James 1 - Iñupiatun Mumiksat Uqalugiksuat

¹ James, kivgaŋa God-im Atanġuvlu Jesus Christ, tuyuqtuq paġlatinik iluqaiññun God-im iñuŋiñun siaminŋaruanun iluqaani nunami.

Ukpiġun Isumattullu

² Aniqatiimaaŋ, quviasupiaġitchi uuktuaqtaukavsi allakaaġiiñik uuktuaġutinik,

³ qanuq iḷisimarusi uuktuaġusiaŋa ukpiġutivsi tuniqsiḷiġutigigiksi.

⁴ Aasii tuniqsimatuiññaġitchi supayaami, ataramik piḷusi God-im piḷġusiġitqukkaŋiñik iluqaiññik, ataramik iñuusiqaġumausi iviġaumasuglugu God, sunik piŋaiġḷusi iviġaumanaitchuanik ilaanun.

⁵ Kiñapayaaq isumattutaiḷḷiuġumi, qiññuaġli God-miñ aasii isumattutiksriññiaġaa. Qanuq God aitchuiḷḷaruq iñupayaanun nauttaasuŋaġnani, qiññuaġniġaqłilaitchuġlu.

⁶ Aglaan apiqsriḷi ukpiġutiqaġluni, nalupqisuutaiḷḷuni suuramikunnii, qanuq iñuk nalupqisuktuaq ittuq qaiḷḷiŋatun taġium uŋugrugikkaŋatun nalluakkaŋatullu anuġim.

⁷ Iñuk tainnaittuaq isumanani aitchuusiaqaġniaġasugaluni supayaamik Ataniġmiñ.

⁸ Qanuq malġuutchiŋaruamik isumalik tuniqsimaruaguŋitchuq suraġaġnipayaamiñi.

Iḷiappauruallu Suġalliruallu

⁹ Aniqan iḷiappauruaq mattumani nunami quviasuktuksrauruq God-im kamanaqsipkaġmani,

¹⁰ tainnatun suli suġalliruaq aniqan God-im kamanaiqsinmani, qanuq ukpiqtuat atirut God-mun. Suġalliruaq nautchiatun tuquliruatun piñiaqtuq.

¹¹ Qanuq siqiñiq nuimman pasiŋñaqtuam uunnaŋata panaqłukkai ivgich nautchiallu, aasii nautchiat katakłutiŋ, qiñiyunaiqł̣utiglu, tainnatun suġalliruaq tuquliñiaqtuq piḷġutchimiñi.

Ikł̣igutchaktinniaqtauniq

¹² Quviasugli iñuk igḷutuiruaq uuktuaġusiamik, qanuq igḷutuanikkumiuŋ uuktuaġusiaq, aitchuusiaqaġniaqtuq isuitchuamik iñuggunmik, God-im unniqsuqłiisaanik akiḷiutiginiaġnivḷugu tamatkunuŋa piviuttaġirimiñun.

¹³ Kiñapayaaq ikł̣igutchaktinniaqtaukami uqallaŋnani, Ikł̣igutchaktinniaġaaŋa God-im. Qanuq God ikł̣igutchaktitauyumiñaitchuq piḷuktuamun, suli ikł̣igutchaktitchiñialaitchuq kimigliqaa iñuŋmik.

¹⁴ Aglaan uvva iñullaa ikł̣igutchaktinniaqtauraqtuq kaviuġuksaaqtaukami, inataukamiḷu kipiġniuġunmiñun.

¹⁵ Aasii ilaan kipiġniuġunmi pigiitchuat payarimmanni piḷuusiqisuuruq, aasii iñuk piḷuutiŋisa suksraunġiqsaupkalġiñaġniaġaat.

¹⁶ Piviuttaġikkavsi aniqatiit, sagluqipkaġnasi.

¹⁷ Iluqaġmiŋ aitchuutigiksuat inuaŋaitchuallu aitchuutit paŋmaŋŋaqtaurut, qaisaŋi God-im savaŋaruam qaummatipayauranik. Ilaa allaŋŋulaitchuq inŋitchuġlu taġġaqtun allaŋŋuqtaqtuatun.

¹⁸ God-im pisuunmigun anitqiksinŋagaatigut uqaluagun iḷumun ittuam, uvagut iniqaqqaaquvluta savaapayauramiñiñ.

Naalaġniruallu Kamaksriruallu

¹⁹ Piviuttaġikkavsii aniqatiit, iḷisimasiuŋ una. Iñupayaaq ataramik itqanaiḷḷi naalaġniñiġmun aglaan uqallayaiḷḷuni, qinnayaiḷḷuniḷu,

²⁰ qanuq iñuk qinnakami taŋŋiiḷaitchuq God-im nalaunŋatqutaanik.

²¹ Taamna pisigilugu iñuusiqaŋaiġitchi pigiitchuamik, piugaŋaiġḷugich God-im pigiiññiraŋi. Aglaan kamasaaŋaiġḷusi kamagisigik God-im uqaluŋi, ilaan iḷitchuġipkaŋakkaŋi ilivsiññun annaurrautquvlusi.

²² Uqalua God-im kamagisiuŋ. Naalaġnigiññaġuvsiuŋ uqaluk, sagluqirusi ilivsiññik.

²³ Qanuq kiñapayaaq naalaġniraugiññaqtuaq uqaluŋmun kamagigaluaġnagu, iñuktun ittuq taġġaqtuqtuatun kiiññamiñik.

²⁴ Qanuq tautuktuq inmiñik aasii aullaqami piiguaniktiġaa qanuq qiññaqaqtilaani.

²⁵ Aglaan iñuk tainnainŋitchuq qiñiqtuiññaqtuaq God-im pitquraŋiñun nalaunŋaruanun atanġiqsitchiḷḷaruanun iñuŋnik. Naalaġnisuŋaiññaqamigich God-im uqaluŋi kamagituiññaqługiḷḷu piiguqtilaitkai tavrauvvaa, aasii quviasuusiaqaqtitauvluni pisigivlugu taŋŋiiñini uqaluŋmik.

²⁶ Kiñaliqaa isummatigigumi iḷumun ukpiqtuaguniḷuni aŋalatchuiḷḷaan uqaluni, sagluqiruq inmiñik. Taavruma iñuum ukpiqtuaguniŋa taŋiġitchuq.

²⁷ Uvva innaittuq God-im nalaunŋarualikkaŋa iḷumutullu ittualivḷugu ukpiqtuaguniq, takulugich aŋayuqaagiŋaruat, uiḷgaŋaruallu piiḷḷiuqpata, suli qaunagiluni inmiñik piḷuksisuŋiḷḷuni nunam iñuŋisun.