Genesis 48 - Iñupiatun Mumiksat Uqalugiksuat

Jacob-gum Uqautimmagik Ephraim-lu Manasseh-lu Piḷḷuatautiqaquvlugik

¹ Qakugulimman Joseph kiliŋagaat aapaŋa naŋiliġñivḷugu. Tavraasii iġñagni, Manasseh-lu Ephraim-lu piqatigivlugik tautugiaŋagaat Jacob.

² Tavra Jacob uqallautimmanni iġñiŋata Joseph-gum tautugiaġnivḷugu, sayanikhuni aquvinŋaruq siñigvigmiñi.

³ Jacob-gum uqallautigaa Joseph, “Sapiġñaqtuaq God niptaŋaruq uvamnun Luz-mi nunaŋani Canaan suli quviasaaġunmik qaitchivḷuŋa.

⁴ Uqallautigaaŋa, ‘Miqłiqtuksriññiaġikpiñ iñugiaktuanik, kiŋuniitin iñugiaglutiŋ nunaqpaguġumaut; Nuna manna qaiññiaġiga kiŋuniiġnun iliŋisa piginiaġaat taimuŋa isuitchuamun.’”

⁵ Jacob uqavsaaqtuq, “Joseph, malġuk iġñakiñ, aniŋaruak iliŋnun Egypt-mi qaiŋaiñŋaġma mauŋa, uvaŋa pigigikka; Ephraim-lu Manasseh-lu iġñiġigikka tainnaptauq Reuben-tullu Simeon-tullu.

⁶ Iġñiqavsaaġuvich, uvaŋa pigimmatun inniaŋitchut; kiŋuvaannaktaaŋat qaiñiaqtuq iliŋiññun Ephraim-kuaġuni suli Manasseh-kuaġuniḷu.

⁷ Taamna tainna pigiga pisigivlugu aakan Rachel. Isumaaqpaŋaruŋa tuqumman nunaŋani Canaan, uŋasiŋitchuami Ephrath-miñ, Mesopotamia-miñŋaqtilluŋa. Iḷuviŋagiga taavuŋa saniġaanun apqutim Ephrath-muksaġiam.” (Ephrath paŋmami Bethlehem-mik pisuugaat.)

⁸ Jacob-gum tautukkamigik Joseph iġñiŋik, apiqsriruq, “Kitkuk ukuak nukatpiaġruuk?”

⁹ Joseph kiugaa, “Tavra taapkuak iġñaka, God-miñ aitchuusiaka maani Egypt-mi.” Jacob uqallaktuq, “Qaġġisuutikkik uvamnun piḷḷuatautiksraŋigñik qaitchiyumagikka.”

¹⁰ Jacob irraŋik qiñilguiḷiŋaruak aŋayuqaksraġuŋavluni, tautulguiḷiŋaruq. Joseph-gum ilaanuutigaik nukatpiaġruuk, aasii iqimmalaaġaik suli kunikł̣ugik.

¹¹ Jacob-gum uqallautigaa Joseph, “Taututqigñiaġasugiŋaitkaluaqtaqpiñ, naakkauvva God-im qiñiqtitkaik unnii miqłiqtukiñ.”

¹² Tavraasii Joseph-gum tiguvlugik saġliaqsiqsuak Jacob-mi, punŋaruq sivuġaanun kiiñani nunamukługu.

¹³ Joseph-gum inillakkaa Ephraim Jacob saumianun aasii Manasseh taliqpianun.

¹⁴ Aglaan Jacob-gum mumiksiłługik argagni, taliqpiñi iḷigaa niaquanun Ephraim, nukaqłiugaluaqtillugu, saumiñiasii niaquanun Manasseh-m, aŋayukłiuruam.

¹⁵ Tavra uqautimmigaa piḷḷuatautiksraŋanik Joseph: “God-imtuq, aapagma Abraham-guvlu Isaac-guvlu savautiŋaraakta, quviasaaġunmik aitchuġligik ukuak nukatpiaġruuk! God-imtuq, imnaiḷiqirigiraġma uvlupagmuaglaan, quviasaaġunmik aitchuġligik!

¹⁶ Isaġulgumtuq, annaurrisuuruam uvamnik anniġñiksrakkaluamniñ, quviasaaġunmik aitchuġligik! Atiġatuq suli atiŋik aapagma Abraham-lu Isaac-guvlu sivunmun iñuuyumaut ukugnuuna nukatpiaġruukkun! Miqłiqtuukkaġumauktuq, iñugiaktuanik kiŋuniiqaġutiŋ!”

¹⁷ Joseph iviġaŋiñŋaruq tautukkamiuŋ taliqpiŋa aapami Ephraim niaquanugmagu; tavraasii tiguvlugu aapami argaŋa nuutchaŋagaa Ephraim niaquaniñ Manesseh-m niaquanun.

¹⁸ Uqallautigaa aapani, “Tainnaŋiḷaaq, aapaaŋ. Uvva unatchiq aŋayukłiuruq; iḷḷiuŋ taliqpiiñ niaquanun.”

¹⁹ Aapaŋa tainna pisuŋitchuq, uqaqłuni, “Iḷisimaruŋa, iġñiiŋ, iḷisimaruŋa. Manasseh-mtauq kiŋuniiŋich kamanaqtuaguniaġmiut. Aglaan nukaaluŋa kamanałhaaġniaqtuq ilaaniñ, suli kiŋuniiŋich nunaqpaguġniaġmiut.”

²⁰ Tavraasii quviasaaġunmik aitchuġniġaik taaptumani uvlumi, uqaqłuni, “Israel-gum kiŋuvaaŋich atuġniaġaich atisik qaitchiraġigumiŋ taiḷugich piḷḷuatautiksrat. Uqallagniaqtut, ‘God-imtuq itillisin Ephraim-tullu Manasseh-tullu.’” Tavra tainnaqami Jacob-gum Ephraim sivulliġuutiniġaa Manasseh-miñ.

²¹ Jacob uqallaktuq Joseph-mun, “Tautukkiŋma, tuquyasitilaamnik, aglaan God-im itqatiginiaġaatin suli utqutilutin nunaŋannun maŋŋuuvich.

²² Ilignun aniqatiiŋiḷaaġnun qaitkiga Shechem, naurivigiksuaq piññaktaaġiŋaraġa Amor-miuguruaniñ savikpamniglu pisiksimniglu.”