Hebrews 6 - Iñupiatun Mumiksat Uqalugiksuat

¹ Tavra uqautigiŋaiḷḷaglugich sivulliich siġḷiġnaitchuat iḷisaurrutit Christ-kun, aglisaiññaqta. Iḷisaurrigiññaŋaiġḷuta sivulliġñik iḷisaurrutinik kisiiññik ukuniŋa, isumalitqiunmik piḷġutchiñiñ tuqunaqtuaniñ, ukpiġunmiglu God-mun,

² iḷisaurrutinik paptaiġutikun, iḷiñiŋanniglu argaŋisa umialiŋnat iñuum niaquanun, aŋŋisaatigullu tuquŋaruat, isuitchuakullu isivġiġvikun.

³ Aasii taamna sivunmuktuġniksraqput taŋŋiġñiaġikput God-im pipkaġumiñaqpagu.

⁴ Qanuq iñuich kaŋiqsipkaqtauganikamiŋ, uuktuaganikamiŋ annaunmik aitchuusiaqaanikamiglu Ilitqusiġiksuamik,

⁵ uuktuaganikamirruglu nakuutaa God-im uqaluan, suaŋŋataalu Atanġum salapqiġñiakkaŋa ukiuni qaiyumaaqtuani,

⁶ taapkua uuktuaqqaaqługich, aquatigun tunutkumirruŋ Christ, qanuġlugich isumalitqiksitqigñaġumiñaitchut. Qanuq ilaisa kikiaktuutitqigmatun pigaat Iġñiŋa God-im, suli kipautigivlugu ilaan tuqqutaa.

⁷ Iñuich ukpiqsimaaqtuat Christ-mun qaunakkusiaqaqtut nunatun qaunakkusiaqaqtuatun sialuŋman, aasii naurivḷuni niqiksranik tamatkunuŋa nunaliqiruanun.

⁸ Iñuiḷḷi tunutchiruat Christ-mik suksraunġiqsaurut nunatun sialuŋman unnii nauriruatun kakiḷḷaġnaqtuanik. Anniqsuutauŋitchut ikiraugiññaġniaqtut.

⁹ Tainna uqaġaluaġuptaunnii, piviuttaġirauruasii, nalupqisuŋitchugut nunagiksuatun itilaavsiññik aasii annaurrauvlusi.

¹⁰ Qanuq God nalaunŋaruq. Naluruuraaġniaŋitkaa ikayuutiksi, piviuttaqqullu iḷisimanaqtitaqsi savautikavsigik ukpiqtuat ilaa pisigivlugu, piḷġusivsisun paŋmapak.

¹¹ Suli tainnatun kipiġniuttaġigivsi atausiullaavlusi ikayuiñiapiaquvlusi. Taamna piguvsiuŋ iñuuniqtutilaavsisun nalupqiginiaŋitkiksi annautiksraqsi.

¹² Tavraasii iqiatchautinagu ikayuiñiq, aglaan taipkunatun ukpiġutiqaġlusi qiñuirrutiqaġlusiḷu, kiŋuvaannakkumausi God-im unniqsuqłiisiŋiñik.

God-im Nalupqinaitchuaq Unniqsuqłiisaa

¹³ God-im unniqsuqłiikamiuŋ Abraham, unniqsuqłiiŋagaa inmiguaqługu, sumik kamanałhaaqtuamik piiḷḷuni inmiñiñ,

¹⁴ uqaqłuni, “Nalupqinaitchuamik quviasaapiaġniaġikpiñ, iñugiaksipkaġlugiḷḷu kiŋuniqtin.”

¹⁵ Tavraasii Abraham, qiñuiqł̣uni utaqqiuqqaaqłuni, piññaktaaġiŋagaa God-im unniqsuqłiisaa.

¹⁶ Iñuiḷḷi iḷumutun unniqsuqłiisuurut nalupqinaiyausiqł̣utiŋ kamanałhaaqtuanik inmiŋniñ, aasii tainnaġmata arguanaiġaqtuq unniqsuqłiisaat avanmun.

¹⁷ Tavrali God-im ukpiġnaqsiḷiġuŋagaa unniqsuqłiisini kiŋuvaannagniaqtuanun allaŋŋulaisilaaŋa sivunniutini, arguanaiyaqługu unniqsuqłiiñmik.

¹⁸ Taapkuŋnuuna malġukkun allaŋŋulaitchuakkun, unniqsuqłiisikullu nalupqinaiyautikullu, God arguanaiŋaruq sagluyumiñaisilaamiñik. Uvagulli annaksaŋaruaguut qamannirviŋmun God-mun piyumalaaġusiqł̣uta piññaktaaġiyumavlugu annaun aitchuutigisukkaŋa.

^19-20 Kitchatun pauksimmatauruatun, tainnatulli pauksimmatigigikput kitchatun taamna annagumman ilitqusiptiŋnun. Taamna annagumman qiḷaŋmi pigigikput, qanuq Jesus ayuŋaruq sivuptiŋni pisivluta. Aŋaiyyuliqsiqpaktun isiŋaruq amuŋatchianun talukiyaam inimun ilaaguaqtaułhamaaqtuamun God-mun. Aŋaiyyuliqsiqpaguqtuq tuvraqługu piḷġusia Melchizedek-gum isuitchuamun.