James 5 - Iñupiatun Mumiksat Uqalugiksuat

Kiliktuun Suġalliruanun

¹ Naalaġnisiŋa, ilivsi suġalliruasii, qiasitchi siaqqaulasitchiḷu pisigilugu iłuiḷḷiuqpakkumaaġniqsi.

² Suġalisi siŋñagivlugich tutquqtaġikkasi maquŋarut, annuġaasiḷu qupilġut niġigaich.

³ Maniutisi kaviqsuat qatiqtuallu qaliŋagai, aasii qaliqtauniŋich nalupqinaiġutauniaqtut ilivsi siŋñatutilaavsiññun aasii nunuuraliqsiqpaglusi timiriunnii igniġum ikiraŋatun piḷusi, qanuq ilivsi tutquqtaġiŋagisi suġalliasi kisivsiññun makkunani aqulliġñi uvluni.

⁴ Akiḷiḷaitkisi iñuich savaktuat nautchiaqaġvivsiññi. Tusaasigik uqaavsisiŋich. Suli nipauġutiŋich katitchiruat palauvaksranik God-im tusaqsraġigai, Atanġum sapiġñaqtuam.

⁵ Iñuuŋarusi nunami susuŋisaaġutipiaġatakun aliasuŋisaaġunmiḷu, quiññaksaŋarusi niġrutitun uvluanun tuqutchivium.

⁶ Suksraunġiiŋarusi iñuaŋarusiḷu nalaunŋaruamik iñuŋmik, akiḷḷiḷiqsuŋaiñmigaasi.

Qiñuirrun Aŋaiyyullu

⁷ Tavraasii aniqatiimaaŋ, qiñuitchitchi qaiñiŋanunaglaan Atanġum. Iḷisimasiuŋ una, nautchialiqiri utaqqiuġuuruq qiñuiqł̣uni piqpagnaqtuanun nauruksranun nunamiñi, qiñuiqł̣uni utaqqiraqtuq sialuŋnaġiaqtuksramik, aquvatigullu sialuŋniksramik.

⁸ Ilivsivsauq qiñuitchitchi qapiŋairrutiqaġlusi, qanuq qaiñiksraŋa Atanġum qalliruq.

⁹ Aniqatiimaaŋ, uqamayuutiqaġnasi avanmun, God-im isivġiŋitchumagaasi. Iḷisimasitchi, Isivġiqsi tikiyasiuraqtuq.

¹⁰ Aniqatiimaaŋ, tuvraaksraurut nagliksaaġniġmullu qiñuirrunmullu uqaqtiŋi God-im uqaŋaruat pisivlugu Ataniq.

¹¹ Iḷisimasiuŋ una, quviasuŋnisuugivut qiñuitchuat. Tusaaŋagiksi Job qiñuitchuaq, suli iḷitchuġiŋagiksi Atanġum piŋaraŋa ilaanun. Aasii paŋmapak iḷitchuġirusi Ataniq iḷunŋusuutiqpaqaqtuq naglikkutiqpaqaqłuniḷu.

¹² Aniqatiimaaŋ, naumaruaq tamatkunaŋŋa, unniqsuqłiikavsi suaŋasiḷiqsaanagich unniqsuqłiisisi atuġlugu qiḷak naagga nuna naagga qanusipayaaq uqaluk. Aglaan unniqsuqłiikavsi aŋiqsiññaġitchi suli naaggaaqsiññaġitchi, God-im isivġiŋitchumagaasi.

¹³ Kiñaliqaa iḷari nagliksaaqpa? Aŋaiyyuli. Quviasukpa? Atuġli nanġautinik.

¹⁴ Iñuk iḷari naŋitpa? Qaitquligich aŋaiyyuliqiruat umialiŋnaŋich, iliŋisa aŋaiyyutilirruŋ uqsruqtiġlugu olive uqsruanik pisilugu Ataniq.

¹⁵ Aasii ukpiġutiqaqłutiŋ aŋaiyyutaata iłuaqsipkaġniaġaa naŋittuaq, aasii Atanġum naŋinŋaiqsinniaġaa, aasii piḷuusiqiŋaniqpan suliqutigiŋaiqsauniaqtut itqaumayumiñaiġḷugich.

¹⁶ Tavraasii quliaqsigik piḷuutisi pirasi allamun iñuŋmun ilaanun, aŋaiyyutilusiḷu avanmun, iłuaqsirauyumausi. Aŋaiyyutaa nalaunŋaruam iñuum suaŋŋatiqpaqaqtuq taŋŋiqsuiḷḷaruġlu.

¹⁷ Elijah iñuktauq uvaptiktun irrusiḷik aasii aŋaiyyuŋaruq kipiġniuqłuni sialuquŋił̣ł̣ugu, aasii ukiuni piŋasuni itchaksraniḷu tatqiñi sialuŋaitchuq nunamun.

¹⁸ Aasii aŋaiyyutqiŋammiuq tavraasii sialuguŋaruq, aasii nuna naurivḷuni.

¹⁹ Aniqatiimaaŋ, kiñaliqaa asivaqpan iḷumun ittuamiñ aasii iñuum isumalitqiksitpagu,

²⁰ iḷisimali kialiqaa piḷuusiqiri isumalitqiksitpagu killuliqutaaniñ annaurraupkaġniaġaa ilitqusia tuqqunmiñ, suli iñugiapiaġataqtuat piḷuutit suliqutigiŋaiqsaupkaġlugich.