimnun malikkumiñaitkivsiŋa paŋmapak, aglaan maligutiniaqtusi aquvatigun.

³⁷ Peter-m apiġiŋagaa, Ataniiq summan malikkumiñaitpigiñ paŋmapak? Itqanaitchuŋa tuqqutisukłutin.

³⁸ Jesus kiuŋagaa, Itqanaipiaqpich tuqqutisukłuŋa? Iḷumutupiaġataq uqallautigikpiñ, tiŋmiaq nipanniaŋitchuq iliŋnun piiḷaaġiŋaunnaŋa piŋasuni.