Genesis 8 - Iñupiatun Mumiksat Uqalugiksuat

Uliqpaŋaiġman

¹ God-im piiguŋaiññiġaa Noah niġrutipayaallu itqatigiraŋich umiaqpagmi; anuqłiġuqtinŋagaa, aasii imaiġuraaqsaŋaruq.

² Siiqsinniġich suppuqhiaġaqtuat immamik taġiumiñ itiruamiñ nutqaŋarut, upkuaŋich immat qiḷaŋmi umiŋarut, sialukpaŋaiŋaruq,

³ aasii imaiqsaiññaŋaruq 150-ñi uvluni.

⁴ Akimiaq malġuanni (17th) uvlut, tallimat malġuanni tatqich, umiaqpak imaiġurrauŋaruq iġġiŋiññun Ararat-mi.

⁵ Imaiqsaiññaŋaruq, aasii sivulligmi uvlumi, quliŋanni tatqich, qiñiġnaqsiŋarut qaaŋich iġġich.

⁶ Malġukipiaq (40) uvlut pianiŋmata Noah-m agmaŋagaa igalauraq,

⁷ aasii aullaqtitchivḷuni tulugamik. Utiqtaŋaruq tulugaq imaiġataqtillugu.

⁸ Tainnaitkaluaqami, Noah aullaqtitchiḷgitchuq tiŋmiamik iḷitchuġisaqłuni imaq anmuktilaaŋa,

⁹ aglaan immam matuŋavlugusuli iluqaan nuna, tiŋmiaq mitchaaġviksraiñŋaruq. Utiŋaruq umiaqpagmun, aasii Noah-m isaaqłuni mitchaaġman argagmiñun itqutiŋagaa umiamun.

¹⁰ Utaqqivsaaqqaaqłuni tallimat malġugni uvluni aullaqtilgitkaa tiŋmiaq.

¹¹ Utiŋaruq anaqammagu kiŋmiaqaqłuni nutaamik olive akutuqpaŋanik. Tavraasii Noah iḷitchuġiruq imaq anmuŋatilaaŋa.

¹² Tavra utaqqivsaaŋaruq tallimat malġugni uvluni aasii aullaqtivsaalgił̣ł̣ugu tiŋmiaq; tavrani aglaan utitqiŋiñŋaruq.

¹³ Noah 601-tun ukiuniŋman, sivulliġmi uvluani sivullium tatqim, imaiŋaruq. Noah-m matuiyaŋagaa umiaqpak aasii iḷitchuġiŋaruq nuna paliqsaaniktilaaŋanik.

¹⁴ Iñuiññaq tallimat malġuŋanni (27th) uvluŋisa tugliuruam tatqim nuna iluqani paliumasiŋaruq.

¹⁵ God-im uqallautigaa Noah,

¹⁶ “Niusitchi umiaqpagmiñ ilviḷḷu tuvaaqatillu, iġñiġutitillu, tuvaaqatiŋiḷḷu.

¹⁷ Niuqatigilugich iluqaisa tiŋmiat, niġrutit, paamġuqtuallu nunami, iñugiaksiyumaut aasii siamillutiŋ iluqaanun nunamun.”

¹⁸ Tavraasii Noah niuŋaruq umiaqpagmiñ tuvaaqatiniḷu, iġñiiniḷu, tuvaaqatiŋiḷḷu.

¹⁹ Iluqaġmiŋ niġrutit, paamġuqtuat nunami, tiŋmiallu, piayaaŋiḷḷu niuŋarut.

Noah Aitchuutiqaŋaruq

²⁰ Noah ikipkaiviḷiuŋaruq Ataniġmun; atausiullaavlugich qanusiḷḷaat salumarualiaguruaniñ niġrutiniñ suli tiŋmianiñ aitchuutiksraŋaruq, aasii ikipkaqługich suġaił̣ł̣ugich aitchuutigivlugich ikipkaivigmi.

²¹ Tipaat aitchuutigiraŋisa iviġaginiġaa Atanġum, aasii ilimiñun uqallaktuq, “Qakuguunnii nuna piaġiiḷipkatkigñiaŋitkiga iñuich piḷġusiŋich pisigilugich; iḷisimaruŋa mikiniġmiŋniñ qaŋa isummatiŋich pigiitchuagurut. Qakuguunnii suksraunġitqigñiaŋitkitka iluqaisa iñuuruaguruat, savausiġiraptun taaptumani.

²² Nuna qaŋapak ilgutilaaŋatun, nautchiiviksraqaġniaqtut kivluiviksraqaġlutiglu. Ataramik inniaqtut qiiyanaqtuaġlu uunaqtuaġlu, upinġaaġlu ukiuġlu, aasisuli uvluġlu unnuaġlu.”