Hebrews 3 - Iñupiatun Mumiksat Uqalugiksuat

Jesus Kamanałhaaqtuq Moses-miñ

¹ Tavraasii, aniqatitkaa, ilaaguaqtauvlusi God-mun, piqatauruasii iluqasi ququakkaŋasii God-im qiḷaŋmiittuam, isumalaaġutigisiuŋ Jesus God-im tiliŋakkaŋa aŋaiyyuliqsiqpaŋnun qaukłiuruaq ukpiġikkaptiŋnun.

² Ilaan piḷḷuatautiŋagaa God piksraqtaaġirini, Moses-tuttauq piḷḷuatautiqaŋaruatun God-im igluani.

³ Naaggauvva God uqallaŋaruq Jesus nanġausiaqałhaaqtuksraunivḷugu Moses-miñ, igluqpiruaqtauq nanġausiaqałhaaġmatun igluqpiamiñiñ.

⁴ Qanuq igluqpapayaaq iñuum nappaŋagaa, aglaalli God savaŋaruq supayaanik.

⁵ Tavra Moses kivgalluatauŋaruq supayaatigun God-im igluani, kivgatun iłłuni, uqaqtuksrauvluni sunik taŋŋianiŋaitchuanik paŋmapak.

⁶ Aglaan Christ iġñiġuvluni God-mun aŋalatchiḷḷuataŋaruq God-im igluanik. Aasiuvva uvagut igluqatigigaatigut, pigiuraġniaġuptigu ukpiqsimaaġniqput, quviagilugulu niġiuguraġniaġupta isuanun-aglaan.

Unaŋuiqsiġviat God-im Iñuŋisa

⁷ Tavraasii Ilitqusiġiksuaq uqallaŋaruq, “Uvlupak, tusaaguvsigik pitquraŋi,

⁸ uqaqsiġiiḷiñasi taipkua paaqłaŋŋataatitun God-mun, uuktuġmarruŋ nunagluktuami.

⁹ Aapavsi uuktupiaġataŋagaanŋa qiñiġaluaŋŋaisaunnii kamanaqtuat savaatka malġukipiani ukiuni.

¹⁰ Taamnaasii pisigivlugu taipkua kiŋuniġiich qimmaksaliqsinŋagaanŋa, aasii uqallakłuŋa, Ataramikasuukua God-miñ asiñuktuqtut piḷġusimiŋni, iḷitchuġiŋaitkaich unnii piḷġusitka.

¹¹ Tavraasii qinnaliutivlugich unniqsuqłiiŋaruŋa, Sumikunnii isiġumiñaitchut unaŋuiqsiġvigitqukkamnun iliŋiñun.”

¹² Tavraasii Ilitqusiġiksuaq tainna uqaŋamman, Aniqatiit, qaunagisitchi iḷaanni asiñuurrauviaqtusi iñuuruamiñ God-miñ pisigilugu piḷuun ukpiġutairrullu.

¹³ Aglaan siḷġiqsuutisitchi avanmun uvlupayaani, piviksraqaŋŋaan. Nalliqsi iḷaanni uqaqsiġiiḷiviaqtuq piḷuunmi sagluqipkaġluni.

¹⁴ Qanuq piqatigiiksugut Christ-lu ukpiqsimauraġniaġupta sivulliqsun ukpiġutiptiktun tuniqsimaluta isuanunaglaan.

¹⁵ Uqallautauŋamman Bible-ni, “Uvlupak, tusaaguvsigik pitquraŋi, uqaqsiġiiḷiñasi taipkunatun iñuktun paaqłaŋaruatun.”

¹⁶ Kisut ipkua tusaagaluaqłutiŋ paaqłaŋaŋaruat? Taipkuagurut iluqaġmiŋ aullaqtuat Egypt-miñ, aullarriqaqłutiŋ Moses-mik.

¹⁷ Aasiisuli kisunik God uuligrutchautiqaŋava malġukipiani ukiuni? Taipkuniŋa piḷuusiqiraġaqtuanik nunagluktuami aasii tuquvlutiŋ.

¹⁸ Suli kisunun unniqsuqłiiŋava sumikunnii isiġumiñaiññivḷugich unaŋuiqsiġvigitqukkamiñun? Taipkunuŋa kisiiññun kamasuutaitchuanun.

¹⁹ Tavra iḷitchuġirugut iliŋich isiġumiñaiñŋaniqsut ukpiġutaił̣ł̣utiŋ.