James 3 - Iñupiatun Mumiksat Uqalugiksuat

Uqqam Irrusia

¹ Aniqatiimaaŋ, iñugiaktuasii iḷisaurriġuġnasi, qanuq iḷisimarusi uvagut iḷisaurriruaguut isivġiusiaqaġniaqtugut tuniqtulluktuamik allaniñ.

² Qanuq iluqata killukuaġuurugut iñugiaktuatigun, aasii kiñaliqaa killukualaitchuaq uqaluŋmigun, ilaa iñulluatapiaguruq, aŋalataġillasiŋavlugu iluqaan timi.

³ Kiŋmiġusiġuugivut tuttuqpaich qaniŋisigun kamagitquvluta, aulataġillagivut sumun aullaġukapta.

⁴ Isummatigisigik umiaqpaich. Qanutun kamanaqtigigaluaqtut anuġiqpaum tiŋillavlugich, aulatiqaqtut aquutikułłuuramik sumupayaaq aqutim pisuutaa sivunniġman.

⁵ Tainnatuttauq uqaq mikigaluaqtuq iḷagikkaŋa timim, qanutun uqavigaaġuutigiruq sunik kamanaqtuanik. Ignikułłuuram ikuallaktillagai napaaqtusalaich.

⁶ Tainnatuttauq uqaq igniqtun inmiuq, Uqqam salapqiġuugai iñuum isumagiirrutiŋi salapqiqł̣ugu iluqaan pigiitchuapayaaq iḷisimakkaŋat iñupayaurat. Uqqam salapqiġuugaa iñuum siḷivinŋatilaaŋa piḷuunmik suraġaġnipayaakun. Tavraasii uqaq igniqtun iłłuni ikuallaktitaŋatun nagliksaaġvium, iłuiḷḷiuġutiqaqtitkaa iñuuniqput iluqaan sivisutilaaŋatun.

⁷ Qanusipayaat niġrutit, tiŋmiallu, paamġuqtuallu, taġiuvlu niġrutiŋi, iñuum pamiqsaaġillagai.

⁸ Aglaan kialiqaa iñugruiññaum aŋalallasiyumiñaitkaa pamiqsaatun uqaq pigiitchuaq, siḷivinŋaruaq tuqunamik.

⁹ Uqqaptiŋnik nanġaġuugikput Ataniq, Aapalu, suli uqqaptiŋnik uqamaqłuutivlugich iñuich savaaguruat arriŋatun God-im.

¹⁰ Qanuq atautchimiñ qaniġmiñ qairuk quviasaaġullu uqamaqłuullu. Aniqatiimaaŋ, taamna tainnaittuksrauŋitkaluaqtuq.

¹¹ Imiġiksuaġlu taġiuġnitchuaġlu maqiyumiñaitchuk atautchimiñ maqsraluktuamiñ imiġmiñ.

¹² Aniqatiimaaŋ, fig napaaqtua nauriyumiñaitchuq olive-nik, naaggaunnii grape napaaqtuayaaŋa fig-nik. Tainnaptauq taġiuġnitchuaq imiq maqiyumiñaitchuq taġiuġniitchuamik.

Isumattun Paŋmaŋŋaqtauruaq

¹³ Kiña akunnavsiññi isumaturuaguva kaŋiqsisiqaqpalu? Isumattutiqaqtilaani kaŋiqsisiqaqtilaaniḷu iḷisimanaqtilliuŋ iñuulluataunmigun savaalluatamigullu kamasaaŋaiġḷuni isumattutiqaġluniḷu.

¹⁴ Aglaan uumisuutiqaqtuiññaġuvsi killuqsraunmiglu siŋñanmiglu isumatuniḷusi kamasaaġnasi, saglutigilugu God-im iḷumun ittuaŋa.

¹⁵ Qanuq tainnasiq isumattun qairuaguŋitchuq God-miñ, aglaan iñugruiññaġniñ, piḷuksisuguuruaniñ iñuutchivsiññiñ Tuunġaġmiḷḷu.

¹⁶ Qanuq iñuich killuqqutimmata siŋñarrautimmatalu atiŋirrutinikkayuktut, qanusipayaaġlu pigiitchualiqiniq iḷivḷuni.

¹⁷ Aglaan isumattutim paŋmaŋŋaqtauruam iñuk piḷuutaisitkaa aŋuyautairrutiqaqtitkaalu pikałaktautairrutiqaqtitkaalu uqayunaqtitkaalu, suli nagliktuiḷḷatuqpaktuq anniqsuiḷḷaturuġlu, atunim aŋalatkai iñuich, naagga piŋŋuaġutaitchuq.

¹⁸ Aasii iñuich atisipkaiñiaqtuaguruat nalaunŋaruakun iñuich iñuuniaqatigiiksillagaich piisinniaqługu atiŋirrun.