Genesis 47 - Iñupiatun Mumiksat Uqalugiksuat

¹ Tavraasii Joseph-gum piqatigivlugich tallimat aniqatiini Pharaoh-muŋaruq. Uqallautigaa, “Aapagalu aniqatiitkalu qairut Canaan-miñ piqatigivlugich iñugiaktuat niġrutitiŋ, kanŋut, iluqaisalu sut pigiratiŋ. Amma paŋmami nunaŋaniittut Goshen.”

² Tautuktitkaich aniqatiini Pharaoh-mun.

³ Pharaoh-m apiġigaich, “Sumik savaaqaġuuvisi?” “Imnaiḷiqiraurugut, aŋuun, maŋŋuġiraptitun,” iliŋisa kiugaat.

⁴ “Qairugut iñuuniaġiaqhuta mattumani nunami, qanukkii nunaŋani Canaan niqaiḷḷiuġnaq iŋattaqsiŋaruq niġiñiaġviksraiqsaallaisa iñugiaktuat niġrutivut. Apiqsrirugut iñuuniallasukhuta nunaŋani Goshen.”

⁵ Umialik uqallaktuq Joseph-mun, “Aapaksiḷu aniqatiitillu tikisanigniġmata,

⁶ nunaŋa Egypt iliŋisa pigigaat. Inillaglich nunaŋanun Goshen, nakuuniqtaŋanun nunam. Suli iḷaqaqpata akunġanni piḷḷaruanik, munaqsriḷiutilugich pamiqsaagutimnun.”

⁷ Tavra Joseph-gum aapani Jacob sivuġaanuutigaa umialgum. Jacob-gum qaitchiñiġaa umialik ilimiñiñ uqautivlugu piḷḷuatautiqaqsimaaquvlugu,

⁸ aasii umialgum apiġigaa, “Qanutun ukiuqtutigivich?”

⁹ Jacob-gum kiugaa, “Iñuuniġa kukiḷukłuŋa iñugiaktigiruq tallimakipiaq iñuiññaq qulitun (130) ukiunik. Ukiut taapkua iñugiakitchut suli siġġaġnaqhutiŋ, inŋitchut sivisutigilutiŋ ukiuŋisun taipkua maŋŋuuġma kukiḷuktuaguummata.”

¹⁰ Jacob-gum qaitchivḷugu umialik tautuguiqsaaġutikun quviasaaġunmik aullaqtuq.

¹¹ Tavraasii Joseph-gum inillaktinŋagaa aapani suli aniqatiini Egypt-mun, nunaksrił̣ł̣ugich nakuuniqtaŋanik nunam qaniŋani Rameses, piraksriutaatun umialgum.

¹² Joseph-gum niqiksraqaqtinŋagaa aapani, aniqatiini, suli iluqaisa aapami nanmiñiq iḷaŋi, iḷagivlugich nukaqłiqpiaġiraŋiḷḷu.

Niqaiḷḷiuġnaq Egypt-mi

¹³ Niqaiḷḷiuġnaq iŋattaqsivaił̣ł̣uni niqaiŋaruq sumipayaaq, tavraasii iñuŋich Egypt suli Canaan sayaiġutiŋarut kaakhutiŋ.

¹⁴ Tauqsiġaġimmata palauvaksranik, Joseph-gum katiłługich iluqaisa maniich Pharaoh-m igluqpaŋanuutiraġigaich.

¹⁵ Manik iluqani nuŋumman Egypt-miḷu Canaan-miḷu, Egypt-miuguruat Joseph-mukhutiŋ uqaqtut, “Niqiksritchigut! Tuqupkaġnasigut. Qanuq piutisigut! Maniiġutirugut.”

¹⁶ Joseph-gum kiugai, “Qaġġisisigik pamiqsaagutisi; simmiutigilugich niqinun manisi nuŋuŋakpata.”

¹⁷ Tavraasii qaġġisiŋagaich pamiqsaagutitiŋ Joseph-mun, aasii aitchuŋagaich niqinik simmiutigivlugich tuttuqpagnun, imnaiñun, nagrulignun, pamiqsaanun, suli kakaktinun. Taaptumani ukiumi niqiqaqtinniġaich simmiqsuqtiłługich pamiqsaagutiŋiññik.

¹⁸ Ukiutqiḷgiñman ullakługu Joseph uqautigaat, “Iriqtaġiniaŋitkikput iliŋniñ, aŋuun, maniiġutiŋarugut suli pamiqsaavut ilvich pigiliutiŋagitin. Aitchuutiksraiġutirugut iliŋnun aglaan tavra uvagut timivut suli nunagiravut.

¹⁹ Tuqupkaġnasigut. Qanuq piḷḷasisigut! Nunagiravut iñuksruiġutipkaġnagich. Tauqsiqsigut suli nunavut simmiutigilugich niqinun. Umialigmun kivgauniaqtugut, suli ilaata nunavut pigiliutiniaġaich. Aitchuqsigut palauvaksranik iñuullasiḷuta suli saunaanik nautchiaksranik nautchirriiḷḷayumaugut nunaptinni.”

²⁰ Joseph-gum tauqsiġñiġaa iluqaan nuna Egypt-mi umialigmun. Egypt-miugupayaaqtuaq tunisiruksrauŋaniqsuq nunamiñik, qanukkii niqaiḷḷiuġnaq suaŋasiŋavaił̣ł̣uni; suli iluqaan nuna umialigum pigiliutillaŋagaa.

²¹ Joseph-gum kivgaliutiŋagai iñuich isuaniñ Egypt nunaŋata allamun isuanunaglaan.

²² Nuna tauqsiŋisualuktaŋa tavra nunagiraŋat aŋaiyyuliqsiqpaich. Tunisiruksrauŋaiñŋarut nunamignik, qanukkii umialigum piksraqaqtiłługich iñuullasivḷugich.

²³ Joseph-gum uqallautigaich iñuich, “Uvvaasii, tauqsiŋagivsi nunasiḷu Pharaoh-mun. Uvva saunaat nautchiaksrat nautchirriiyumausi nunavsiññi.

²⁴ Kivluiñaqsikpan qaitchiruksraurusi tallimaŋannik umialigmun. Iḷaŋa aasii atuġlugu nautchiaksranun suli niqigilugich ilivsi qitunġavsiḷu.”

²⁵ Iliŋisa kiugaat, “Annautiŋagitin uvva iñuggutivut; aŋalalluataŋagivsigut, aŋuun, kivgauniaqtugut umialigmun.”

²⁶ Tavraasii Joseph pitquraliuŋaruq nunaŋani Egypt tallimaŋat kivluaŋisa pigiliutitquvlugu umialigmun. Taamna pitquraq ittuqsuli uvlupagmuaglaan. Nunaŋich kisimiŋ aŋaiyyuliqsiqpauruat pigiliutiŋaitkaich umialigum.

Jacob-gum Aqulliq Apiqsriaŋa

²⁷ Israel-gum kiŋuvaaŋich iñuuniaŋarut Egypt-mi nunaŋani Goshen, tavrani umiallaŋarut suli iñugiaktuanik miqłiqsivḷutiŋ.

²⁸ Jacob iñuuŋaruq Egypt-mi akimiaq malġuktun (17) ukiuni, 147-tun ukiunigataqhuni.

²⁹ Tuqquviksrani qallimman, ququaŋagaa iġñini Joseph aasii uqallautivlugu, “Iviġaumanaġnasugigumŋa irragni, iḷḷiuŋ argaiñ ataanun qiqpagma aasii iḷumun ittuamik unniqsuqłiiḷutin iḷuviġniaŋiññiḷuŋa Egypt-mi.

³⁰ Iḷuviquruŋa aapagma irviannun; tigumiaġluŋa Egypt-miñ aasii iḷuviġluŋa iḷuviġviannun.” Joseph-gum kiugaa, “Piñiaqtuŋa uqallausiqsun.”

³¹ Jacob uqallaktuq, “Unniqsuqłiigguiñ tainna piñiaġniḷutin.” Joseph unniqsuqłiiŋaruq, aasii Jacob quyanaaġutiqaŋaruq tavrani siñigvigmiñiillaġmi.