Hebrews 8 - Iñupiatun Mumiksat Uqalugiksuat

Jesus Qaukłiq Aŋaiyyuliqsiqpakput

¹ Tavra sivuniġikkaŋa uqaluutigikkapta innaittuq. Aŋaiyyuliqsiqpaich qaukłiannik piqaqtugut Christ-mik, aquvititauruamik taliqpiata tuŋaanun God-im kamanaqtuam qiḷaŋmi.

² Aŋaiyyuliqsiqpaich qaukłiat pisinniktuq inimi ilaaguaqtauruami God-mun tupipiamiittuami aŋaiyyuviŋmi, iñuum nappaqtaġiŋisaŋani, aglaan Atanġum nappaqtaŋani.

³ Aŋaiyyuliqsiqpaich qaukłiat aitchuutiqaqtuksrausuumman piksraqtaaguruaq aitchuitquvlugu aitchuutinik ikipkautiniglu God-mun pisivlugich iñuich; tainnatulli aŋaiyyuliqsiqpaich qaukłiat pigikkaqput aitchuutiksraqaqtuksraupiaġmiuq sumik.

⁴ Tavra Christ nunamiitkumi, aŋaiyyuliqsiqpauyumiñaitkaluaqtuq sumikunnii, qanuq allanik aŋaiyyuliqsiqpaqaqtuq nunami qaitchisuuruanik aitchuutinik pitquratiguaqłutiŋ.

⁵ Savaktut tupiġmi tuvrautiruami taġġauruamiḷu qiḷaŋmiittuamun tupipiamun aŋaiyyuviŋmun. Qanuq Moses nappaisaġumaagaqsimman tupiġmik aŋaiyyuviksramik, iḷisautiŋagaa God-im uqallautivlugu, “Qaunagilutin savakkumagitin supayaat tuvraġlugu iḷiktiġusiaq iḷisaurrusiaġikkan iġġimi.”

⁶ Aŋaiyyuliqsiqpaich savaktut tupiġmi nunamiittuami taġġałhiñauruami, Christ-li pisinnikkumiñaqsiŋaruq qiḷaŋmi nakuułhaasugruktuamik nunami aŋaiyyuliqsiqpauruaniñ. Ilaan savaaŋa kamanałhaaqtuq aŋaiyyuliqsiqpaich savaaŋiññiñ, qanuq God-im sivunniuġutaa nutauruaq ilaan qaaŋiqsitaŋa uvaptiŋnun nakuułhaaqtuamik unniqsuqłiisiqaqtuq.

⁷ Qanuq sivulliuruaq sivunniuġun naamaŋakpan, simmausiġñiaŋitkaluaqtuq.

⁸ Ataniq God iviġaumaiñŋaruq taipkunuŋa iñuŋnun, aasii uqallakłuni, “Uvlut qaiñiaqtut uvaŋa nutauruamik sivunniuġniaqtuŋa iñuŋiññun Israel Judah-vlu.

⁹ Taamna nutauruaq sivunniuġun inniaŋitchuq sivulliqsun qaisaptun aapaŋiññun uvlumi taivrumani aullatisaqapkich qaunakłaaqługich nunamiñ Egypt-miñ. Qanuq iliŋisa kipuqłaŋmarruŋ sivunniuġutiga uvaŋa ilaisituuqtinŋagitka.

¹⁰ Uvvauna sivunniuġun taŋŋiqsinniakkaġa iñuŋiññun Israel taipkua uvlut pianikpata. Itqaumapkaġniaġitka pitquratka iliŋiññun, kamagipkaġlugiḷḷu iliŋiññun, suli uvaŋa God-iginiaġaanŋa, iliŋiḷḷi iñuginiaġitka.

¹¹ Taamna pisigilugu iñupayaat iḷisaurrutiniaŋitchut avanmun, aniqanmiŋniglu uqaġlutiŋ, Iḷitchuġiuŋ Ataniq, qanuq iluqaġmiŋ iḷitchuġiniaġaanŋa, kamanaġniqsrakkaluat iñuich, kamanaiññiqsrallu.

¹² Qanuq uvaŋa naglikkutiqaġniaqtuŋa piḷuksiruanun, suli piipiaġniaġitka piḷuutiŋich kamasuutairrutiŋiḷḷu.” Taapkuniŋa Ataniq uqaŋaruq.

¹³ Uqautigikamiuŋ nutauruaq sivunniuġun, ilaan piqutigiŋaiŋagaa sivulliq sivunniuġun utuqqaliruaguvlugu. Aasii suna atuġnaġumiñaiġman utuqqalimmallu tautugnaiqsałhiñaaġuġuuruq.