James 4 - Iñupiatun Mumiksat Uqalugiksuat

Avilaitqatiqaġniq Nunam Iñuŋiñik

¹ Sum aullaqisaaġuuvagich aŋuyautit qanaaġutillu akunnavsiññi? Iñukpalliġuurut pigiitchuaniñ pisuutivsiññiñ iñiqługu qalanmatun ittuamiñ iḷuvsiññiñ.

² Kipiġniuġaluaġaqtusi piqaġukłusi pigiliutillammiñaġiḷḷu, taimmaasii iñuaqsałhiñaaġuqłusi. Suli kaviuqłusi piññaktaaġillammiñagiḷḷu, aasii taimma qanaaġutiaqsivḷusi aŋuyautivlusiḷu. Piññaktaaġilaitkisi pigisukkasi, qanuq apiqsriaġilaitkisi God-mun.

³ Apiqsrigaluaġmiraqtusi aitchuusiaqalaitchusi, qanuq apiqsrisuuvlusi killukuaŋaruakun, atuġuqługich ilivsi aliasuŋisaaġutivsiññun.

⁴ Ukpiġnaitchuasii iñuich, naluvisiuŋ avilaitqatauniq nunam iñuŋiñun piḷuusiqisuuruanun akiḷḷiḷiqsuutautilaaŋanik God-mun? Tavraasii kiñapayaaq avilaitqatauruaq nunam iñuŋiñun, aŋuyyiruq inmiñik God-mun.

⁵ Isumavisi taŋiġiḷamik Bible uqaġasugalugich uqallakamiŋ inna, Ilitqusiq God-im iḷiraŋa iñuŋmun mumiŋaruq tutchutikun kipiġniuġutinun.

⁶ Aglaan taavrumaŋŋa kipiġniuġunmiñ suaŋałhaaqtuq God-im nagliktuutiqpakun ikayuun aitchuutaa. Taamna pisigivlugu Bible uqaluŋich uqaqtut inna, “God-im akiḷḷiḷiqsuġai kamasaaqtuat, aglaan aitchuiruq nagliktuutiqpaŋmik kamasaaŋitchuanun.”

⁷ Aŋalallisi God-im. Akiḷḷiḷiqsuqsiuŋ Tuunġaq aasii pigruġniaqtuq ilivsiññiñ.

⁸ Qalliḷaaġitchi God-mun, ilaaptauq qalliḷaaġniaġmiuq ilivsiññun. Piḷuusiqirauruasii, isumalitqigitchi piḷuutiniñ savaaġiŋaravsiññiñ. Ilivsi malġuŋnik isumaqaqtuasii, kamagipiaġataqsiuŋ God. Ukpiŋŋuaqtuaguŋaiġitchi.

⁹ Nunuuraliġitchi isumaaġlusiḷu qialusiḷu piḷuutisi pisigilugich. Iglaqhaaqtaġniqsi mumigḷi qirratiġuġluni, suli quviasuutiksi ipiqtusuutiġuġluni.

¹⁰ Kamanaiġitchi ilivsiññik sivuġaani God-im, aasiiḷi ilaan kamanaqsipkaġniaġaasi.

Kiliktuun Qanuqinniġaqłiutikun Aniqanmik

¹¹ Aniqatiimaaŋ, uqautikkutinasi pigiitchuamik avanmun. Qanuq iñuk uqautiqaqtuaq pigiitchuamik aniqanmun naagga qanuqinniġairuaq aniqanmiñik uqautigigai pigiitchualivḷugich pisaaŋavlugiḷḷu God-im pitquraŋi piviuttaqqutinikun avanmun. Tainna iḷiuġuvsigik God-im pitquraŋi kamaksriñiaqtuaguŋaiqsusi pitquranik, aglaan isivġiqsiġuqtusi pitquranik.

¹² God kisimi pitquralirauruq isivġiqsauvluniḷu. Ilaa kisimi annaurriḷḷaruq suksraunġiiḷḷavluniḷu. Aglaalli kiunasugivich isivġiqsuatiin siḷalliġñik?

Kiliktuun Uqavigaaġnikun

¹³ Naalaġnisiŋa, ilivsi uqaqtuasii inna, Uvlupak naagga uvlaakun aullaġniaqtugut nunaaqqimun aasii ukiiḷuta taamani tauqsiqsuġluta maniññaksaġluta.

¹⁴ Tainna uqaqtutin nalullaqpich uvlaakuksramik. Suuva iñuutchiñ? Taktugayaatun ittuq sivikitchuami illaktuatun, aasii taktuiqł̣uni.

¹⁵ Innaaglaan uvva uqaġumiñaġaluaqtutin, Atanġum pisuutigikpagu, iñuuniaqtugut aasii piḷugu una naagga taiŋña.

¹⁶ Tainna uqallaŋisuaġuvsi, uqavigaaqtusi arguaŋŋativsiññi. Aasii iluqaġmi tainnasiq uqavigaaġun pigiitchuq.

¹⁷ Kiñaliqaa iḷisimagaluaqłuni nalaunŋaruamik piraksramik piŋiññamiuŋ, ilaa piḷuksiruq.