Genesis 9 - Iñupiatun Mumiksat Uqalugiksuat

God-im Sivunniuġutaa Noah-mun

¹ God-im quviasaaġusiamik uqallautiŋagaich Noah-lu iġñiŋiḷḷu uqallakłuni, “Iñugiaktuanik miqłiqsiyumausi, kiŋuvaaġiniaqtasi iñuuyumaut sumipayaaq nunami.

² Iluqatiŋ niġrutit, tiŋmiat, paamġuqtuat nunami, iqaluiḷḷu iñuuniaqtut iqsigilusi. Tavra qaisaurut iḷivsiññun aŋalatquvluġi.

³ Niġrutipayaurat niġiyumiñaġisi. Niġisuuravsitullu nauriatun, iluqaisa qaitkitka ilivsiññun niqigitquvlugich.

⁴ Atausitualuk uvva niġiñiaŋitchaqsi, auqaqtuaq niqi; taamna pitquŋitkiga qanukkii iñuggun tavrani augmi ittuq.

⁵ Iñuk iñuaqpan, tatavsaqtauniaqtuq. Tatavsaġniaġiga tuqqunmik niġrutipayaaq iñugmik tuqutchiruaq.

⁶ Iñuich savaaguŋarut irrusiqaqługich God-itun, tavraasii iñuaqtuaq iḷaŋannik tuquttaksraġigaa allam iñuum.

⁷ “Ilivsiḷi iñugiaktuanik miqłiqsiyumausi, kiŋuvaaġiniaqtasi iñuuyumaut sumipayaaq nunami.”

⁸ God-im uqallautigaich Noah-lu iġñiŋiḷḷu,

⁹ “Inillairuŋa sivunniuġunmik ilivsiññun suli kiŋuvaaġiniaqtavsiññun,

¹⁰ suli piqatigilugich iñuggutiqapayaaqtuat—tiŋmiapayaat niġrutipayaallu—iluqaisa niuqatigiŋarasi umiaqpagmiñ.

¹¹ Ukuniŋa uqalugnik sivunniuġutiliuqtuŋa ilivsiññun: Unniqsuqłiiruŋa qakuguunnii iluqaġmiŋ iñuggutiqapayaaqtuat suksraunġiqsautqigñiaŋitchut uliqpakun; qakuguunnii uliqpaum suksraunġitkigñiaŋitkaa nuna.

¹² Nalunaiñŋutausaġlugu isuksraiḷaamun inniaqtuaq sivunniun inillaktaġa ilivsiññun suli iluqaiññun iñuggutiqapayaaqtuanun,

¹³ iḷisiruŋa pimñik tulimmaġmik nuviyanun. Nalunaiñŋutauniaqtuq sivunniutigiramnun nunamun.

¹⁴ Nuviyaliqsituaġupku aasii nuiḷuni tulimmaq,

¹⁵ itqaumaniaġiga sivunniuġutigiraġa ilivsiññun niġrutipayaanullu. Uliqpaum qakuguunnii suksraunġitqigñiaŋitkaich iluqaisa iñuggutiqapayaaqtuat.

¹⁶ Tulimmaq nuituaqpan nuviyani, tautugniaġiga aasii itqaġlugu taimuŋa inniaqtuaq sivunniuġun uvamniñ suli iluqaiññun iñuggutiqapayaaqtuanun nunami.

¹⁷ Tavra taamna nalunaiñŋutauniaqtuq sivunniuġutigiramnun iluqaiññun iñuggutiqapayaaqtuanun.”

Noah-lu Iġñiŋiḷḷu

¹⁸ Iġñiŋich Noah-m niuqatigiŋaraŋich umiaqpagmiñ ukua Shem-lu, Ham-lu, Japheth-lu. (Ham aapagiraŋa Canaan-gum.)

¹⁹ Tavra taapkua piŋasut iġñiġiraŋich Noah-m maŋŋuġigaich iluqaġmiŋ iñuich nunamiittuat.

²⁰ Noah, nunami nauruanik savaaqaqtuaq, nautchirriiqqaapialaŋaruq siiġñanik wine-liaksranik.

²¹ Imianikkami iḷaŋanik wine-gum, imiŋasiŋaruq, annuġaiyaŋaruq, aasii annuġaiḷḷaġmi nalavluni tupiġmiñi.

²² Ham-gum, aapauruam Canaan-mun, tautukkamiuŋ aapani annuġaitchuaq, anivḷuni kiliŋagaik aniqatiigni.

²³ Tavraasii Shem-lu Japheth-lu uligaaq tuiqqagmignullaavlugu, kiŋuppiaqtuqhutik tupiġmuŋaruk aasii matuvlugu aapaktik, tununŋavlutik, tautuguŋił̣ł̣ugu annuġaiḷaq.

²⁴ Noah qaurigami, iḷitchuġikkami Ham-mun nukaqłigmun suŋatilaamiñik,

²⁵ uqallaktuq, “Piaġiiññaq iḷiḷi Canaan-mun, iġñiŋanun Ham-gum! Kivgauniaqtuq aniqatiimiñun, atchiksuagułhaaġluni kivgaŋiññiñ.

²⁶ Nanġaun qaisauli Ataniġmun, God-igiraŋanun Shem-gum! Canaan kivgauniaqtuq Shem-mun.

²⁷ Qanuqtuq God-im Japheth naupkaġliuŋ! Kiŋuvaaŋich iñuuqatauyumaut iñugiraŋiñun Shem-gum! Canaan kivgauniaqtuq Japheth-mun.”

²⁸ Uliqpaanigman Noah iñuuvsaaŋaruq 350-ni ukiuni

²⁹ aasii tuquvluni 950-tun ukiuqtutilaanikkami.