Genesis 6 - Iñupiatun Mumiksat Uqalugiksuat

Iñuich Piḷuusiqiruat

¹ Iñuich siamitanigataġmata nunamun iluqaanun, aasii paniqarraqsivḷutiŋ,

² iḷaŋisa qiḷaŋmiŋŋaqtauruat God-im iġñiŋisa tautukkamisigik aġnaġikpaktuat aġnat tuvaaqatiniktuŋarut kisupayaanik pigisuktamignik.

³ Ataniq aasii uqallaktuq, “Iñuich iñuupkaġniaŋitkitka taimuŋa; qanuq iñugruiññaurut. Tavraŋŋaaglaan iñuuniaŋitchut qaaŋiġḷugi 120 ukiut.”

⁴ Taipkunani uvluni, suli aquvatigun, iñukpasuqaŋaniqsuq nunami kiŋuvaaguruanik aġnanun iñugruiññauruanun qiḷaŋmiŋŋaqtauruanullu God-im iġñiŋiññun. Kamanaqłutiŋ aŋuyaktiqpausuuŋarut suli nuimaruaġisuuŋaniġaich aippaani.

⁵ Atanġum qiñiqługu qanutun piḷuktualiqiriġuqtilaaŋiññik iñuich nunami qanutullu pigiitchuałhiñanik isumasiññaliġmata ataramik,

⁶ isumaaliŋaruq savaaġiŋatilaaŋiññik inillakługi nunamun. Nunuuralipiallaŋaruq.

⁷ Uqallakłuni aasii, “Suksraunġiġñiaġitka ukua iñuich savaaġiŋaratka, niġrutit, nunamiḷu paamġuqtuat, tiŋmiallu, qanukkii nunuuraliqsuŋa savaagiŋagapkich tamatkua.”

⁸ Aglaan Atanġum iviġaumagiŋaniġaa Noah.

Noah-kun

^9-10 Uvva quliaqtuaq Noah-kun. Iġñiqaŋaruq piŋasunik, Shem-miglu, Ham-miglu, Japheth-miglu. Noah sumik pasiñaġumiñaiññiqsuq iñulluatatualuuvluniḷu taimani. Iñuuŋaruq maliġuaqługu God.

¹¹ Tavrani iñuich iluqaġmiŋ piḷuktualiqirauŋarut God-im sivuġaani, qinnautikun piaqłuktaun sumipayauraq iḷiŋaruq.

¹² God-im qiñiŋagaa nuna aasii iḷitchuġiŋaruq pigiiḷiŋatilaaŋanik, qanukkii iñupayaat iñuusiŋat piḷuksipiaġataŋaruq.

¹³ God-im uqallautigaa Noah, “Sivunniqsuŋa tuqutchukługich iñuupayauraqtuat nunami. Suksraunġiġñiaġitka tamatkiġḷugich, qanukkii uvva nuna siḷivittuq piaqłuktaunmik.

¹⁴ Umiaqpaliuġiñ iliŋnun qirulluatamik; inauraliqsuġlugu suli qaaliġḷugu anŋunmik iḷualu siḷataalu.

¹⁵ Takitilaaliġḷugu 450-tun isigagniqtun, piŋasukipiaq akimiatun (75) isigagniqtun iraqtutigiliġḷugu, suli malġukipiaq tallimatun (45) puqtutilaaliġḷugu.

¹⁶ Qiḷaliġḷugu umiaqpak aasii aŋmarualiġḷugu akimiaq piŋasunik (18) titiġniñik agmaniqtutigilugu akunġakkun qiḷaŋatalu saniġaŋiksigullu. Qiḷagualiġḷugu malġugnik suli upkualiġḷugu saniġaagun.

¹⁷ Uliqpaktinniaġiga nuna suksraunġiqsaġlugi aniġniqapayaaqtuat ataani qiḷaum. Sunapayauraq nunamiittuaq tuquniaqtuq,

¹⁸ aglaan inillaiñiaqtuŋa sivunniuġunmik iliŋnun. Ikuniaqtutin umiaqpagmun piqatigilugu tuvaaqatin, iġñitin, suli tuvaaqatiŋich.

¹⁹ Umiaqpagmun ikuqatiginiaġitin malġullaat niġrutit, aŋusallut aġnasallullu, iñuullayumaut.

²⁰ Malġullaat qanusipayaurat tiŋmiat, qanusipayaurallu niġrutit, paamġuqtuallu nunami; qaiñiaqtut inmiktun iñuusuglutik.

²¹ Qanusiḷimaanik taqualigaaġutin ilivsiḷu niġrutillu niqiksraŋiññik.”

²² Noah-m savaŋagaa iluqaan God-im piraksriutipayaaŋa.