John 1 - Iñupiatun Mumiksat Uqalugiksuat

Uqaluk Iñuuruaq

¹ Aullaqisaamiñqaŋa, taamna taggisiqaqtuaq Uqaluŋmik itaniŋaruq supayaat savaaguŋaiñŋaisa. Uqaluk itqatauŋaruq God-mun. Suli Uqaluk God-auŋaruq.

² Tavraasii Uqaluk itqatauŋaruq God-mun aullaqisaamiñqaŋa,

³ aasii taavrumuuna Uqalukun God-im savaŋagai supayaat, suli atausiuraq-unnii savaaguŋaruaq savaaguŋaitchuq ilaa piiḷḷugu.

⁴ Uqaluŋmiñ kaŋiqaŋaruq iñuggun, aasii taavruma iñuggutim qaġġirrigai iñuich qaummaġmik, iḷisautivlugich God-im iḷumun ittuaŋanik.

⁵ Qaummaqtun qaummaġiksuatun taaqtuami, suli taaqtuam qamilaiñmatun qaummaq, ilaalli iḷisautiŋagai iñuich God-im iḷumun ittuaŋanik aasii tamatkua akiḷḷiḷiqsuutiruat ilaanun payariŋaitkaat ilaa.

⁶ Iñuqaŋaruq atiqaqtuamik John-mik tiliŋaraanik God-im.

⁷ John qaiŋaruq quliaqtuaġiyaqtuqługu ilaa taamna qaummaqtun ittuaq, iñuich iluqaġmiŋ ukpiquvlugich.

⁸ John taamnauŋaitchuq qaummaqtun ittuatun, aglaan qaiŋaruq quliaqtuaġisukługu taamna qaummaqtun ittuaq,

⁹ iḷisaurriruaq iḷumun ittuamik, qaigaqsiruaq nunamun qaġġirriḷuni qaummaġmik iñupayaanun.

¹⁰ Ilaa nunamiinŋaruq, ilaan savaŋagaa nuna, aasiiḷi nunapayaat naluŋagaat.

¹¹ Ilaa qaiŋaruq pimiñun, aasii nanmiñiq iñuŋisa akuqtuŋaitkaat.

¹² Aglaan iluqaisa akuqtuqtini ukpiqtuat inmiñun, ilaan miqłiqtuliutipkaŋagai God-mun.

¹³ Tamatkua aniŋaitchut iñugruiññaum aniñiŋa tuvraġlugu, naaggaunnii pisuutaa iñuum. Iliŋich anitqiŋarut pisuutaagun God-im.

¹⁴ Tavra taamna taggisiqaqtuaq Uqaluŋmik iñuġuŋaruq aasii iñuuqataullakłuni uvaptiŋni, naamaruamik nagliktuutiqpaqaqłuni iḷumun ittuaguvluniḷu. Uvagut tautuŋagikput kamanautaa, kamanaun kisimisualuk Iġñitualuuruam Aapamun pigikkaŋa.

¹⁵ John quliaqtuaqaŋaruq ilaanik, suli nipatuvluni uqaqłuni, Uvva taimña quliaqtuaġiŋaraġa, iñuk qairuaq aqupkun kamanałhaaqtuq uvamniñ, qanuq sivumni inŋaruq.

¹⁶ Suli naammataaniñ ilaan nagliktuutiqpaŋmi, nagliktuġayukkaatigut iluqata, aitchuqtuaqłuta nagliktuutinik maligiikł̣ugich.

¹⁷ God-im qaiñŋagai pitqurat Moses-kun, aglaalli nagliktuutiqpak iḷumun ittuaġlu qaisauŋaruk Jesus Christ-kun.

¹⁸ Kialiqaa tautuŋaitkaa God qaŋaunnii, aglaan Iġñitualuum piviuttaġitchiqsuam Aapamiñ iḷitchuġipkaŋagaa.

John Paptaiqsim Uqaluŋi

¹⁹ Uvvali uqaluktuaŋi John. Jew-guruat tilisiŋarut aŋaiyyuliqsimiŋnik Levi-ñiglu Jerusalem-miñ apiqsruġiaqługu kiummagaan.

²⁰ John-gum kiuŋagai nalupqinaiqł̣ugu, Uvaŋa Christ-guŋitchuŋa.

²¹ Tavra apiġiŋagaat, Kiuviñmi? Elijah-uvich? Ilaa uqallaŋaruq, Elijah-uŋitchuŋa. Uqaqtauvich God-mun Moses-tun itchumaaqtuaq? Ilaan kiuŋagai, Naagga.

²² Ilaisa apiġiŋagaat, Kiuviñmi? Kiggutiksraqaġumaugut tilisiruanun uvaptiŋnik. Qanuq uqallausiġiyumiñaqpich ilipkun?

²³ Ilaa uqallaŋaruq, Uvaŋa nipatuvluŋa uqaqtuŋa nunagluktuami, uqaluatun Isaiah-m God-im uqaqtaata uqallaŋamman, “Sivukkiksaqsiuŋ apqutaa Atanġum.”

²⁴ Taapkua apiqsruqtuiruat John-mik tilirauŋaniqsut Pharisee-ñiñ.

²⁵ Ilaisa apiġiŋagaat, Christ-guŋitkuvich, naaggaunnii Elijah-uŋitkuvich, naagga taimñauŋitkuvich uqaqtaa God-im, summan paptaiqsivich?

²⁶ John kiuŋagai, Uvaŋa paptaiġutiqaqtuŋa imiġmik. Akunnavsiññi imma makitaruq nalukkaqsi,

²⁷ taimña qaiyumaaqtuaq aqupkun, aasii nalliummatiŋitchuŋa siŋiiġumiñaġlugik unnii siŋiŋik aluġutiŋikta.

²⁸ Tamatkua piŋarut Bethany-mi Perea-mi taavanitchiani Jordan, John paptaiqsiviani.

God-im Imnaiyaaŋa

²⁹ Uvlutqiŋman John-gum tautuŋagaa Jesus qairuaq tuŋimiñun, aasii uqallaŋaruq, Avva, Imnaiyaaŋa God-im piiqsiruaq piḷuutiŋiññik nunam iñuŋisa.

³⁰ Taavva taimña uqallausiġiŋaraġa, aqupkun iñuk qaiñiaqtuq kamanałhaaqtuaq uvamniñ, qanuq aniŋaiñŋaġma sivumni inŋaruq.

³¹ Naluŋagaluaġiga uvaŋaġruiññaq kisuutilaaŋanik taimña iñuk, naaggauvva tilirauŋaruŋa paptaiġutiqaquvluŋa imiġmik iḷitchuġipkaquvlugu Israel-guruanun kisuutilaaŋanik.

³² Tavra John quliaqtuaŋaruq uqaqłuni, Tautuŋagiga Ilitqusiġiksuaq atqaqtuaq tiŋmiatun qiḷaŋmiñ, aasii ilaaniiłłuni.

³³ Taamna piŋaiñŋaan, naluŋagaluaġiga kisuutilaaŋa, aglaan God-im tilisiruam uvamnik paptaiqsitquvluŋa paptaiġutiqaġluŋa imiġmik uqallautiŋagaaŋa, Iñuk tautukkupku Ilitqusiġiksuam atqaġvigikpagu aasii nayuġlugu, taamnauruq iḷisiñiaqtuaq Ilitqusiġiksuamik iḷuvsiññun.

³⁴ Aasii tautuŋavlugu quliaqtuaġigiga ilaa Iġñiġinivḷugu God-mun.

Sivulliik Iḷitchitqurak Jesus

³⁵ Uvlaakumman John makitaqatigiŋagik iḷitchitquraŋni,

³⁶ aasii qiñiqługu Jesus pisuaqtillugu uqallaŋaruq, Avva God-im Imnaiyaaŋa.

³⁷ Iḷitchitqurak tusaaŋagaak taamna uqallausiġimmagu, aasii maliŋagaak Jesus.

³⁸ Jesus kiŋiaqłuni tautuŋagik maliktuak, aasii uqallautiŋagik, Suvisik? Iliŋikta apiġiŋagaak, Rabbi, (sivuniqaqtuaq Iḷisaurrii), sumi iniqaqpich?

³⁹ Ilaan uqallautiŋagik, Qaiḷutik tautugiatku. Tavra tautugiaŋagaak sumi iniqaqtilaaŋa, aasii nayuŋagaak taavrumani uvlumi, qanuq sisamanukpalliqł̣uni.

⁴⁰ Andrew, Simon Peter-m aniqataa igḷuuŋaruq maliktuamun Jesus-mik tusaaqqaaqługu John uqallaŋman.

⁴¹ Ilaan paqitqaaŋagaa aniqatini Simon, aasii uqallautivlugu, Paqinŋagikput Messiah (sivuniqaqtuaq Christ-mik).

⁴² Ilaan qaġġisiŋagaa Jesus-mun. Jesus qiñiqługu uqallautiŋagaa, Simon-gurutin, iġñiŋa John. Tavraŋŋaaglaan atiqaġniaqtutin Cephas-mik (sivuniqaqtuamik Peter-mik Uyaġagmiglu).

Jesus Ququaġik Philip-lu Nathanael-lu

⁴³ Uvlaakumman Jesus sivunniŋaruq Galilee-mugukłuni. Paqiłługu Philip uqallautiŋagaa, Maliŋŋa.

⁴⁴ Philip Bethsaida-ġmiuguŋaniqsuq, iniqpaŋmi Andrew-vlu Peter-vlu iñuuviaŋni.

⁴⁵ Tavra Philip paqinŋagaa Nathanael, aasii uqallautivlugu, Paqinŋagikput iñuk Moses-gum pitqurani uqaqtiŋisalu God-im aglautiŋaraat. Taamnauruq Jesus Nazareth-miu, Joseph-gum iġñiŋa.

⁴⁶ Nathanael-gum uqallautiŋagaa, Sunapayaaq nakuuruaq qaiyumiñaqpa Nazareth-miñ? Philip-gum kiuŋagaa, Qaiḷutin tautugiaġuŋ.

⁴⁷ Jesus tautukamiuŋ Nathanael ullautiruaq inmiñun, uqallautiŋagaa, Uvva Israel-miupiaġataq, inmiñi sagluqqutaitchuaq.

⁴⁸ Nathanael-gum uqallautiŋagaa Jesus, Qanuqłutin iḷisimaviŋa? Tavra Jesus kiuŋagaa, Philip-mun qaitquŋaiñŋaqpich tautuŋagikpiñ ataaniitillutin fig napaaqtuata.

⁴⁹ Nathanael-gum kiuŋagaa, Rabbi, Iġñiġigaatin God-im. Umialigigaatin Israel-guruat.

⁵⁰ Tavra Jesus kiuŋagaa, Uvva uqallautikapkiñ tautugnivḷutin fig napaaqtuata ataani ukpiliqpich? Tautukkumaaqtutin kamanałhaaqtuanik taavsrumaŋŋa.

⁵¹ Suli Jesus uqallautivsaaŋagaa, Iḷumutupiaġataq uqallautigikpiñ, tautugniaġiñ qiḷak aŋmaqtuaq, suli God-im isaġuliŋi mayuqtuat atqaqtuallu Iġñiŋanun Iñuum.