Hebrews 2 - Iñupiatun Mumiksat Uqalugiksuat

Kamanaqtuaq Annaun

¹ Tavra tamatkua ukpiġiŋakkavut naalaġnimmaġiksaapiagaksraġigivut taapkunaŋŋa tusaagayukkaptiŋniñ asiñuurrauŋitchumaugut.

² Tavra isaġulgich uqallautaat taŋŋiqsaullaruq, qanuq tamatkua kamaksriŋitchuat pitquranik tatavsaqtausuurut nalliummatiruamik.

³ Qanuġluta uvagut annakkumiñaipiaqtugut ukpiġiŋisuaġuptigu kamanaqtigiruaq qanutun annaun. Taamna annaun uqautigiqqaaŋagaa Atanġum, aasii tamatkua tusaaruat qaaŋiqsinŋagaat nalupqinaiqł̣ugu uvaptiŋnun.

⁴ Suli God-im nalupqinaiġmivḷugu aliuġnaqtuatigun, allakaaġiisigullu kamanaqtualiqiatigun, Ilitqusiġiksuamiglu God-im aitchuutaanik uvaptiŋnun ikayuqtiksraptiŋnik piḷḷuataqtilluta God-im savaaġitqukkaŋiñik.

Aullarriŋat Annaurrauruat

⁵ God-im isaġuliŋnun aitchuutigiŋaitkaa nuna qaiyumaaqtuaq uqautigikkaqput aŋalataġitqulugu.

⁶ Uqaluktuaguŋammiuq imma sumi, “God suksraq una iñuk isumagillamaran? Naaggaunnii iġñiŋa iñuum qaunagillamaran?

⁷ Iñuk inillaŋagiñ sivikitchuami kamanaił̣haaqługu isaġuliŋniñ. Kamanaqsipkaŋagiñ isumakkusialluatamiglu, [suli inillakługu qaunaksriḷiutivlugu savaaġnun.]

⁸ God iḷiŋagiñ sunapayaaq ilaanun aŋalataġillasivḷugu.” Tavra iḷikamiuŋ sunapayaaq aŋalataġillasivḷugu iñuŋmun, suna mininŋaitkaa aŋalatchiñiŋan. Paŋmapakaglaan tautuaġiŋitkikput sunapayaaq iñuŋmun aŋalataġipkallalugu.

⁹ Aglaalli tautukkikput Jesus, sivikitchuamik kamanaiqsaullaktuaq isaġuliŋniñ. Aasii pisigivlugu nagliksaaqłuni tuquniŋa kamanaqsipkaqtauŋaruq, isumakkusialluatamiglu. Suli nagliktuutiqpaŋagun God-im tuquŋallaŋaruq pisigivlugu iñupayaaq.

¹⁰ God-im supayaat aŋalataġigai, suli supayaat salapqiagaat ilaan kamanautaa. God killukuaŋaitchuq Iġñini nagliksaaqtinnamiuŋ annautisukługich iñugiaktuat iġñiġich, qiḷaŋmuquvlugich. God killukuaŋaitchuq Iġñini nagliksaaqtinnamiuŋ, qanuq tainna pikami, aullarriġuŋagaa naamasivḷugu annaŋniksraqput.

¹¹ Qanuq taamna ilaaguaqsiruaġlu God-mun tamatkualu ilaaguaqtauruat God-mun iluqaġmiŋ atautchimiñ Aapamiñ maŋŋuqaqtut. Taamna pisigivlugu Jesus kanŋugiŋitkaa taigumigich aniqatinik,

¹² uqaqłuni, “God quliaqtuaġiniaġiga atqiñ aniqatiimnun, akunġanni aŋaiyyuliqiruat nanġaġniaġikpiñ.”

¹³ Suli Jesus uqallavsaaŋaruq, “God-mun ukpiġniaqtuŋa.” Uqallavsaaġmivḷunisuli, “Uvaniittuŋa piqatigivlugich miqłiqtut God-im aitchuutiŋi uvamnun.”

¹⁴ Miqłiqtutaasii atunim timiqaġmata, ilaaptauq tainnatun timiniŋaruq, tuqqutikun suksraunġiġukługu Tuunġaq tuqupkaiḷḷaruaq iñuŋnik.

¹⁵ Suli Jesus tuquŋaruq iñuich sivuuġaruat tuqqunmik sivuuġaŋaiquvlugich tavraŋŋaaglaan.

¹⁶ Qanuq nalupqinaitchuq, isumaaluuttaqaŋitchuq isaġuliŋnik, aglaan kiŋuniiŋiñik Abraham.

¹⁷ Taamna pisigivlugu Jesus timiqaqtuksrauŋaruq aniqatiimisun, nagliksrauluni piḷḷuatautikullu aŋaiyyuliqsiqpaŋnun qaukłiutquvlugu savaurriñiġmi God-mik, naamaruamik akiḷiitquvlugu piḷuutiŋisigun iñuich.

¹⁸ Aasii ilaan ikayuġumiñaġai tamatkua piḷuksipkaġniaqtauruat, ilaaptauq nagliksaaŋavluni piḷuksipkaqtauniaġnikun.