Hebrews 13 - Iñupiatun Mumiksat Uqalugiksuat

Qanuq Iviġagnaġumiñaqtilaaŋa God-im

¹ Aniqatigiiksusi piviuttaqqutisitchi ataramik.

² Tukkuliisitchi iglaaguruanik, qanuq iñuich iḷaŋich tuyuġmiaqaŋarut isaġuliŋnik, nalullaisa isaġulgutilaaŋat.

³ Itqaumasigik tamatkua tigutaaqtauruat, tigutaaġviŋmiitqatigimmatun illugich, tamatkualu pimaqłuktaqtauruat, pimaqłuktaqsiqatigimmatun illugich.

⁴ Katitirrun isummatigipkaġluataqsiuŋ akunġanni iñupayaat, suli katitirrutim unniqsuqłiisiŋi sumikunnii navignasigik, qanuq God-im isivġiġñiaġai allatuqtit tuvaaqataitchuallu tuvaaqatiqaqtuallu atunim.

⁵ Qaunakkusiuŋ iñuuniaġniqsi iñuusuŋiḷḷusi manik kisian pisigilugu, suli apaigilugu pigikkaqsi, qanuq God uqallaŋaruq, “Uvaŋa sumikunnii qimaŋniaŋitkivsi naaggaunnii suksraaġlusi.”

⁶ Taamna pisigilugu nalupqisuŋiḷḷuta uqallakkumiñaqtugut, “Ataniq ikayuqtigigiga, iqsiñiaŋitchuŋa qanuqsaagaluaqpaŋa iñuum.”

⁷ Piiguġnagich aullarrisi, uqaurriŋaruat ilivsiññun uqaluanik God-im, isumalaaġutigilugu nalaunŋaruaq iñuggutaat, suli ukpiġutiqaġlusi iliŋisitun.

⁸ Jesus Christ qanuqiḷiḷaitchuq ikpaksraġlu uvlupaglu taimuŋalu.

⁹ Tavraasii asiñuutipkaġnasi iñuŋnun iñugiaktuatigun allanaqtuatigun iḷisaurriruanun. Ukpiġutivsiññi suaŋasiḷaaqtausitchi nagliktuutiqpaŋagun God-im, pitquranik niqitigun kamaksriñiŋiḷaakun aŋaiyyuliqiniġmi pitquratigun anniqsuiḷaitchuatigun tamatkuniŋa piqutiqaqtuanik.

¹⁰ Uvagut aitchuutinun ikipkaiviqaqtugut tamatkua savaurriruat tupiġmik niqiksraġvigiyumiñaisaŋannik.

¹¹ Qanuq qatigaŋich tamatkua niġrutit ikipkaġayukkaich siḷataani iniqpaum, auŋich aŋaiyyuliqsiqpaum qaġġisikkaŋisa salumaruamun inimun ikipkautausaqługich piḷuutaiġutautquvlugich.

¹² Tainnatun Jesus-tauq nagliksaaŋammiuq siḷataani paaqpaum ilaaguaġukługich God-mun iñuich ilaan auŋmigun.

¹³ Taamna pisigilugu aullaqta ilaanun siḷataannun inauruat, igḷutuaqaġluta piaqłuktausiamik ilaa pisigilugu.

¹⁴ Qanuq maani piitchugut aimaaġviŋmik iñiġlugu ittuamik, aglaan niġiuktugut aimaaġviksramik qiḷaŋmiittuamik.

¹⁵ Taamna tainnainman, Jesus ikayuqtigilugu, nanġaqsimaaġlakput God, taamna nanġaiñiqput aitchuiñġummatun ittuq ilaanun, quliaqtuaġutilugich allat iñuich kamanautaanik.

¹⁶ Nakuurualiqiugaġitchi suli saqqiqinnillaalusi pigikkavsiññiñ, qanuq God-im tainnatchich aitchuutit iviġaumagigai.

¹⁷ Kamagisigik aullarrisi aŋalatillusiḷu iliŋiñun, qanuq ikayuġaasi asivaquŋił̣ł̣usi Ataniġmiñ, iñuktitun quliaqtuaqtuksrauruatitun God-mun qanuq qaunaksrisilaamiŋnik ilivsiññik. Tainna piguvsi aullarrisi quviasugniaqtut ipiqtusuŋiḷḷutiŋ, aasiivsauq ilivsi anniqsuusiaqaġniaġmiusi.

¹⁸ Aŋaiyyutisiŋa, qanuq nalupqisuŋitchuŋa iñuulluataqtilaamnik aasii kipiġniuqtuŋasuli iñuulluataġukłuŋa.

¹⁹ Pitquyummiiġivsi aŋaiyyutquvlusi kipiġniupiaġataġlusi uvaŋa utiqtitautquluŋa ilivsiññun qilamipayaaq.

Aŋaiyyun

²⁰ God, aitchuiruaq tutqiunmik, aŋipkaiŋaruq Ataniptiŋnik Jesus-mik tuqqunmiñ, qaunaksriruamik uvaptiŋnik imnaiḷiqirigiksuaq qaunaksrimmatun imnaimiñik, qanuq ilaa tuquŋaruq annautisukłuta isuitchuamun kamagivlugu God-im sivunniuġutaa.

²¹ Aasii paŋmapak God-im suaŋŋasiġḷisisuq naamaruamik, kamaksriyumiñaqsiḷusi pisuunmiñik, iñuupkallasiḷusi iviġaumanaqtuakun inmiñun Jesus Christ-kun nanġakkaptigun isuitchuamun. Amen.

Uqaluguiqsaaġutit

²² Apiġipiaġivsi aniqatiit, piavsautiginagich uqalutka siḷġiqsuiñikun tuyuutigikkatka ukunani naitchuani tuyuutini.

²³ Quyaniaqtusi tusaaguvsi aniqatikput Timothy, tigutaaqtauŋaiqsitauruq, qaiñasuaqpan piqatigilugu tautugniaġivsi.

²⁴ Paġlasigik iluqaisa aullarrisi iluqaisalu ilaaguaqtauruat God-mun. Taapkua iñuuruat Italy-mi tuyuġaasi piviuttaqqunmiŋnik.

²⁵ God nagliktuutiqpaqaġli iluqavsiññun. Amen.