Hebrews 12 - Iñupiatun Mumiksat Uqalugiksuat

God Aapakput

¹ Iluqaġmiŋ taipkua ukpiġutiqaqtuat qiñiqtuaqtuatun iñugiakłutiŋ ittut aqpaliurraqtuanik, uvagullu aqpaliurraqtuaguruatun. Tavraasii, asivaġlavut iluqaisa piñaiḷutapayaat nakuuŋitchuat, piḷuutipayaallu ayuġnaitchuat qaniłłutiŋ, aasii tikitqaurraqta piyumalaaġluta God-im pitqutaagun uvaptiŋnun,

² qiñiġlugu Jesus aullaqisaaguruaq naamasiriŋalu ukpiġutipta. Pisigivlugu quviasuun akiḷiusiaksrani, igḷutuŋagaa tuqqun aŋarraurami, sugiŋaiqł̣ugu kanŋusaaġun, aasii aquvititauŋaruq taliqpiata tuŋaanun God-im qiḷaŋmi.

³ Isumalaaġutigisiuŋ Jesus. Igḷutuiŋaruq qanutupayauraq piaqłuktautinik piḷuusiqiriniñ, tainnatulli ilivsi piyuaqsiġuvsi piḷaiŋitchumausi qapiŋasiŋiḷḷusiḷu.

⁴ Qanuq ilivsi aŋuyaŋaitchusi piḷuunmik maqitchisałhiñaaġuġlusi auvsiññik.

⁵ Piiguŋasugnaqtusi God-im uqaluanik tuqłuutiqaqtuamik ilivsiññun iġñinik, “Uvaŋa iġñiiŋ, anniqsuutauŋiññasuginagu tatavsautaa Atanġum, naaggaunnii qapiŋasiñak ilaan tatavsaqpatin.

⁶ Qanuq Atanġum tatavsaġuugaa iñuk ilaan piviuttaġikkani, suli tatavsaqługu iñupayaaq ilaan iġñiḷiutikkani.”

⁷ Igḷutugaksraġigiksi Aapamiñ tatavsausiaġiruatun. God-im aŋalatkaasi iġñiqtun iḷiuqłusi. Iġñipayaaq aapaŋan tatavsaġuugaa.

⁸ Iġñipayaat tatavsaqtaullapkaqługich, tatavsaqtaulaiñŋaniġuvsi, ilivsi aapaiḷḷiaguniqsusi miqłiqtut.

⁹ Taamnatualuuŋiñmiuq, nunami aapaqaqtugut tatavsaqtiksraptiŋnik aasii kamagisuugivut. Kamakkutiqałhaaqtuksraurugut Aapaŋannun ilitqutchivsa iñuggutiqaġumaugut.

¹⁰ Qanuq nunami aapapta tatavsaġuugaatigut sivikisuurami nalaunŋanasugikamirruŋ, aglaalli God-im tatavsaġuugaatigut anniqsuqsaqłuta, piqatigillasisaiññaquvluni uvaptiŋnun piḷuutairrunmiñi.

¹¹ Iluqani tatavsaun anniġñaqtuq quvianaitchuġlu sivikisuurami aglaan aquvatigun piḷḷuataqtitchisuuruq tamatkunuŋa ayuġaksausiaqaqtuanun tatavsausianik.

Iḷisaurrutit Kiliktuutillu

¹² Taamna pisigilugu, qapiŋaimmaġiksaaġitchi ukpiqsimaaġlusiḷu tatavsaqtaukavsi.

¹³ Iñuutchisi sivukkiruatun qaiqsuatullu apqutitun illich, suaŋaił̣haaqtuat ukpiqtuat maliġuutiyumaut puukaġaluaġnatiŋ, aasii suaŋasiḷaaqtaulutiŋ.

¹⁴ Iñupayaanun aŋuyautairrutiqaġitchi, ilaaguaqtaulusiḷu God-mun. Taapkuak piiḷḷugik, kialiqaa tautukkumiñaitkaa Ataniq.

¹⁵ Qaunagisitchi iluqasi iñuusuglusi God-im ikayuutaagun. Iluqasi killuqsrautaittitchi, qanuq salapqiġman killuqsraun isumaalluksautausuuruq, aasii iñugiaktuat piḷuksipkaqługich.

¹⁶ Kiñaliqaa allatuqtauŋiḷḷi naagga qaunakłaanġiġḷuni piññani God-mik Esau-tun, tunisiŋaruatun kiŋuvaannaktaaksrautikkaluamiñik atautchimi niġiñiġmun.

¹⁷ Qanuq iḷisimarusi aquvatigun, ilaa kipiġniutchakkaluaqami piññaktaaġisukługu kiŋuvaannaktaaksrautikkaluani, ilaa itigaurraŋaruq. Tasuqsaagaluaqamiuŋ qulvivḷuni, kiŋuġautchiŋaruq isumalitqigñiksramun.

¹⁸ Ilivsi qaiŋaitchusi iġġimun Moses aitchuusiaqaġvianun pitquranik, igniġmun ikualaruamun, taaqtuamullu, qaummaavyuktuamullu, anuġiqpaktuamullu,

¹⁹ nipauqłuktautivlu nipaanun nipimullu uqaluqaqtuamun. Iñuich tusaaruat iqsitchakpaił̣ł̣utiŋ qiññuaqtuŋarut uqautiŋaiquvlutiŋ.

²⁰ Qanuq iliŋisa iqsitchautigiŋagaat piraksriun aitchuutauruaq inmiŋnun inna, “Iñuich unnii niġrutimunniiḷu aksiukpagu iġġiq, uyaġaŋnik miḷḷuuqtauniaqtuq.”

²¹ Qanutun tatamaanaqtigiŋaruq tautukkaŋat Moses uqallallasimman, “Iqsitchakłuŋa uuliksiŋaruŋa.”

²² Aglaan qaiŋarusi Iġġianun Zion iniqpaŋanun iñuuruam God-im, Jerusalem-mun qiḷaŋmiittuamun, isaġuliŋnullu kisiññaġumiñaitchuanun quviasukłutiŋ kasimaruat,

²³ kasimaniŋannullu kamanaqtuat atiŋich aglausimaruat qiḷaŋmi, God-mullu isivġiqsauruamun iluqaiññun, ilitqusiŋiññullu nalaunŋaruat iñuich naamasipkaqtauŋarut.

²⁴ Qaiŋammiusi Jesus-mun, atisipkaiñiaqtauruamun, aitchuqłuta God-im nutauruamik sivunniuġutaanik. Nalupqinaiŋagaa God-im sivunniuġutaa maqipkaqługu auni, iḷisaurriruaq iłuałhaaqtuanik uvaptiŋnun Abel auŋaniñ.

²⁵ Qaunagisitchi kamagisuglugu God uqaqtuaq. Qanuq taipkua kamaksriŋitchuat Moses-mik tatavsaqtauŋarut, uvagut tatavsaqtaułhaaġniaqtugut kamagisuŋitkuptigu God.

²⁶ Ilaan nipiłhiñaŋata taimani aulayyaŋagaa nuna, paŋmapak-aasii ilaa unniqsuqłiiŋaruq, “Atausivsaami aulayyaksiññaġniaŋitkiga nuna aglaan qiḷaglu.”

²⁷ Taamna uqallaun, “Atausivsaamiiġun,” sivuniqaqtuq sut aŋalayyaktauyumiñaqtuat piiqsauniaqtut, qanuq savaaguŋarut. Sut aulayyaktauyumiñaitchuat itchumaaqtut isuitchuamun.

²⁸ Aitchuusiaqaqapta umialgunmik aulayyaktauyumiñaitchuamik, quyyatiqaqta suli savautilluataġlakput God qiksigipiaġataġlugu,

²⁹ qanuq God-ikput ikinnillaruatun igniqtun ittuq.