James 2 - Iñupiatun Mumiksat Uqalugiksuat

Allakaaġiigñasi Iñuŋnun

¹ Aniqatiimaaŋ, ukpiqtuagukavsi Ataniptiŋnun Jesus Christ-mun kamanaqtuaguruamun, suuramikunnii aŋalannagich iñuich allagiiksitaġlugich.

² Qanuq suġalliruaq iñuk kaviqsuamik qitiqłiaġutilik annuġaaġipiaġataġmiḷuni isiqpan aŋaiyyuvivsiññun, suli iḷiappauruaq isiġmiḷuni annuġaaluktuġluni,

³ aasii ilivsi qaunagiłhaagaqsiguvsiuŋ annuġaaġipiaġataqtuaq aasii uqallautilugu, Aquvittin uvuŋa inilluatamun, aasiiḷi uqallautilugu iḷiappauruaq, Makitaiñ takanani, naagga, Aquvittin natiġmun saniġaannun aquppiutama,

⁴ allakaaġiiksitaġisi iñuich akunnavsiññi, isivġiqł̣ugich pigiitchuanik isumaqaqłusi.

⁵ Piviuttaġikkavsii aniqatiit, naalaġnisitchi, God-im piksraqtaaġiŋagai piiḷḷiuqtuat mattumani nunami piiḷḷiuquŋił̣ł̣ugich ukpiġunmi, kiŋuvaannaquvlugiḷḷu atanniqsimaviŋmiñi unniqsuqłiisauŋaruamik ilaan piviuttaġirimiñun.

⁶ Tavra suksraġiŋiñŋagiksi iḷiappauruaq. Nalliŋisa nagriaġisuuvasi isivġiqsiñuutivlusiḷu? Suġalliruat.

⁷ Iliŋisa uqamaqłuutigisuugaat taamna atilluataq God-im aitchuutaa ilivsiññun.

⁸ Nalaunŋarualiqiniaqtusi kamagiguvsiuŋ God-im pitquraŋa, Bible uqalugikkaŋat inna, “Piviuttaġisaġiñ siḷalliñ iliktun iḷiḷugu.”

⁹ Aglaan allakaaġiiksitaġuvsigik iñuich qiññaŋatigun, piḷuusiqirusi. Aasii pitqurat pasiñiaġaasi kipuqłaiñiḷusi.

¹⁰ Qanuq kiñapayaaq kamaksriŋitchuaq iḷaŋannik pitqurat pasirauruq kamaksriŋitchualivḷugu iluqaiññik pitquranik.

¹¹ Qanuq God uqaqtuq, Allatuġnak, aasiisuli uqallakłuni, Iñuaġnak. Tavra allatuŋitkaluaġuvich aglaan iñuaġlutin, kamaksriŋitchutin pitquranik.

¹² Tavra uqaġitchi iñuulusiḷu tamatkunatun iñuktun isivġiqsauyumaaqtuatun pitquratigun atanġiqsitchiḷḷaruatigun iñuŋnik.

¹³ Qanuq iñuk nagliksralaitchuaq God-im nagliginiaŋiñmigaa isivġiġumiuŋ, aglaan nagliktuun akimaniaqtuq nagliktauruaq isivġiqsaukpan.

Ukpiġullu Savaallu

¹⁴ Aniqatiimaaŋ, iñuk uqaqtuaq ukpiġutiqaġnivḷuni aasii anniqsuiñiaŋiḷḷuni allanik, ukpiġutaata anniqsuġumiñaqpauŋ? Ukpiġutaan tainnaittuam annautiyumiñaitkaa.

¹⁵ Aniqan annuġaagiḷḷiuqpan niqiksraiḷḷiuġluniḷu,

¹⁶ qanuġlugu anniqsuġumiñaitkaa uqallautigiññaġlugu inna, God-im quviasuusiġḷisin, uunnaagiñ niġiḷḷuataġlutillu, aitchuġaluaġnagu pigiraksraġiraŋiñik iñuuniaġniġmi. Tainnasiq ukpiġutaupiaqpa?

¹⁷ Ukpiġutiqaġniq ikayuġniasuŋaġnagich allat iñuich iḷumutun ukpiġutauŋitchuq, tuquŋaruatun ittuq.

¹⁸ Aglaan iñuk iḷaanni uqallagniaġmiuq iñuŋmun, Ukpiġutiqaqsiññaqtutin aasiiḷi uvaŋa ukpiġutiqaqtuŋa anniqsuiñiaqłuŋa allanik. Tautuktinŋa ukpiġutiŋnik anniqsuiñiaġaluaġnak, uvaŋali anniqsuiñiaġnipkuŋ tautuktinniaġikpiñ ukpiġutimnik.

¹⁹ Tavra uqaqtutin ukpiġnivḷutin atausiunivḷugu God, taamna nakuuruq. Ilitqusiqł̣uitchauq ukpiġigaat taamna, aasii iliŋich uuliksisuurut sivuuġavlutiŋ.

²⁰ Isumalaaŋitchuatiin iñuuk, iḷisautitquyumavich ukpiġun anniqsuiñialaitchuaq suuŋisilaaŋanik?

²¹ Isumalaaġutigisiuŋ maŋŋuqput Abraham. Qanuqłuni nalaunŋasirauŋava God-im sivuġaani? God-im iḷisimaŋagaa nalaunŋaruagutilaaŋanik ukpiġunmiñi pisigivlugu aitchuutigiyumiñaġmagu iġñini Isaac niġrutitun iḷivḷugu ikipkaiviŋmun.

²² Iḷitchuġisitchi ilaan ukpiġivaił̣ł̣ugu God piyummatiqaŋaruq supayauramik God-im piraksriqpani. Taavruma piraŋata nalupqinaiŋagaa ukpiġutiqapiaqtilaaŋanik,

²³ aasii Bible uqaluŋich taŋŋiqsauŋarut uqaluqaqtuat inna, “Abraham ukpiġiŋagaa God, aasii taavruma nalaunŋasiŋagaa sivuġaani God-im.” Aasii ilaa tairauŋaruq avilaitqataanik God-im.

²⁴ Iḷitchuġirusi tasamma iñuum nalaunŋasipkaqtautilaaŋanik savaalluatatigun ukpiġutiłhiñaŋiḷaakun.

²⁵ Aasiivsauq Rahab, sivuani allatuqtauŋagaluaqtuaq, uuktuutauyumiñaġmiuq ukpiġutim anniqsuiḷḷatilaaŋanik. Ilaa nalaunŋarualirauŋaruq anniqsuiñiġmigun tukkuliikami kivgauruanik suli aullaqtiłługich allakun apqutikun.

²⁶ Tavra timitun tuquŋaruatun ilitqusiq piiġman timimiñ, tainnatun ukpiġun tuquŋammiuq anniqsuiñiaŋiññami.