Hebrews 7 - Iñupiatun Mumiksat Uqalugiksuat

Aŋaiyyuliqsi Melchizedek

¹ Qanuq taavruma Melchizedek-gum, umialgata Salem, aŋaiyyuliqsiqpaŋan sapiġñaġniqsrauruam God-im, paaŋagaa Abraham utiqtuaq tuquġaqqaaqługich umialgich. Aasii Melchizedek-gum aŋaiyyutiŋagaa piḷḷuatautiqaquvlugu.

² Aasii Abraham-gum aitchuŋagaa quliŋŋuġutiŋiññik supayaurat piġġaktaami akimakami. Melchizedek-gum atqa mumiŋñiŋagun sivuniqaqtuq Umialguruq Iłuaqtualiqiniġmun, aasiisuli umialgummiuq Salem-mun sivuniqaqtuamun Umialganun Aŋuyautairrutim.

³ Aapaiñmiuq aakaitchuġlu maŋŋuitchuġlu aglausimaruanik, suli Bible uqaluŋisa quliaqtuaġiŋitkaat aniñiŋa tuquniŋalu. Tavraasii Melchizedek ittuq Iġñiŋatun God-im aŋaiyyuliqsiqpauvluni isuitchuamun.

⁴ Isumalaaġutigisiuŋ qanutun kamanaqtilaaŋa. Abraham kamanautikun maŋŋuuruam aitchullammagu quliŋŋuġutiŋiññik piġġaktaami akimakami.

⁵ Aasiiḷi taipkua kiŋuniŋi Levi-m aŋaiyyuliqsiqpaguqtitauŋaruat pitquraqaqtut tigusitquvlugich quliŋŋuġutinik iñuŋniñ, ilaisa aniqatiimiŋniñ, maŋŋuqaġaluaqtillugitchauq Abraham-miñ.

⁶ Aglaan taamna iñuk Melchizedek, maŋŋuqaqatigiŋisaŋatunnii, aitchuusiaqaŋaruq quliŋŋuġutinik Abraham-miñ. Aasii uqallaŋaruq Abraham-mun unniqsuqłiisiaqaqtuamun, God-im piḷḷuataqtitchumagaatin.

⁷ Iñuk tainna uqallallaruaq kamanałhaaqtuq taavrumaŋŋa uqallausiqaqtuamiñ. Kialiqaa taamna qapiġumiñaitkaa.

⁸ Aasiisuli Levi-m kiŋuniŋisa aitchuusiaġisuugaich quliŋŋuġutit aasii tuquvlutiŋ. Aglaalli Melchizedek aitchuusiaqaŋaruq quliŋŋuġutinik, quliaqtuaġuŋaitchuaq tuquŋaniḷugu.

⁹ Iḷaanni iñuktauq uqallakkumiñaġugnaġmiuq inna. Levi-vsauq kiŋuniŋi aitchuusiaqaġuurut quliŋŋuġutinik, akiḷiiŋammiñiqsut quliŋŋuġutinik Melchizedek-mun.

¹⁰ Qanuq Abraham aitchuimman, aitchuimmatun piŋammiut aniŋaiñŋaġmiŋ unnii ilaan kiŋuniġivlugich.

¹¹ Pitqurat iñuŋnun aitchuutauŋarut aŋaiyyuliqsiqpaummata Levi-m kiŋuniŋi. Tavra iñuich annaurraullakpata naamasiḷugu Levi-m kiŋuniŋigun aŋaiyyuliqsiqpauruatigun Aaron-kun, piqaġugnaġniaŋitkaluaqtuq allamik aŋaiyyuliqsiqpaŋmik Melchizedek-tun ittuamik.

¹² Qanuq allaŋŋuqtuksraġuġman aŋaiyyuliqsiqpaqaġniq Levi-m kiŋuniŋiñik aŋaiyyuliqsiqpaktun Melchizedek-tun ittuamik, tainnatuttauq allaŋŋuqtuksraupiaġuummiut pitqurat.

¹³ Qanuq Christ aŋaiyyuliqsiqpaktun Melchizedek-tun kaŋiqaqtuq allamiñ Aaron-guŋitchuamiñ, savaaqaŋaitchuaniñ ikipkaiviŋmi.

¹⁴ Nalupqinaitchuq Ataniqput maŋŋuqaqtuaguruq Judah-miñ, aasii taapkua maŋŋuġiich Moses uqallausiġiŋaitkai aŋaiyyuliqsiqpautqulugich.

Alla Aŋaiyyuliqsi Melchizedek-tun Ittuaq

¹⁵ Taamna nalupqinaivsaaŋaruq allasuli aŋaiyyuliqsiqpak Melchizedek-tun ittuaq salapqiġman.

¹⁶ Christ aŋaiyyuliqsiqpaguŋaruq, pisigivlugu iñuuniŋa isuitchuamun. Aŋaiyyuliqsiqpaguŋaitchuq maŋŋuqaġniḷugu Aaron-miñ pitqurat apiqsriaŋatiktun.

¹⁷ Qanuq God-im uqallautiŋagaa Christ, “Aŋaiyyuliqsiqpaurutin isuitchuamun tuvraqługu Melchizedek.”

¹⁸ Sivulliich pitqurat sivuniqaqtuat Levi-m kiŋuniŋigun asivaqtaurut, pisigivlugu suaŋaiññiŋat anniqsuutauŋiññiŋallu annaurriḷaił̣ł̣utiŋ iñuŋnik,

¹⁹ qanuq taipkua pitqurat nalaunŋasipiaġatalaitkaat kiñapayaaq sivuġaani God-im. Aglaan Christ pisigilugu aŋaiyyuliqsiqpagikkaqput annagummatiqapiaqtugut, suli qalliḷaaġumiñaqtugut God-mun.

²⁰ God unniqsuqłiipiaŋaruq Christ aŋaiyyuliqsiqpauniaġnivḷugu isuitchuamun.

²¹ Taipkua sivuani aŋaiyyuliqsiqpaguqtuat aŋaiyyuliqsiqpaguqtitausuurut unniqsuqłiisauŋitchuakun God-miñ, aglaan Christ aŋaiyyuliqsiqpaguqtitauŋaruq unniqsuqłiisimik inna, “Ilivich aŋaiyyuliqsiqpaurutin isuitchuamun. Uvaŋa Atanġuruaŋaa unniqsuqłiiŋaruŋa, aasii isumaga allaŋŋuġumiñaitchuq.”

²² Taavruma unniqsuqłiisim inillakkaa Jesus nalupqinaiyautiġuqługu nakuułhaaqtuamun sivunniuġunmun.

²³ Sivulliich aŋaiyyuliqsiqpaich iñugiaŋarut, tuqusuuvlutiŋ. Tuqqutim piiġuuŋagai savaaŋiññiñ.

²⁴ Aglaan Jesus aŋaiyyuliqsiqpauruq taimuŋa, qanuq ilaa iñuuruq isuitchuamun.

²⁵ Tainnaiłłuniasii ilaan ataramik annautiyumiñaġai tamatkua qalliḷaaqtuat God-mun inmigun, qanuq iñuuruq ataramik qiññuaqtuutisukługich God-mun.

²⁶ Qanuq nalaunŋaruq tainnatchimik aŋaiyyuliqsiqpaich qaukłiannik piqaġupta, ilaaguaqtauruamik God-mun, pasiñaġumiñaitchuamik, piġuaġniġitchuamik, ilaaguaŋaruamik piḷuusiqiriniñ, kamanaqsipkaqtauruamik qiḷaŋmi.

²⁷ Jesus taipkunatun inŋitchuq aŋaiyyuliqsiqpaich qaukłiŋisitun, aitchuiruksrauluni ikipkautinik uvlutuaqpan, sivulliġilugich ilaan piḷuutini, piḷuutiŋiññullu iñuich. Qanuq tuqukami naanŋagai ikipkautit pitqigaksraiqł̣ugich, inmiñik aitchuutigivluni.

²⁸ Pitquratigun aŋaiyyuliqsiqpaich qaukłiksraġuugaich piḷuksiḷḷaruanik. Aasii pitqurat qaisauganiŋmata God-im nalunaiŋagaa Iġñini piḷuksiŋaitchuaq isuitchuamun.