Hebrews 10 - Iñupiatun Mumiksat Uqalugiksuat

¹ Tavra pitqurat taġġauruatun isiññaŋarut sunun anniqsuutauyumaaqtuanun Christ qaġġisiniakkaŋiñun. Pitqurat aitchuiḷaiñŋarut tamatkuniŋa anniqsuusiaksranik. Taamna tainnainman pitqurat piḷuutaiqsiḷaiñŋarut tamatkuniŋa qalliḷaaqtuanik God-mun tamatkunuuna ikipkautitigun aitchuutausuuruatigun ukiutuaġman.

² Ikipkautit piḷuutaiqsiḷḷapiaqpata aġiunayaqtut pitqigaŋaiġḷugich. Aŋaiyyurauruat atausiaġlugu taimuŋa piḷuutaiqsaullakpata, tavraŋŋaaglaan itqatqikkayaitkaich piḷuutit.

³ Tavraaglaan tamatkua ikipkaisit aitchuutauruat ukiutuaġman itqaqtirrutauraqtut piḷuusiqirautilaaŋannun iñuich.

⁴ Qanuq auŋich ikipkautausuuruat niġrutit piḷuutaiġutauyumiñaitchut.

⁵ Tainnainniġmata, Christ nunamukami, ilaa uqallaŋaruq God-mun, “Kipiġniuttaġiŋaitkitin ikipkautit aitchuutillu, aglaan timimik itqanaiqsisiŋagiŋma tuquyumiñaquvluŋa.

⁶ Ikipkautit aitchuutit piḷuutaiġutiksrat pisuġuiġutigiŋaitkitin.

⁷ Taamna pisigivlugu uqallaŋaruŋa, God-auruatiin, uvaŋa qaiŋaruŋa kamagiyaqtuqługu pisuutin, aglausimaniŋatitun uvapkun Bible-ni.”

⁸ Ilaa uqallaqqaaŋaruq, “Kipiġniuġutiqaŋaitchutin pisuġuiġutiqaŋaitchutillu ikipkautinik qanusipayaanik aitchuutauruanik tuvraqługich pitqurat.”

⁹ Aasii uqallavsaaŋaruq, “Uvaŋa qaiŋaruŋa kamagiyaqtuqługu pisuutin.” Christ-gum piqutauŋaiŋagaa sivulliq sivuniqaqtuaq ikipkautinik aitchuiñiq tuvraqługich pitqurat, aasii inillakługu tuglia, sivuniqaqtuaq kamaksriñiġmik God-im pisuutaanik.

¹⁰ Tavraasii Jesus Christ-gum kamagiŋagaa God-im pisuutaa, aitchuutigivlugu timini atausiaqługu taimuŋa piḷuutit pisigivlugich, aasii ilaaguaqłuta God-mun.

¹¹ Aŋaiyyuliqsiqpapayaaq nunamiittuaq makitasuuruq uvlutuaġman savaaġiramiñi, aitchuigaluamiiqł̣uni taapkuniŋasuŋaiññaq ikipkautinik, piḷuutaiġutauyumiñaitchuanik.

¹² Tavrali Christ aitchuiganikami ikipkaunmik piḷuutinun atautchimi taimuŋa, ilaa aquvinŋaruq God-im taliqpiata tuŋaanun,

¹³ tavrani utaqqisaqłuni akiiḷitchiaġilugich uumigirini.

¹⁴ Qanuq atausiaqsiññaqłuni aitchuivḷuni ilaan piḷuutaiŋagai taimuŋa tamatkua ilaaguaqtauruat God-mun.

¹⁵ Taamna Ilitqusiġiksuam nalupqinaiŋagaa uvaptiŋnun, uqallakłuni inna,

¹⁶ “Uvvauna sivunniuġun taŋŋiqsinniakkaġa ilaiññun aquatigun tamatkua uvlut, uqaqtuq Ataniq. Pitquratka kamagipkaġniaġitka itqaumapqaġlugiḷḷu iliŋiññun.”

¹⁷ Suli uqallavsaaqłuni, “Itqaumaŋaiġñiaġitka piḷuutiŋiḷḷu kamasuutairrutiŋiḷḷu tavraŋŋaaglaan.”

¹⁸ Piḷuutillu kamasuutairrutillu suliqutigiŋaiqsaummata, aitchuiviksraiqsuq ikipkautinik piḷuutit pisigilugich.

Qalliḷaaqta God-mun

¹⁹ Tavraasii aniqatiit, attaqsrautairrutiqaqtugut isiġumiñaqłuta inimun ilaaguaqtaułhamaaqtauruamun God-mun auŋagun Jesus,

²⁰ ilaan aŋmautiŋagaatigut nutauruamik apqunmik qalliḷaaġviksraptiŋnik God-mun aasii iñuuluta isuitchuamun. Aŋaiyyuliqsiqpaich qaukłiatun qalliḷaaqtuatun God-mun amuŋatchianun talukiyaam, uvaguttauq qalliḷaaġumiñaġmigikput God timaagun Jesus, aitchuutigikkaŋagun tuquvluni.

²¹ Suli kamanaqtuamik aŋaiyyuliqsiqpaqaqtugut atanġuruamik God-im igluqatiŋiñun.

²² Taapkua tainnainniġmata, qalliḷaaqta God-mun iḷumutuuqtuamik uummatiqaġluta ukpiġutiqaġlutalu nalupqisuŋipiaqtuamik, isumaaluutaiġḷuta piḷuutiptiŋnik, suli salummaqtaupiaġluta piḷuutiptiŋniñ.

²³ Nalupqisuŋipiaqta qanuġliqaaŋaiġḷutalu uqautigiguptigu ukpiġikkaqput, qanuq God unniqsuqłiiŋaruaq ukpiġnapiaqtuq.

²⁴ Suli isumalaaġutigilakput qanuġluta qapiŋaisaaġutisugluta avanmun piviuttaqqutiniġmun piḷġusiġiksuanullu.

²⁵ Katitqataqta piŋitqataaŋaiġḷuta atautchimun, piḷġusiġiliutikkaŋatitun iḷaŋisa iñuich iḷisimalugu Atanġum uvlua qallisaiññaqtuaq.

²⁶ Qanuq piḷuusiqiugaaġupta pisaaġiugaġluta kaŋiqsiŋaqqaaġlugu iḷumun ittuaq, ikipkautiksravsaamik allamik piitchuq piḷuutiptiŋnun piiġutiksramik.

²⁷ Aglaan imma ittuq sivuuġanaqtuaq niġiugiraksraqput isivġiqsauviksraun, suli suamaruaq igniq suksraunġiiñiaqtuaq uumigiriŋiññik God-im.

²⁸ Iñuk kamaksriŋitchuaq Moses pitquraŋiñik tuqutaugayuŋaruq nagligiriqayuitchuq, uqaġiriqaġman malġuŋnik piŋasuniglu iḷisimaruanik piḷuusiqimman.

²⁹ Qanutun suaŋałhaaqtuamik tatavsagaksrauruq iñuk tununniktuaq God-im Iġñiŋanik, anniqsuutauŋiññivḷugu Christ tuqqutaa ilaan ilaaguaqtirrusiani God-mun, aasii pisaaŋavlugu Ilitqusiġiksuaq nagliktuutiqpaqaqtuaq inmiñun.

³⁰ Qanuq iḷisimagikput kiutilaaŋa uqallaŋaruaq, “Nalaunŋaruamik uvaŋa piñiaqtuŋa. Uvaŋa akisaurriñiaqtuŋa.” Suli uqallavsaaŋaruq, “Uvaŋa Atanġuruaŋaa isivġiġñiaġitka iñutka.”

³¹ Sivuuġanaqtuq tatavsaqtitchumiñaqsiruni God-mun iñuuruamun.

³² Tavra itqaqsigik sivulliich taipkua uvluġiŋarasi ukpiqqaaqavsi, igḷutuŋagisi nagliksaaġutiqpaich akiiḷipkaġaluaġnasi.

³³ Iḷaanniusi piaqłuktaqsiġuuŋarusi iłuiḷḷiuqtitausuurusiḷu iñuich takkuanni. Iḷaannisuli piqatausałhiñaaġuqłusi tainna aŋalatauruanun.

³⁴ Qanuq naglikkutiqaġuuŋarusiḷu tigutaaqtauruanun, suli sugilaitkiksi aqsaktauniq suġauttavsiññik, akuqtuqsimaaqługu suġaliqaqtilaaqsi nuŋuyumaaŋitchuanik qiḷaŋmi.

³⁵ Taamna pisigilugu attaqsraŋirrutiqaġitchisuli Ataniġmun, kamanaqtuamik akiḷiusiaqaġniaqtusi.

³⁶ Aglaan manimmiḷgutiqaqtuksraurusi nalautchiyumiñaġuglusi pisuutaanik God-im aasii aitchuusiaqaġlusi ilaan unniqsuqłiisaanik iñuggunmik isuitchuamik.

³⁷ Qanuq Bible uqaluqaqtut inna, “Piñatchiaqpakkumiñaiqsuq qaiyumaaqtuaq qaiñiaqtuq. Ilaa muluniaŋitchuq.

³⁸ Aasii nalaunŋaruatka iñuuniaġniaqtut ukpiġutiqaġlutiŋ. Aglaan tununniktuat uvamnik iviġaumagiŋitkitka.”

³⁹ Aglaan ami uvagut iḷaliqsuutiŋitchugut tamatkunuŋa tununniktuanun Ataniġmik aasii suksraunġiqsauvlutiŋ, aglaan iḷaurugut tamatkunuŋa ukpiqsimaaqtuanun aasii annaurrauvluta isuitchuamun.