Hebrews 11 - Iñupiatun Mumiksat Uqalugiksuat

Ukpiġun

¹ Iñuk ukpiġutiqaqtuaq nalupqisuŋitchuq God-im unniqsuqłiisiŋi taŋŋiġñiaqtilaaŋannik. Suli ukpiġutaata nalupqisuŋisitkaa sut ilitqutchikun ittuat iḷumun itilaaŋannik.

² Qanuq taipkua iñuich taimani ukpiġutiqaġmata, God-im iviġaummatigiŋagai.

³ Ukpiġutiqaqłuta kaŋiqsigikput God-im uqaluŋmigun nunamik savaŋatilaaŋa, tamatkua sut tautugnaqtuat savaaguŋatilaaŋannik suniñ salapqiŋitchuaniñ.

⁴ Abel ukpiġutiqaqłuni God-mun aitchuiŋaruq akuqtuġnałhaaqtuamik ikipkaunmik Cain-miñ, taavrumuuna ilaa iviġaumakkusiaqaŋaruq nalaunŋarualirauvluni. God-im nalunaiŋagaa iviġaumatilaani akuqtuqługich aitchuutiŋi. Abel tuquŋagaluaqtuq, ukpiġutaaniñ iḷitchiyumiñaqtugut suli.

⁵ Enoch ukpiġutiqaqłuni mayuurrauŋaruq qiḷaŋmun tuqugaluaqtinnagu, aasii paqinnaiñŋaruq, qanuq God-im qiḷaŋmuutiŋagaa. Aasii mayuurrauŋaiñŋaan, God-im nalunaiŋagaa Enoch iviġaumagitilaaŋanik.

⁶ Tavra kialiqaa ukpiġutaitchuam iviġagumiñaipiaġaa God. Qanuq kiñaliqaa qaisuktuaq God-mun ukpiqtuksraupiaqtuq God-iqaġniḷugu, suli paqitillaniḷugu tamatkunuŋa ivaqłiapiaqtuanun inmiñik.

⁷ Noah-m ukpiġiŋagaa God uqallautimmani suna piñiaqtilaaŋanik. Tautuŋaitkaluaŋŋaan uliqpaktuksraq, arguaginiḷugu God, umiaqpiŋaruq annautisukługich igluqatini. Umiaqpivḷuni salapqiŋagaa ukpiġutairrutaat nunam iñuŋisa aasii suksraunġiqsauŋarut. Pisigivlugu Noah-m ukpiġutaa God-im akuqtuŋagaa.

⁸ Ukpiġutiqaqłuni, Abraham kamaksriŋaruq God-im ququaġmani aullaquvlugu nunamun aitchuusiaġiyumaakkaġmiñun kiŋuvaaġitqulugu. Tavra aullaŋaruq, nalullaġmi sumun aullaġniaqtilaamiñik.

⁹ Ukpiġutiqaqłuni tuyuġmiaġuŋaruq nunami God-im unniqsuqłiisaani inmiŋnun, tupiqtuqłutiŋ allami nunami inmatun. Tainnatuttauq Isaac-lu Jacob-lu tupiqtuŋammiuk kiŋuvaannaktaaksraunmiŋni taavrumani nunami unniqsuqłiisauruami.

¹⁰ Qanuq Abraham niġiugaqaŋaruq iniqpaŋmik nuktaŋitchuamik iñuuviksramiñik, God-im payaŋaiqł̣ugu nappakkaŋanik ilaan isumamigun.

¹¹ Ukpiġutiqaqłuni, Sarah aaquaŋagaluallaġmi siŋaiyaupkaqtauŋaruq, qanuq ukpiġiŋagaa piḷḷaruaguvlugu God unniqsuqłiiŋaruaq.

¹² Tavraasii Abraham-miñ, iñuŋmiñ atautchimiñ tuquŋaruatun iḷiŋaruamiñ, aniŋarut kiŋuniġiich iñugiaktigiliqł̣utiŋ uvluġiaŋisun qiḷaum, kisiññaisigiruatullu qaviaŋatun taġium siñaata.

¹³ Tamatkua iluqaġmiŋ tuquŋarut ukpiġutiqaqłutiŋ aitchuusiaġigaluaġnagich unniqsuqłiisauruat, aglaan iḷisimavlutiŋ taŋŋiġñiaqtilaaŋannik quviatchaktitauŋarut. Piiḷaaġiŋaitkaat iglaagutilaaqtiŋ tuyuġmiagutilaaqtiglu nunami.

¹⁴ Iñuich tainna uqaqtuat nalupqinaiġaat niġiuktilaaqtiŋ aimaaġviksramik qiḷaŋmi.

¹⁵ Isumagiŋagumirruŋ taimña nuna qimakkaqtiŋ, utiġumiñaŋagaluaqtut pisukkumiŋ.

¹⁶ Aglaan iliŋich kipiġniuŋarut iñuusukłutiŋ nakuułhaaqtuami aimaaġviŋmi, qiḷaŋmiittuami. Taamna pisigivlugu God-im kanŋusuutigiŋitkaa tairaugumi ilaisa God-iŋannik, aasii itqanaiyautiŋagai iniqpaŋmik.

¹⁷ Abraham uuktuaqtaukami ukpiġutiqaqłuni kamagiŋagaa God, aasii aitchuutigivlugu Isaac ikipkautiksrauvlugu. Taamna aitchuusiaqaŋaruaq unniqsuqłiiñmik iñugiaktuanik kiŋuniksranik itqanaiñŋaruq aitchuutigisukługuunnii iġñitualuni,

¹⁸ unniqsuqłiiŋagaluaqtillugu God inna, Isaac-kuaġlutiŋ kiŋuniqtin iñukpalliġñiaqtut.

¹⁹ Abraham nalupqigiŋaitkaa God aŋipkaiyumiñaqtilaaŋanik Isaac-mik tuqqunmiñ. Tavra tainna pimman, iġñini aitchuusiaġitqiŋagaa iñuuvlugu, tuquŋaruatun iḷigaluaqtuaq.

²⁰ Isaac ukpiġutiqaqłuni uqallaŋaruq iġñagmiñun Jacob-mullu Esau-mullu God-mun aitchuutiginiaġnivḷugich quviasaaġusiat piyumaaqtuat.

²¹ Jacob tuquaqsikami, ukpiġutiqaqłuni uqallautiŋagik atausiullaavlugik iġñiŋik Joseph piḷḷuatausiaqaquvlugik, sikimmivḷuni aŋaiyyuŋaruq ayauppiaqsimaaqłuni.

²² Joseph, tuquyasikami, ukpiġutiqaqłuni uqallausiġiŋagaa aullaġniksrautaat Israel-guruat Egypt-miñ. Aasii nalupqigiŋił̣ł̣ugu aullaġniaqtilaaŋat, piraksriiŋaruq aullatitquvlugu iḷuviñi.

²³ Moses animman aŋayuqaak ukpiġutiqaqłutik, iriqsimaŋagaak tatqiñi piŋasuni. Tautukamitku miqłiqtułhiñauŋitpalliġman, sivuuġagiŋaitkaak kamaksriŋiññiksraq umialgum pitqurriutaanik aŋugaurat tuqutquvlugich.

²⁴ Moses ukpiġutiqaqłuni God-mun aŋutiġuanikami, iñuusuŋiñŋaruq iġñiġuluni Pharoah-m panianun,

²⁵ tigusiaġiłhaaqługu pigiitchuakun aŋalatauniq piqatigilugich God-im iñuŋi aliasuŋisaaġutiqallagniġmiñ piḷuutinik piiġaqtuanik.

²⁶ Ilaa nagliksaaŋaruq pimaqłuktausiaqaqłuni piqatigivlugich iñuŋi God-im, nagliksaaġmatun Christ pisigivlugu. Aasii isummatigiŋagaa nagliksaaġniq anniqsuutaułhaaqługu suġaliŋiñiñ Egypt, qanuq ilaa ukpipiaŋaruq God-mun akiḷiġñiaġnivḷuni.

²⁷ Ukpiġutiqaqłuni Moses qimaŋagaa Egypt, iqsigiŋaiqł̣ugu qinnautaa umialgum qanuq sivunmuuŋaruq iñuktun tautuaġiruatun God-mik tautugnaitchuamik.

²⁸ Moses ukpiġiŋagaa God uqallautimmani piraksriqł̣ugich iñuich imnaiyaam auŋanik qivsaliquvlugich upkuat avatiŋich, God-im isaġulganun tuqqutauruamun tuqutquŋił̣ł̣ugich aŋayukłich miqłiqtuŋich, miqłiqtuŋisun tuqutauruatun Egypt-miut.

²⁹ Ukpiġutiqaqłutiŋ Israel-guruat ikaaŋagaat taġiuq atiqaqtuaq Red Sea-mik, pisuaqłutiŋ paliumaruakun nunakuaġmatun. Aglaalli Egypt-miut, tainnatun pisaġaluaqamiŋ ipigiññaŋarut.

³⁰ Ukpiġutaatigun Israel-guruat katchiġruaŋi Jericho-m ulġupkaqtauŋarut kaivaluqqaaqługich tallimat malġugni uvluni.

³¹ Ukpiġutiqaqłuni, Rahab allatuqti tuqutauŋaitchuq iñuich piqatigilugich tuqummata iñuuruat Jericho-mi ukpiġiŋił̣ł̣ugu God, ilaan iḷammiuġutikun paġlaŋavlugich nalunaqtuakun takuuqtit.

³² Uqautivsaaġumiñaġaluaġivsi iñuktigun ukpiġutiqaqtuatigun. Sivisuvaitchuq quliaqtuaġisaġupkich Gideon-lu Barak-lu Samson-lu Jephthah-lu David-lu Samuel-lu uqaqtiŋiḷu God-im.

³³ Ukpiġutiqaqłutiŋ akimaŋarut umialgutiniñ, piŋarut nalaunŋaruanik pitqiksiġautairrunmiglu, akuqtuiŋarut God-im unniqsuqłiisiŋiñik, annaurrauŋarut lion-niñ,

³⁴ ikiŋaitkai ikualaqpaktuam igniġum, allattauq annaŋarut savikpakun tuqutauniksramiñ, allattauq suaŋŋatinnaŋarut suaŋaiḷikamiŋ, iḷaŋitchauq sapiġñaqsiŋarut aŋuyakamiŋ, aasii pigruqtitchiŋarut allat nunat aŋuyaktiŋiññik.

³⁵ Ukpiġutiqaqłutiŋ, aġnat aitchuusiaqaŋarut tuquriamiŋnik aŋipkaqtauvlugich. Iñuich iḷaŋich anniġñapiaġataqtuakun nagliksaaqtitauŋarut, pisuŋiñŋagaat tigutaaqtauŋaiḷḷaŋniksraq, aŋisukłutiŋ nakuułhaaqtuamun iñuggunmun.

³⁶ Allattauq nagliksautigiŋagaat kipakkusiaq ipiġaqtuqsiġñiġlu, qiḷiqsruivḷugiḷḷu tigutaaqtauvlutiglu.

³⁷ Ukpiġutiqaqłutiŋ uyaġaŋnik miḷḷuuqtauŋarut, uluaqtuqtauŋarullu malġuułługich, uuktuqtauŋarut, tuqutauŋarut savikpaŋnik, kukiḷuŋarut annuġaaqaqłutiŋ niġrutit amiŋiññik piiḷḷiuqłutiŋ, iłuiḷḷiuqtitauvlutiŋ, anniaqtauvlutiglu.

³⁸ Maliqataqsiŋarut nunagluktuakun iġġisigullu iriqtuqłutiŋ qaiġusuŋiñiḷu nunam. Iliŋich nunam iñuŋisa naligiŋitkaich.

³⁹ Aasii taipkua iluqaġmiŋ ukpiqtuaguvlutiŋ, iviġaumanaġaluaqtuat God-mun aitchuusiaġiŋaitkaat God-im unniqsuqłiisaa,

⁴⁰ qanuq God sivunniŋaruq nakuułhaaqtuamik uvaptiŋnun. Taipkua utaqqiruksrauŋarut uvaptiŋnik piqatigiyumiñaqsitchiaġiluta God-im unniqsuqłiisaanik.