Hebrews 1 - Iñupiatun Mumiksat Uqalugiksuat

God-im Uqaluŋi Uqaqtigivlugu Iġñini

¹ Qaŋapak taimani God uqaġuuŋaruq maŋŋuuptiŋnun uqaqłuni uqaqtimigun iñugiaktuatigun allakaaġiiksuatigullu piḷġutchisigun,

² aglaan makkunani aqulliġñi uvluni ilaan uqautiŋagaatigut uqaqłuni Iġñiġmigun, nalunaiqsamigun kiŋuvaannaquvlugu supayaanik, ilaan piqatigivlugu Iġñiq savaŋavlugich supayaurat.

³ Iġñiġum salapqiŋagaa God-im kamanautaa, salapqiqł̣ugulu God-im qanuqitilaaŋa, nayummivḷugu sunapayaaq uqaluŋmigun suaŋaruakun. Ilaa salummautauganikami piḷuutiptiŋnun, aquvinŋaruq taliqpiata tuŋaanun God-im kamanaqtuam qiḷaŋmi.

Iġñiq Kamanałhaaqtuq Isaġuliŋniñ

⁴ Tavra kamanaqsił̣haaŋaruq isaġuliŋniñ suli God-im atchiŋagaa kamanałhaaqtuamik atiġmik ilaisa atiŋiññiñ.

⁵ Qaŋaunnii God uqallaŋaitchuq inna isaġuliŋmun. “Ilivich Iġñiġigikpiñ. Uvlupak aapagiliutigiŋma.” Naaggasuli God uqallaŋaitchuq isaġuliŋnun, “Aapauniaqtuŋa iliŋnun, iliviḷḷiasii iġñiġulutin uvamnun.”

⁶ Aasiisuli, God-im tilimmagu nunamun Iġñitualuni qaukłiuruaq, uqallaŋaruq, “Iluqaġmiŋ isaġuliŋma nanġaġlirruŋ.”

⁷ Suli isaġulgich uqallausiġiŋagai God-im, “Isaġuliŋma kamagigaanŋa anuġim kamaksrisiatun, suli kivgama kamagigaanŋa igniġuuqpatittuam kamaksrisiatun uvamnik.”

⁸ Aglaan Iġñiq God-im uqallausiġiŋagaa, “God-auruatiin, umialguniaqtutin isuitchuamun. Nalaunŋaruaq ataniġnaqun suaŋŋatiginiaġaa umialgutikpich.

⁹ Piviuttaġiŋagiñ iłuaqtualiqiniq aasii uumigivlugu pitquraiḷaġniq. God-aurutin, tavraasii Uvaŋa God, Aapauruaŋaa iliŋnun, inillaŋagikpiñ kamanaqsił̣haaqłutin iḷauraaġniñ, immiqł̣utin quviasuunmik.”

¹⁰ God uqallavsaaŋaruq, “Ilivich Ataniiq, inillaŋagiñ nuna isuaniñqaŋa, suli qiḷak savaŋagiñ.

¹¹ Qiḷaglu nunalu piiġñiaqtuk, annuġaaluktun iḷiñiaqtuk, aglaan ilivich qanuqiḷiḷaitchutin.

¹² Uligaatun imuniaġitin aasii allaŋŋuqtauniaqtut. Aglaan ilivich Ataniiq allaŋŋulaitchutin utuqqaliḷaitchutillu.”

¹³ Aasii kisumun isaġuliŋmun qaŋaunnii uqallaŋaitchuq inna: “Aquvittin taliqpiŋma tuŋaanun, uumigiritin uvamnun akiiḷitchiaġilugich.”

¹⁴ Isaġulgich suuvat? Isaġulgich iluqaġmiŋ savaurriruagugiññaqtut ilitqusiuvlutiŋ tilirauruat savaurritquvlugich annaurrauniaqtuanik.