Hebrews 5 - Iñupiatun Mumiksat Uqalugiksuat

¹ Qanuq iluqaġmiŋ aŋaiyyuliqsiqpaich qaukłiŋich piksraqtaagurut akunġanniñ iñuich. Taapkua nalunaiqsausuurut pisitquvlugich iñuich God-im sivuġaani, qaitchitquvlugich aitchuutinik ikipkautiniglu piḷuutaiġutiksranik.

² Aŋaiyyuliqsiqpaum suaŋairrutiqaqłuni araktuallagai piaqłuktautaitchuakun kamaksriŋitchuat naluvlugich God-im pitquraŋiñik, sagluqirauvlutiglu.

³ Taamnaasii pisigivlugu ilaa aitchuiruksraupiaqtuq ikipkautinik pisigilugiḷḷu piḷuutini pisigaluaġmiḷḷaisa iñuich.

⁴ Kiñaliqaa aŋaiyyuliqsiqpagulaitchuq inmiñik, aglaan ilaa nalunaiqsiqaġaqtuq God-mik, Aaron-tuttauq nalunaiqsaŋatun.

⁵ Tainnatuttauq Christ kamanaqsiḷiŋaitchuq inmiñik aŋaiyyuliqsiqpaŋnun qaukłiġuqsaġluni, aglaan nalunaiqsiqaŋaruq God-mik uqallaktuamik inmiñun, “Ilivich Iġñiġigikpiñ. Uvlupak Aapaliutigiŋma.”

⁶ Allaagun suli uqallaŋammiuq, “Ilivich aŋaiyyuliqsiqpaurutin isuitchuamun, tuvraqługu piḷġusia Melchizedek-gum.”

⁷ Uvluni nunamiinnami, Jesus aŋaiyyuŋaruq qiññuaqtuŋaruġlu nipatusivḷuni qulvivḷuniḷu ilaanun annaurriyumiñaqtuamun inmiñik tuqqunmiñ. Aasii ilaan aŋaiyyutaa tusaarauŋaruq pisigivlugu God-iliqiniġmi qiksiksrautaa.

⁸ Iġñiġugaluaŋŋaġmi, nalupqinaiŋagaa kamaksriñini nagliksaaġniġmigun.

⁹ Aasii piḷḷuatapiaġataġman, kaŋiutaġuŋaruq isuitchuamun annaunmun iluqaiññun kamaksriruanun inmiñik.

¹⁰ God-im nalunaiqsaġiŋagaa aŋaiyyuliqsiqpaŋnun qaukłiutquvlugu tuvraġlugu piḷġusia Melchizedek-gum.

Kiliktuutit Qapiquŋił̣ł̣uta

¹¹ Aasii Melchizedek-kun uqautiksraukkaġaluaqtugut siġḷiġnaqtuanik sivunniuqsaaruni, aglaan ilivsi kaŋiqsiḷguitchusi.

¹² Uvva paŋmapak iḷisaurriġuġumiñaqsigaluaqłusi, iḷisaurriqaqtuksraurusi-suli iñuŋmik iḷisaurrivsaaqtuksramik ilivsiññik sivulliqsigun iḷisaurrutitigun God-im uqaluŋiñi. Taamna pisigivlugu immuktuqtuksraurusi miqłiqtutun, niqipiaguŋitchuamik.

¹³ Qanuq kiñaliqaa iñuggutiqaqtuaq immuŋmik miqłiqtutun ittuq naluvlugu nalaunŋaruaq naagga nalaunŋaitchuaq.

¹⁴ Aglaan niqipiaq sivuniqaqtuq agliŋaruanun, tamatkunuŋa iḷitchuġipkaqtitauŋaruanun sum nalaunŋatilaaŋanik piḷuktilaaŋaniglu.