Genesis 7 - Iñupiatun Mumiksat Uqalugiksuat

Uliqpak

¹ Ataniq uqallaktuq Noah-mun, “Ikkuiñ umiaqpagmun piqatigilugich nanmiñiq iḷatin, qanukkii iḷisimaruŋa kisivich nunapayaurami nalaunŋarualiqiruagurutin.

² Ikuqatigilugich tallimat malġuktun iñugiaktigiruat igḷugiiḷḷaat pirġausiq nalaułługu salumaruat niġrutit, aŋusallullu aġnasalluŋiḷḷu, aglaan ikuqatiqaġlutin igḷugiiḷḷaałhiñanik pirġausiq nalaułługu salumaitchuaŋnik.

³ Suli tallimat malġuigullaalugi alġaiġiich tiŋmiat. Tainna piñiaqtutin qanusipayauraq niġrun suli tiŋmiaq qanusiugaluaġumi iñugiaksitqiḷḷayumauq nunami.

⁴ Tallimat malġuk uvlut pianikpata sialuktinniaġiga malġukipiani (40) uvluni unnuaniḷu, suksraunġiqsaġlugi sut iñuggutiqapayaaqtuat savaaġiŋaratka.”

⁵ Aasii Noah savaŋaruq iluqaiññik Atanġum piraksriutigiraŋiññik.

⁶ Noah ukiuqtutigiŋaruq 600-tun uliqpagman nuna.

⁷ Ilaalu tuvaaqatiniḷu, iġñiġutiiniḷu suli tuvaaqatiŋich, ikuŋarut annaksaqłutiŋ uliqpagmiñ.

⁸ Aŋusalluŋiḷḷu suli aġnasalluŋich qanusipayaurat niġrutit tiŋmiallu, paamġuqtuallu nunami, salumagaluaqpata naakka salumaiḷḷutiŋ,

⁹ ikuŋaniqsut umiaqpagmun piqatigivlugu Noah, God-im piraksriutaatun.

¹⁰ Tallimat malġuk uvlut pianiŋmata uliqpaksaŋaruq.

¹¹ Noah 600-tun ukiuqtutigiliġman, akimiaq malġuŋanni (17th) uvlut tuglianni tatqich, siiqsinniġich suppuqhiaġniqsut immamik taġiumiñ itiruamiñ, upkuaŋich immat qiḷaŋmi aŋmaŋarut,

¹² sialuŋaruq nunami malġukipiani (40) uvluni unnuaniḷu.

¹³ Taaptumani uvlumi Noah tuvaaqatiniḷu ikuŋaruk umiaqpagmun piqatigivlugich piŋasut iġñitiŋ, Shem-lu, Ham-lu, Japheth-lu, tuvaaqatiŋiḷḷu.

¹⁴ Piqatigiŋammigaich qanusipayaurat niġrutit, pamiqsaagugaluaġmata, pamiqsaaguŋitkaluaġmata, qanusipayaurallu paamġuqtuat nunami, tiŋmiallu.

¹⁵ Igḷugiḷḷaat anniġniqapayauraqtuat ikuŋarut umiaqpagmun piqatigivlugu Noah.

¹⁶ Aŋusallullu aġnasallullu nigrutit isiŋarut, God-im piraksriutaa nalaułługu. Tavraasii Atanġum umiŋagaa upkuaq aquagun Noah-m.

¹⁷ Uliqpaŋaruq malġukipiani (40) uvluni, imaq itisiŋaruq puktallasiḷġataqtillugu umiaqpak.

¹⁸ Imaq itisisaiññaŋaruq, suli umiaqpak puktaŋaruq.

¹⁹ Itisivaił̣ł̣uni matullaŋagaich qiḷaum ataaniittuat iġġipayaurat, qutchiŋñiqsratunnii;

²⁰ ulitchaiññaŋaruq qutchiksigiliġataqhuni iñuiññaq tallimat (25) isigagniqtunkavsak qaaŋiqł̣ugich iġġich.

²¹ Iñuggutiqapayauraqtuaq nunami tuquŋaruq—tiŋmiapayaat, pamiqsaat pamiqsaaguŋitchuallu, qupilġupayaurat, iñupayaurallu.

²² Sunapayauraq nunami aniġniqaqtuaq tuquŋaruq.

²³ Atanġum suksraunġiŋaniġaich sut iñuggutiqapayaaqtuat—iñuich, niġrutit, paamġuqtuat nunami, tiŋmiallu. Kisiŋŋuqtauŋarut kisimiŋ Noah-lu ikuqatigiraŋiḷḷu umiaqpagmun.

²⁴ Imaq anmuksaŋaitchuq 150-tun iñugiaktigiruani uvluni.