Genesis 49 - Iñupiatun Mumiksat Uqalugiksuat

Uqallaguiqsaaġutiŋich Jacob-gum Iġñimiñun

¹ Jacob ququaġniġaich iġñiġutiini suli uqallakłuni, “Katillagitchi avalluŋa, uqautiniaġivsi qanuq piñiaqtilaavsiññik sivuniksrami:

² “Qaisitchi atautchimuglusi suli naalaġniḷusi, iġñiġutiiŋich Jacob. Naalaġnisiuŋ aapaksi Israel.

³ “Reuben, aŋayukłiq iġñiġa, suaŋŋatigigikpiñ Suli miqłiqtuqqaaġa aŋutiġuqama, Qutchiksuaguniqtauruaq suli saŋŋiñiqtauvluni iġñipayaamniñ.

⁴ Qaiḷḷiqpakłuni ulittuatun ittutin, Aglaan nuimaruaguniqtauniaŋitchutin, Siñiqatigiŋavlugu nukaġaġa Suli salumaiḷiŋagiñ aapavich siñigviŋa.

⁵ “Simeon-lu Levi-ḷu aniqatigiiksuk. Savikpaktiŋ atuġuugaich qinnautikun.

⁶ Piqasiutiniaŋitchuŋa nalunaqtuakun uqaqsaqpagnik, Naaggaunnii iḷauluŋa kasimaniŋiññi, Qanuq tuqutchisuuruk iñugnik uumisuutikun Suli anniusiġaġigaich immuliviich aŋusalluŋich qilluusiqługich.

⁷ Piaġiiḷḷiuġutauli qinnautiŋak, qanukkii suaŋapiaġataqtuq, Suli qinnautaagnun, qanukkii naglikkutaipiaġataqtuk. Siamitinniaġikka sumupayauraq nunaŋani Israel. Suŋnamulliqaa aullaqtinniaġikka akunġanni iñuŋisa.

⁸ “Judah, aniqatiikpich nanġaġniaġaatin. Tigummisuugitin akiḷḷiuruat iliŋnun quŋusiŋisigun. Aniqatiitin punniaqtut sivuġaġnun.

⁹ Judah ittuq lion-tun, Tuqułługu pisaġinnikhuni aasii utiġmivḷuni sisiŋanun. Isivsalaaqhuni suli nalaqsraaqhuni. Kia unnii alapisaaqsausiitkaa.

¹⁰ Judah-m tigummiñiaġaa umialguruam ataniġnaqutaa, Suli kiŋuvaaŋich atanniqsimanniguuniaqtut. Nunaqpauruat qaġġirriñiaqtut ilaanun nanġautauruanik; Suli pullutiŋ sivuġaanun kamakkutiqaġlutiŋ.

¹¹ Pitugaġigaa kakaktiayaani grape-gich napaaqtuayaaŋannun, nakuuniqtauruamun napaaqtuayaamun. Iġġuġaġigaich annuġaani auktun kaviqsigiruamun wine-mun.

¹² Irraŋik taaqsiłhaaġaktuk wine-min, Kigutiŋich qatisiłhaaġaqtut immugmin.

¹³ “Zebulun iñuuniaġniaqtuq taġium siñaani. Ilaani immam siñaa uqqiyviuniaqtuq umiaqpagnun. Nunaŋa aktiginiaqtuq tikiḷġataġlugu Sidon.

¹⁴ “Issachar nakuułhaaŋitchuq kakaktimiñ Nalaruamiñ isivsalaaŋavluni akunġagni nanmauttak.

¹⁵ Aglaan qiñiġaa unaŋuiqsiaġvigiksilaaŋanik Suli nunaraaġikł̣uni. Tavraasii kurraqłuni akigaġaġigaa nanmani Nunurirauvluni savagaqtuq kivgauruatun.

¹⁶ “Dan qaukłiuniaqtuq iñugmiñun. Irrusiqaġniaqtut allatun maŋŋuġiraŋisun Israel.

¹⁷ Dan anayaġniaqtuq nimiġiatun saniġaani apqutim, Tuqunaliktun nimiġiatun saniġaani aullayaam, Kiiññiktuaq tuttuqpaum kimmiŋanik, Usiaqsiqsuaq katakkumiñaqsivḷugu kiŋunmun.

¹⁸ “Utaqqiuqtuŋa annaunmik, Ataniiq.

¹⁹ “Gad aŋuyagniaġaat tigligayuktit, Aglaan saquluni aquliraġniaġaich.

²⁰ “Asher-m nunaŋa nauriñiaqtuq niqigiksuanik. Niqiksraqaqtitchiñiaqtuq niqigiyumiñaqtaŋiñik umialgum.

²¹ “Naphtali tuttu-tun ittuq paŋaliktuaqtuatun, Ivaaqaqtuaq piññaġnaqtuanik nuġġaġnik.

²² “Joseph ittuq siiġñirruġiksuatun napaaqtuayaatun saniġaani kuugauram, aasii qisiksiutiŋi nauqpakhutiŋ akpakługu katchi.

²³ Akiḷḷiŋisa aŋuyakkaat qinnautikun Suli aquliraqługu pisiksimigniglu qaġrumigniglu.

²⁴ Aglaan pisiksiŋa aulalaitchuq iigusimaruaq Suli pisiksuqsiñiaqtuq Suaŋŋataagun Sapiġñaqtuam God-iŋata Jacob, Imnaiḷiqirauruakun, Munaqsriruam Israel-mik.

²⁵ Aapavsi God-iŋata ikayuqtuaġaatin, Sapiġñaqtuam God-im quviasuusiqsuġaatin Quvianaqtuamik sialugmik takpagmaŋŋa Suli itiruanik immanik samaŋŋa ataaniñ nunam, Quviasaaġusiaġivlugich iñugiaktuat pamiqsaat suli miqłiqtut,

²⁶ Quviasaaġusiaŋich aapakpiñ kamanałhaaqtut, Quviasaaġusiusiaġilugich utuqqauruat iġġich, Quvianaqtuatsuli sut isuksraiḷaaniñ qimiqqaniñ. Taapkuatuq quviasaaġutit tunŋalich niaquanun Joseph, Qauŋanun ilaaguaqtauŋaruam ilimigun aniqatiimiñiñ.

²⁷ “Benjamin ittuq iqsiñaqtuatun amaqqutun. Uvlaami tuqutchiraqtuq aŋuramiñik aasii niġivlugich; anaqamman aasii autaaqługich piññaktaani.”

²⁸ Tavra ukua qulit malġuuruat (12) maŋŋuurut Israel-mi, suli tavra taamna aapaŋata uqallaguiqsaaġutaa quviasaaġun iluaqtuaguŋaruq iġñillaamiñun.

Tuqumman Suli Iḷuviġmarruŋ Jacob

²⁹ Tavraasii Jacob-gum piraksriġñiġaich iġñiġutiini, “Tavra iḷḷatiniaqtuŋa iḷamnun tuquŋaruanun, iḷuviġisigivsiŋa aapagma irviannun qaiġusugmun nunaŋaniittuamun Ephron Hit-miuguruam,

³⁰ Machpelah-mi kiluani Mamre-m nunaŋani Canaan. Abraham-gum tauqsiŋaraŋa taamna qaiġusuk suli nuna Ephron-miñ iḷuvvivigisukługu.

³¹ Tavruŋa iḷuviŋaraat Abraham suli tuvaaqataa Sarah; tavruŋa iḷuviŋammigaat Isaac suli tuvaaqataa Rebekah; tavruŋaptauq iḷuviŋammiraġa Leah.

³² Nunalu qaiġusuglu tavraniittuak tauqsiaguŋaruk Hit-miuguruaniñ. Taamuŋa iḷuviquruŋa.”

³³ Jacob naatchiḷġataqami piraksriqsuutimiñik iġñimiñun, nallatqiŋaruq aasii aniġniġiŋaruq iḷativluni kiŋuniimiñun.